Idi 2011, ad-adu ti nalako a bisikleta ngem kotse iti Italy. Ti krisis iti ekonomia, presio ti gasolina, ken ti magasto iti panangmantener kadagiti kotse ti dadduma a posible a rason. Ngem ti bisikleta ket nalaklaka a manteneren ken usaren, ken kombiniente.

Sigun iti European Court of Human Rights, sinalungasing ti gobierno ti Armenia dagiti kalintegan ti 17 nga agtutubo a lallaki a bin-ig a Saksi ni Jehova a naibalud gapu ta nagkedkedda a mangipaay iti serbisio sibil nga imatmatonan ti militar. Ti gobierno ket nabilin nga agbayad iti danios perhuisio iti 17 a Saksi.

Kadagiti ubbing a biktima iti krimen gapu kadagiti social networking sites, 63% ti saan a pinakdaaran dagiti nagannakda maipapan kadagiti posible a peggad. Iti 599 a kaso a nasukimat, inamin ti 74% kadagiti suspek a ti panggepda a mangus-usar kadagita a sites ket tapno makaseksda dagiti menor de edad.

Iti panagregget dagiti dadakkel a siudad a mangkissay iti nakaro a trapik, limlimitarandan dagiti mairehistro a baro a lugan. Kas pagarigan, agingga laengen iti 240,000 ti ipalubos ti Beijing a mairehistro kada tawen. Idi Agosto 2012, agarup 1,050,000 a tattao ti nakiraman iti loteria a nangted iti 19,926 a sertipiko iti panagparehistro. Kaipapanan dayta a 1 laeng iti kada 53 nga aplikante ti nangabak.