MAYSA ti bar-tailed godwit kadagiti tumatayab a pagsidsiddaawan unay ti tao gapu iti abilidadna nga agdaliasat. Daliasatenna ti 11,000 kilometro iti nasurok a walo nga aldaw.

Usigem: Patien dagiti managsirarak nga us-usaren ti dadduma a kita ti tumatayab ti magnetiko a puersa ti daga iti panagdaliasatda, a kasla adda nakakabit a kompas iti utekda. Malaksid iti dayta, posible nga us-usaren met dagiti godwit ti init no aldaw ken dagiti bituen no rabii. Kasla madlawda pay no adda sumungsungad a bagyo ket gundawayanda ti anginna a mangpapartak iti panagtayabda. Ngem pagsidsiddaawan pay laeng dagiti eksperto no kasano nga aramiden dagitoy a tumatayab ti makapaamanga a panagdaliasatda. Kuna ti biologist a ni Bob Gill: “Duapulo a tawenen nga ad-adalek dagita ket pagsidsiddaawak pay laeng ida agingga ita.”

Ania ti Makunam? Babaen kadi iti ebolusion a timmaud ti sistema ti panagdaliasat ti bar-tailed godwit? Wenno nadisenio dayta?