Idi 2007, inyanunsio ti Ecuador dagiti planona a mangpondo iti pannakasalaknib ti agarup 10,000 a kilometro kuadrado a di pay naas-asak a naraber a kabakiran ti Amazon imbes a makali tapno pagalaan iti langis. Ngem di natuloy dagita a plano ta awan ti pinansial a suporta ti dadduma a pagilian. Dayta a paset ti naraber a kabakiran ti Amazon ti maysa kadagiti kaaduan iti nagduduma a mula ken animal iti intero a lubong.

Nagrigat a madetek ti amin a kontaminado a sampol a dara ta adda latta makalusot uray maeksamen dagita, kuna ti The Japan News. Ti report ket kasaruno ti damag nga idi 2013, adda lalaki a nasurok a 60 anyos a naakaran iti HIV gapu iti nayalison a dara. No adda HIV ti naidonar a dara, adda window period a kabayatan dayta, ti virus ket saan a madetek.

Nupay nasurok a 30 a tawenen a nalpas ti panaglalaban dagiti gerilia iti Zimbabwe iti beddengna iti Mozambique, mangbalbaldado ken mangpappapatay latta dagiti naimula a bomba sadiay. “Sipud idi 1980, nasurok a 1,500 a tattao ken 120,000 a taraken nga animal ti natay ken 2,000 a tattao ti binaldado dagiti bomba a naimula iti daga iti beddeng ti Zimbabwe,” kuna ti International Committee of the Red Cross.

Sigun iti surbey, umad-adu nga agsisina a pagassawaan ti mangilablaban iti korte no asino ti pakaipoderan dagiti tarakenda. Dagiti taraken ket sumaruno iti balay ken daga, kuarta, ken dadduma pay a personal nga alikamen kadagiti sanikuada a pagap-apaanda.