TI KUNA TI DADDUMA

Tapno saanka a masesante, masapul a ti trabahom ti kapatgan kenka. Gapu iti dayta a kapanunotan, impalubos ti dadduma a ti trabahoda ti mangibus iti tiempoda nga uray la nabaybay-andan ti pamilia ken salun-atda.

TI KUNA TI BIBLIA

Ibaga ti Biblia nga agbalintay koma a balanse no maipapan iti panagtrabaho. Padayawanna ti nagaget ken kritikarenna ti nasadut. (Proverbio 6:6-11; 13:4) Ngem saan met nga iparparegta ti Biblia nga agbalintayo a workaholic wenno trabaho lattan a trabaho. Irekomendana ketdi nga adda koma kalkalainganna a panagrelakstayo. Kuna ti Eclesiastes 4:6: “Nasaysayaat ti sangarakem nga inana ngem iti dua a rakem a napinget a panagtrabaho ken panangkamkamat iti angin.” Saan koma ngarud a ti trabaho ti mangibus iti orastayo, a mabaybay-antayon ti pamilia ken salun-attayo. Awan ti maganabtayo iti nalabes a panagtrabaho!

“Awanen ti nasaysayaat nga aramiden ti maysa a tao no di mangan ken uminum ket nanamenna ti nagbambannoganna.”—Eclesiastes 2:24, Ti Baro a Naimbag a Damag Biblia.

TI KUNA TI DADDUMA

Awatem ti trabaho no dakkel ti sueldo. Gapu iti dayta a kapanunotan ken ti makapaengganio nga awis ti alisto a panguartaan, dadduma ti agkusit iti negosio ken agtrabaho iti illegal.

Gapu ta kanayon a maibagbaga a ‘gaw-atem ti arapaapmo’ ken ‘aramidem no ania ti hiligmo,’ awaten laeng ti dadduma dagiti trabaho a pagaayatda. No ti trabahoda ket saan nga isu ti inarapaapda, wenno panagkunada nga awan rigrigatna, ibilangda dayta a boring. Kas resultana, nababa ti panagkitada iti trabahoda ket saanda a gagetan ti agtrabaho. Mabalin a saanda pay nga awaten uray dagiti nasayaat a trabaho gapu ta iti panagriknada, mangipababa dayta iti dignidadda.

TI KUNA TI BIBLIA

Iparit ti Biblia ti trabaho nga adda kinakusitna wenno pagdaksan ti sabsabali. (Levitico 19:11, 13; Roma 13:10) Ngem no pagimbagan dayta ti sabsabali ken makatulong iti agtrabtrabaho tapno mataginayonna ti “naimbag a konsiensia,” maibilang dayta a nasayaat a trabaho.—1 Pedro 3:16.

Isursuro met ti Biblia nga adda nasayaat a panggep ti panagtrabaho—saan laeng a tapno maparagsakmo ti bagim no di ket tapno adda pangsuportam iti bagim ken iti pamiliam. Ngem nupay nasayaat a tagiragsaken ti trabaho, saan koma a dayta ti agbalin a kapatgan iti biagmo.

Agpayso, no bigla a ngumina dagiti gagatangen, mabalin a madanagantayo no kasanotayo a magatang dagiti kasapulantayo, ngem iyunay-unay ti Biblia ti kinabalanse. Kunana: “No adda pagtaraon ken pagkawestayo, mapnektayon kadagitoy a banag.” (1 Timoteo 6:8) Ngem dina met kayat a sawen nga imutantayo ti bagitayo. Masapul laeng nga agbalintayo a realistiko no ania ti kabaelantayo a gatangen ken saantayo a gatang lattan a gatang kadagiti saantayo met a kasapulan.—Lucas 12:15.

TI KAIPAPANANNA KENKA

Aggaggagetka iti trabahom. Ipategmo dayta. Uray no kasla nababa wenno saan nga isu ti trabaho nga inar-arapaapmo, ikagumaam ti agbalin a nalaing iti dayta. Mariknam nga adda magapgapuanam no nagagetka, ken ad-adda a maragsakanka no mapasayaatmo ti abilidadmo iti trabahom.

Nupay kasta, agbalinka a balanse. Aginana ken agrelakska met sagpaminsan. Ket no ginagetam ti nagtrabaho, naragragsak pay ti agrelaks. Ken gapu ta naitrabahuantayo dagiti kasapulantayo, mariknatayo nga adda serbitayo ken raemendatayo ti sabsabali—agraman ti pamiliatayo.—2 Tesalonica 3:12.

“Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ . . . Ammo ti nailangitan nga Amayo nga amin dagitoy a banag ket kasapulanyo.”—Mateo 6:31, 32.