GAPU ta awan saka ken ima dagiti uleg, kasapulanda ti nakidser a lalat a makaandur iti kanayon a pannakairadrad no aguyasda. Dadduma a kita ti uleg ti umuli kadagiti narusanger a puon ti kayo idinto ta adda met dagiti kumutkot iti nakersang a kadaratan. Apay a nakalaglagda ti lalat ti uleg?

Usigem: Nagduduma ti kapuskol ken pakabuklan ti lalat ti tunggal kita ti uleg. Ngem adda maysa a nagpapadaan ti lalat ti amin nga uleg: Natibker ti makinrabaw sa in-inut a lumuklukneng bayat nga umun-uneg. Apay a makatulong dayta? “Ti material a nasikkil ti rabawna sa lumaplap-it ti unegna ket makaiwaras iti napigsa a puersa iti nalawlawa a paset,” kuna ti managsirarak a ni Marie-Christin Klein. Gapu iti nagpaiduma a pakabuklan ti lalat ti uleg, makakapet ti bagina iti daga tapno makauyas. Patas met ti panangiwaras ti bagina iti puersa kadagiti natirad a batbato tapno saan unay a madadael ti lalatna. Masapul a nalagda ti lalat ti uleg ta kadawyan a maminsan laeng iti kada dua wenno tallo a bulan nga aglupos.

Dagiti material a kaasping iti kalidad ti lalat ti uleg ket mabalin a mausar iti tay-ak ti medisina, kas pagarigan, iti panagaramid kadagiti nakapet ken nakalaglagda nga artipisial nga implant. Dagiti met makinaria a pagbunag ken pagyakar (conveyor belt) nga umasping iti pakabuklan ti lalat ti uleg ket mabalin a basbassit ti kasapulanda a makadangran a grasa.

Ania ti makunam? Babaen kadi iti ebolusion a timmaud ti lalat ti uleg? Wenno nadisenio dayta?