Agimtuod Dagiti Agtutubo
Apay a Nasken a Tumabunoak Kadagiti Nakristianuan a Gimong?
MAGUSTUAM KADI TI TUMABUNO KADAGITI NAKRISTIANUAN A GIMONG?
WEN → ITULTULOYMO TI AR-ARAMIDEM
Saan → ANIA TI MABALINMO NGA ARAMIDEN?
IBILBILIN ti Biblia kadagiti Kristiano nga agtataripnongda tapno agdaydayaw. (Hebreo 10:25) Ngem kasano ngay no dimo magustuan ti kaaddam sadiay? Kasanon no agar-arapaapka iti mabalin koma nga ar-aramidem iti sabali a lugar—sadinoman dayta? Padasem ti maysa wenno ad-adu pay kadagiti sumaganad a singasing.
1. REGULAR A TUMABUNOKA
Kuna ti Biblia: “Saantay a baybay-an ti panagtataripnongtayo a sangsangkamaysa, kas iti kaugalian ti dadduma.”—Hebreo 10:25.
Apay koma a regularka iti maysa nga aktibidad a kasla dimo met magustuan? Nasken ngamin nga aramidem dayta tapno magustuamto met laeng! Panunotem: Kasanoka nga agbalin a nalaing iti maysa nga ay-ayam—ken kasano a magustuam dayta—no sagpaminsan laeng nga agpraktiska? Kasta met laeng dagiti Nakristianuan a gimong. No kanayon a tumabunoka, ad-adda a magustuam ti agdayaw iti Dios a ni Jehova. Daytanto metten ti mangtignay kenka a regular a tumabuno!—Mateo 5:3.
Singasing: Kalpasan ti kada gimong, ibagam iti maysa a nagpaset no ania ti apresiarem iti imparangna. Isuratmo iti notebook ti nasursurom iti dayta a gimong. Ket yantangay maipapan iti ministerio dagiti Kristiano ti kaaduan a mailawlawag sadiay, pagbalinem a kalat ti rumang-ay iti panangiranudmo iti pammatim. Makatulong dayta tapno ad-adda a maapresiarmo dagiti impormasion a mangngegam kadagiti gimong.
“Sipud kinaubingko, inruamdak a regular a makigimong. Uray idi ubingak pay, diak pulos kayat ti aglangan ken kastaak latta agingga ita.”—Kelsey.
Laglagipem: Dagidiay regular a tumabuno kadagiti gimong ti ad-adda a maragsakan ken magunggonaan kadagita!
2. DUMNGEGKA A NAIMBAG
Kuna ti Biblia: “Siputanyo no kasano ti panagimdengyo.”—Lucas 8:18.
Kuna dagiti managsirarak a kalpasan ti agmalem, malipatanen ti kadawyan a dumdumngeg ti agarup 60% kadagiti nangngegna. No kasta kapartak ti pannakaibus ti kuartam, saan kadi nga ipamuspusam a saan a maibus dayta?
Singasing: Agtugawka iti abay ti nagannakmo iti asideg ti sango ti paggigimongan ta basbassit ti pakasingaam sadiay. Aginotarka. Agduduma ti pamay-an ti panagsursuro dagiti tattao ngem makatulong ti panaginotar tapno makapagimdengka a naimbag iti agpalpalawag. Makatulong met dayta inton adda kayatmo a repasuen a punto.
“Diak idi maisentro ti panunotko nga agimdeng kadagiti gimong ngem saanen a kasta ita. Ikagkagumaak a panunoten no apay nga addaak sadiay. Saan a ritual dayta a kas iti pannakimisa. Makigimongak tapno agdaydayawak iti Dios ken tapno adda masursurok a pagsayaatak.”—Kathleen.
Laglagipem: No makigimongka ngem dika met dumngeg a naimbag, kaska la napan iti party ngem dika met nangan.
3. MAKIPASETKA
Kuna ti Biblia: “Babaen iti landok, ti met laeng landok mapatadem. Gapuna ti maysa a tao patademenna ti rupa ti sabali.”—Proverbio 27:17.
