“Ti kapuskol ti yelo iti kalgaw ket ¹⁄4 laengen no idilig 30 a tawenen ti napalabas,” kuna ni Peter Wadhams a propesor ti ocean physics iti University of Cambridge, Britain. Idi 2012, agarup 50 a barko ti naglayag iti Northern Sea Route a mabalinen a pagdaliasatan gapu iti panagbara ti globo.

Ti gatas a patauden dagiti ina sumagmamano nga aldaw kalpasan a nagpasngayda ket natakuatan nga addaan iti nasurok a 700 a kita ti bakteria—ad-adu ngem iti impagarup dagiti eksperto. Ad-adalen pay laeng dagiti eksperto no ania ti maitulong dagitoy a bakteria iti sistema ti panagrunaw ken iti resistensia ti maladaga.

Idi inadal dagiti sientista a Briton dagiti nagmaneho iti simulated driving (kasla aktual a panagmaneho babaen iti kompiuter), naammuanda a nabumbuntog nga agtignay dagiti agpanateng ngem kadagidiay nakainum.

Mapaspasaran ti Africa ti aw-awagan ti dadduma kas ti “kakaruan pay laeng” a panangpapatay iti pinullo ribu nga elepante kada tawen tapno maala ti marfilda. Iti maysa nga insidente, sumagmamano nga elepante ti napaltogan iti tuktok ti uloda. Agminar a nakahelikopter ti pimmaltog.

Iti napalabas a 27 a tawen, natay ti 1⁄2 kadagiti sibibiag a korales ti Great Barrier Reef. Kuna dagiti sientista a ti kaaduan a pannakadadael ket gapu kadagiti napigsa a bagyo, panagkaan dagiti crown-of-thorns starfish [Acanthaster planci], ken ti panagpuraw dagiti korales a maigapu iti ingangato ti temperatura ti taaw.