NO MAUP-UPAYKA iti organisado a relihion wenno saanka nga interesado iti dayta, saan la a siksika ti kasta. Kinapudnona, umad-adu ti mangikedkeddeng a didan makimiembro kadagiti organisado a relihion.

Dadduma ti nangpanawen kadagiti organisado a relihion gapu ta patienda a dagita nga institusion ti mangisungsungsong iti panaginsisingpet ken diskriminasion. Adda met dagidiay marigatan a mangsurot iti organisado a kita ti panagdaydayaw. Para iti sabsabali, dida kasapulan ti organisado a relihion iti panagdaydayawda iti Dios. Ania a talaga ti isursuro ti Biblia maipapan iti organisado a relihion?

Nalawag ti panangiladawan ti Biblia iti kita ti panagdaydayaw dagiti nagkauna a patriarka (ulo ti pamilia wenno tribu) a kas kada Abraham, Isaac, ken Jacob. Kas pagarigan, kuna ti Dios iti maysa a gundaway: “Naam-ammok [ni Abraham] tapno mabilinna ti annakna ken ti sangakabbalayanna a sumaruno kenkuana iti kasta salimetmetanda ti dana ni Jehova tapno aramidenda ti kinalinteg ken panangukom.” (Genesis 18:19) Ni Abraham ket gayyem ti Dios isu a nasinged ti relasionna iti Namarsua. (Santiago 2:23) Ngem nagdaydayaw met a kadua ti sangakabbalayanna. Kasta met laeng ti dadduma a patriarka a matalek iti Dios. Nagdaydayawda kas maysa a grupo, a masansan a kaduada ti pamilia, kakabagian, ken ad-adipenda.

Idi agangay, imbilin ti Dios kadagiti nagkauna nga Israelita, ken kadagiti Kristiano idi umuna a siglo, nga agtataripnongda tapno agdaydayaw. (Levitico 23:2, 4; Hebreo 10:24, 25) Ti panagkanta, panagbasa manipud iti Kasuratan, ken panagkararag iti publiko ket karaman kadagita a taripnong agpaay iti organisado a panagdaydayaw. (Nehemias 8:1-8; Colosas 3:16) Imbilin met ti Biblia nga adda kualipikado a lallaki a mangidaulo iti kongregasion iti panagdaydayaw.—1 Timoteo 3:1-10.

Maibatay kadagita a pagtuladan a nadakamat iti Biblia, nainkalintegan ngarud a namnamaen ita ti Dios a dagiti gagayyemna ket agdaydayawda kenkuana iti organisado a pamay-an. Ken adda dagiti pagimbagan ti panagdaydayaw iti Dios kas paset ti kongregasion.

Kas pagarigan, inyarig ti Biblia ti pudno a managdaydayaw iti magmagna iti nailet a dalan. (Mateo 7:14) Iti sabali met a gundaway, kas iti tumataray iti lumba. (1 Corinto 9:24-27) Bayat nga agtartaray iti nawatiwat ken narigat a dalan, mabalin a nalaka a mabannog ken sumuko inton agangay. Ngem masansan a naporporsegi nga agtaray iti labes ti kabaelanna no pabpabilgen ti dadduma. Kasta met laeng ti tao a mayat nga agdaydayaw iti Dios iti umiso a pamay-an. Mataginayonna ti relasionna iti Dios iti laksid dagiti pakarigatan no parparegtaen dagiti padana a managdaydayaw.

Dayta ti kaipapanan ti sasao iti Hebreo 10:24, 25 a kastoy ti kuna ti Biblia: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa.” Kinapudnona, ibaga ti Biblia  a kas iti literal a bagi, dagiti pudno nga agdaydayaw ket sangsangkamaysa nga agdaydayawda iti Dios kas agkakabsat.

Ti Biblia deskribirenna ti bagi, wenno kongregasion, kas agkaykaysa babaen iti singgalut ti ayat ken talna. Kas pagarigan, ibalakad ti Efeso 4:2, 3 kadagiti pudno nga agdaydayaw nga agtignayda “buyogen ti naan-anay a kinapakumbaba iti panagpampanunot ken kinaalumamay, agraman ti mabayag a panagitured, nga agiinnanuskayo iti ayat, a sipapasnek nga ikagumaanyo a salimetmetan ti panagmaymaysa ti espiritu iti mamagkaykaysa a singgalut ti talna.” Kasano a masurotmo dayta no maymaysaka nga agdaydayaw ken no dika makikadua kadagiti padam nga agdaydayaw?

Pagayatan ti Dios nga imbes nga agsisina dagiti pudno nga agdaydayaw Kenkuana, agbalinda ketdi a maysa a grupo dagiti nasinged nga agkakapammatian. Ibalakad ti Biblia kadagiti agdaydayaw iti Dios nga agsaoda a sangsangkatunos, liklikanda ti panaglalasin, ken ‘naan-anay nga agkaykaysada iti isu met laeng a panunot ken iti isu met laeng a wagas ti panagpampanunot.’ (1 Corinto 1:10) Awan kaes-eskan dagita a sasao no kayat ti Dios nga agsolsolo ti tattao nga agdaydayaw kenkuana.

Nalawag nga ipakita dagiti ebidensia iti Biblia a ti akseptaren ti Dios ket daydiay organisado a kita ti panagdaydayaw. Ti deskribiren ti Biblia nga organisado a relihion nga anamongan ti Dios ket makatulong kenka a naan-anay a mangpennek kadagiti naespirituan a kasapulam.—Mateo 5:3.

Agpayso met ketdi nga adu nga organisado a relihion ti managinsisingpet ken adu ti kinadakes nga ar-aramidenda. Ngem dina kayat a sawen a rumbeng a liklikamon ti amin a kita ti organisado a relihion. Adda la ketdi relihion ditoy daga nga organisado a mangipakpakita iti ayat iti amin a tao—nga organisado a mangisursuro maipapan kadagiti moral a prinsipio ti Dios. Matulongannaka ti kasta nga organisado a relihion a maaddaan iti pudno a pammati. Mangipaay ti Biblia iti kasapulam nga impormasion a makatulong kenka tapno masarakam ti kita ti organisado a panagdaydayaw nga anamongan ti Dios.