Kas agtutubo, adda napateg a papelmo kadagiti gimong ti kongregasion. Dimo pulos tagibassiten ti kaaddam ken pannakipasetmo, panagkomento man dayta iti saludsod ken sungbat a paset ti gimong wenno pannakilangen kadagiti kapammatiam.
Singasing: Aramidem a kalat ti agkomento uray maminsan laeng. Agboluntarioka a tumulong iti panagdalus wenno dadduma pay a trabaho a nasken a maaramid sakbay, bayat, wenno kalpasan ti gimong. Makisaritaka iti manmanom a makatungtong.
“Bayat ti kinatin-edyerko, nagboluntarioak nga agiyawat iti mikropono ken mangurnos iti entablado para kadagiti gimong. Gapu kadagita a responsabilidad, nariknak nga adda maitultulongko. Naamirisko a rumbeng a kanayon a makigimongak ken agbalinak a managsapsapa. Dayta ti nakatulong tapno agbalinak nga ad-adda nga interesado iti kinapudno ti Biblia ken iti panagdaydayaw iti Dios.”—Miles.
Laglagipem: Dika basta agtugaw lattan sadiay—makipasetka! Kanayon nga ad-adu ti magunggona ti makipaset ngem ti agbuybuya laeng.
Ad-adu pay nga artikulo ti masarakam iti serye a “Young People Ask” iti Web site a www.watchtower.org/ype
[Kahon/Dagiti Ladawan iti panid 21]
AW-AWISENDAKA!
Kayatmo kadi
● Nga ammuen ti kinapudno maipapan iti Dios?
● Ti agbalin a nasaysayaat a tao?
● A masarakan dagiti kasayaatan a kita ti gagayyem?
Ti gimong dagiti Saksi ni Jehova ti makatulong kenka a mangaramid kadagita—ngem saan la a dayta! Kada lawas, mamindua nga agtataripnongda kadagiti bukodda a Kingdom Hall tapno agdaydayaw. Awan ti makolekta a kuarta ken kanayon a mapasangbay dagiti bisita.
Dika agpaikapis! Dagiti Kingdom Hall ket naiduma kadagiti napanamon a simbaan wenno kapilia. Kadagiti gimong dagiti Saksi ni Jehova, maipangpangruna ti panagadal iti Biblia. Maammuam no kasano a matulongannaka ti Sao ti Dios a maaddaan iti kasayaatan a biag!—Deuteronomio 31:12; Isaias 48:17.
Sai—Idi damo a simrekak iti Kingdom Hall, nasdaawak ta awan dagiti rebulto, awan ti nakaabito a kas iti padi, ken awan ti nagkolekta iti kuarta. Nakiam-ammo kaniak ti amin isu a timmalged ti riknak. Nalaka a maawatan ken umiso met dagiti napagsasaritaan. Daytoy ti kinapudno a nabayagen a birbirokek!
Deyanira—Agtawenak iti 14 idi damo a timmabunoak iti gimong dagiti Saksi ni Jehova. Dagus a nakiam-ammoda amin kaniak. Kasla talaga a maragsakanda iti kaaddak ken pudno nga interesadoda kaniak. Gapu iti nasayaat a kapadasak iti damo a pannakigimongko, saanakon a mabain a tumabuno manen!
[Kahon/Dagiti Ladawan iti panid 22]
Ammuem dagiti maadal iti sumaganad a gimong ti kongregasion. Piliem ti maysa a paset ti programa a makapainteres kenka ken . . .
KARTIBEM KEN KOPIAEM
Kompletuem ti sumaganad sakbay a makigimongka.
Paset:
․․․․․
⇩
Ti kayatko a maammuan maipapan iti daytoy a topiko:
․․․․․
Kompletuem ti sumaganad kalpasan a naiparang ti paset.
Ti nasursurok:
․․․․․
⇩
Ti ibagak iti nagpalawag maipapan iti nagustuak iti pasetna:
․․․․․