“[Ti propeta ti Dios a ni] Daniel nakakita iti tagtagainep . . . iti pagiddaanna. Iti dayta a tiempo insuratna ti mismo a tagtagainep. Imbagana ti naan-anay a salaysay ti bambanag.”—Daniel 7:1.

TI KUNA TI BIBLIA

Nadumaduma ti pamay-an ti Dios a mangipakaammo kadagiti napateg a mensahena iti tattao. Idi panawen ti Biblia, pasaray agusar kadagiti tagtagainep. Ngem dagita ket saan a kas kadagiti gagangay a di nalawag ken di agsusurot a tagtagainep. Nalawag ken agtutunos dagiti tagtagainep manipud iti Dios ken adda espesipiko a mensaheda. Kas pagarigan, iti maysa a tagtagainep, nakita ni propeta Daniel ti agsasaruno nga atap nga animal a mangisimbolo kadagiti napolitikaan nga imperio manipud Babilonia agingga iti panawentayo. (Daniel 7:1-3, 17) Babaen iti tagtagainep, imbaga ti Dios iti pannakaama ni Jesus a ni Jose iti Nazaret nga agkamang idiay Egipto a kadua ni baketna ken ti anakda. Gapu iti dayta, naliklikan ni Jesus ti panangpatay koma kenkuana ti naulpit a ni Ari Herodes. Idi natayen ni Herodes, impakaammo dayta ti Dios ken Jose babaen iti tagtagainep ken binilinna nga agawiden a kadua ti pamiliana iti pagilianda.—Mateo 2:13-15, 19-23.

“Dikay lumbes iti bambanag a naisurat.”—1 Corinto 4:6.

TI KUNA TI BIBLIA

Dagiti tagtagainep a mabasa iti Biblia ket paset ti naisurat a pakaammo ti Dios iti sangatauan. Maipapan iti dayta, kuna ti 2 Timoteo 3:16, 17: “Amin a Kasuratan impaltiing [impaisurat] ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.”

‘Naan-anay a kabalannatayo’ ti Biblia ta ipakaammona kadatayo ti amin a masapul a maammuantayo maipapan iti Dios, dagiti galadna, pagannurotanna iti moralidad, ken ti pasettayo iti panggepna para iti daga. Saan ngaruden nga agus-usar ti Dios kadagiti tagtagainep tapno ipakaammona dagiti mensahena iti tattao. No kayattayo a maammuan ti maipapan iti masanguanan ken ti namnamaen ti Dios nga aramidentayo, masapul a ‘ditay lumbes iti bambanag a naisurat’—kayatna a sawen, dagiti naisurat iti Biblia. Dandani amin metten a tattao ket mabalinda a basaen ti linaon daytoy a libro ken adalen ti adu nga impakaammo ti Dios a pakairamanan dagiti tagtagainep.

“Dagiti tattao nagsaoda manipud iti Dios bayat nga idaldalan ida ti nasantuan nga espiritu.”—2 Pedro 1:21.

TI KUNA TI BIBLIA

Adu kadagiti tagtagainep ken sirmata a nailanad iti Biblia ket padto—kayatna a sawen, ipakaammoda dagiti mapasamak iti masanguanan. Babaen iti panangisuratda kadagita a padto, mapaneknekan a mapagtalkan ti Biblia ken dagiti nangisurat iti dayta. Adda kadi ebidensia nga umiso dagiti insuratda? Usigem ti maysa a pagarigan—ti sirmata a nadakamat iti Daniel 8:1-7, a naisurat idi agpatinggan ti Imperio ti Babilonia.

Ti padto ket nagusar iti simboliko a sasao. Dinakamatna ti maipapan iti kalakian a karnero ken iti kalakian a kalding a nangtumba ken nangpayatpayat iti karnero. Saan a kasapulan a pugtuan ni Daniel ti kayulogan ti sirmata. Impakaammo ti maysa nga anghel a mensahero ti Dios: “Ti kalakian a karnero . . . nga addaan iti dua a sara iladawanna ti ar-ari ti Media ken Persia. Ket ti kalakian a kalding a burboran iladawanna ti ari ti Grecia.” (Daniel 8:20, 21) Ti historia paneknekanna a talaga a ti Medo-Persia ti simmaruno iti Babilonia kas ti kabilgan a turay iti lubong. Agarup 200 a tawen kalpasanna, natnag ti Medo-Persia iti ima ni Alexander the Great iti Grecia. Ti kasta a nakaskasdaaw a kinaumiso ket maysa a kalidad ti padto ti Biblia, agraman dagiti tagtagainep a mangipakaammo kadagiti mapasamak iti masanguanan. Maysa laeng dayta kadagiti nakaidumaan ti Biblia iti amin a dadduma a sagrado a libro. Maikari ngarud a pagtalkantayo dayta.