NAYANAKAK iti siudad ti Szerencs ken dimmakkelak iti bario ti Tiszaladány iti amianan a daya ti Hungary. Idi Hunio 1991, kaduak ti dadduma a gagayyemko a napan iti dimi kabesado a paset ti Tisza River. Impagarupko no adalem isu a nag-dive-ak. Anian a kamalik! Natukkol ti tallo a tulang iti tengngedko ken nadangran ti durik (spinal cord). Nakita ti maysa kadagiti gagayyemko a diak agkutkutin isu nga inin-inayadnak nga inaon sakbay pay a malmesak.

Diak naawanan iti puot isu nga ammok nga adda dakes a napasamak. Gapu ta adda immawag iti pang-emerhensia a serbisio, dimteng ti maysa a helikopter a nangitaray kaniak iti ospital. Sadiay nga inopera dagiti doktor ti durik. Idi agangay, nayakarak iti kabesera a siudad ti Budapest para iti rehabilitasion. Tallo a bulan a nakaiddaak laeng. Nupay maikutik met ti ulok, diak makakuti manipud abaga nga agpababa. Agtawenak la idi iti 20 ngem interamenten a nakadependeak iti sabsabali. Naldaangak unay nga uray la kayatkon ti matay.

Idi nakaawidakon, dimmalan iti training dagiti nagannakko tapno ammoda no kasanodak nga aywanan. Ngem narigat dayta kadakuada iti pisikal ken emosional. Kalpasan ti agarup makatawen, nadepresak. Naipasidongak iti professional counseling, a nakatulong tapno agbalbaliw ti panangmatmatko iti kinabaldadok.

Pinampanunotko metten ti maipapan iti biag. Adda kadi panggep ti biag? Apay a napasamak kaniak daytoy a trahedia? Nagbasaak kadagiti magasin ken libro tapno masarakak dagiti sungbat. Pinadasko met a basaen ti Biblia ngem narigat a maawatan isu nga insardengko. Nakisaritaak pay iti maysa a padi ngem diak napnek kadagiti imbagana.

Kalpasanna, idi 1994, dua a Saksi ni Jehova ti simmarungkar ken tatangko, ket kiniddawna a kasaritadak. Dimngegak bayat nga inlawlawagda ti panggep ti Dios a pagbalinenna ti daga a paraiso ken pukawenna ti sakit ken panagsagaba. Nagmayat a denggen ngem nagduaduaak. Kaskasdi nga inawatko ti intedda a dua a libro a katulongan iti panagadal iti Biblia. Kalpasan a nabasak dagiti libro, intukon dagiti Saksi nga iyadalandak iti Biblia ket pinatgak dayta. Pinaregtadak met nga agkararagak.

Iti panagtultuloy ti panagadalmi, nasungbatan ti Biblia ti  adu a saludsodko. Nakombinsirak met a talaga a maseknan ti Dios kaniak. Kamaudiananna, idi Septiembre 13, 1997, kalpasan ti dua a tawen a panagadalko iti Biblia, nabautisaranak iti bathtub ti balaymi. Daydi ti maysa kadagiti kararagsakan nga aldaw iti biagko.

Idi 2007, immakarak idiay Budapest tapno permanenten nga agyanak iti pagtaengan para kadagiti baldado. Gapu iti dayta, naaddaanak iti adu a gundaway a mangiranud kadagiti nagsayaat a maad-adalko. No mayat ti paniempo, makaruarak pay ketdi tapno makisarita kadagiti tattao. Imbag laengen ta addaanak iti nairanta kadagiti kas kaniak a motorized wheelchair a maimaniobrak babaen iti timidko.

Gapu iti pinansial a tulong ti maysa a pamilia a karelihionak, nakagatangak iti laptop computer a mausarko babaen iti panaggaraw ti ulok. Matulongannak daytoy a mangtelepono kadagiti tattao babaen iti Internet ken agaramid kadagiti surat para kadagidiay saan a madanon dagiti karelihionak no mangasabada. Dayta ti nangpasayaat iti abilidadko a makisarita ken nakatulong tapno diak unay sangkapanunot ti bagik.

Makatabunoak pay ketdi kadagiti Nakristianuan a gimong. No sumangpetak idiay Kingdom Hall, siaannad a bagkatendak a naka-wheelchair dagiti karelihionak tapno mayulidak iti pakaangayan ti gimong. Bayat dagiti gimong, no maawis nga agkomento dagiti tumabuno, itayag ti kaabayko ti imana para kaniak. Kalpasanna, iggamanna ti Bibliak wenno ti maadal a publikasion bayat nga agkomentoak.

Kanayon nga adda mariknak nga ut-ot ken agpampannurayak iti sabsabali iti dandani amin nga aramidek. Gapu iti dayta, pasaray madepresak latta. Ngem mailiwliwagko ti riknak agsipud ta gayyemko ni Jehova a Dios ken ammok a denggennak no ibagak kenkuana ti amin a problemak. Mapabpabilegak met babaen iti inaldaw a panagbasak iti Biblia ken pammaregta dagiti kapammatiak. Ti pannakigayyem, panangliwliwa, ken panangikararagda kaniak ket nakatulong tapno agbalinak a balanse ken positibo.

Liniwliwanak ni Jehova idi kasapulak unay dayta. Impaayannak met iti namnama a maaddaanto iti perpekto a salun-at idiay baro a lubong. Segseggaak unayen ti tiempo inton ‘makapagna ken makalagtoakon tapno maidaydayawko’ ti Dios gapu iti naisangsangayan nga ayat ken kinaimbagna.—Aramid 3:6-9.