IDI 2010, nasurok a 800 a milion a litro ti langis ti nagwaras iti Gulf of Mexico idi bimtak ken limned ti maysa a drilling rig (dakkel nga estruktura a pagkunnot iti langis iti lansad ti baybay). Ngem kalpasan ti sumagmamano a bulan, awanen ti kaaduan a kontaminasion. Apay ngata?

Usigem: Sigun kadagiti panagadal iti siensia, adda dagiti bakteria iti taaw a makabael a mamagsisina kadagiti atiddog ken agsisilpo a carbon molecules iti langis. Ti environmental microbiologist a ni Professor Terry Hazen inawaganna dagita a bakteria kas “dagiti missile a mangpumpuntiria iti langis.” Adda naitulong dagita iti pannakadalus ti Gulf of Mexico, kas naibaga iti rugi daytoy nga artikulo.

“Saan a nakaskasdaaw a ti taaw ket aduan iti mikrobio a mabisin iti langis,” kuna ti report ti BBC. Ngamin, minilionen a tawen a “mangiruruar iti langis dagiti babassit nga abut iti lansad ti taaw.”

Adda met ketdi nagapuanan ti tao iti panagporsegida a mangdalus iti naiwaras a langis. Ngem uray ti kasayaatan a pamay-anda ket mabalin nga ad-adu ti pagdaksanna ngem iti pagsayaatan. Dagiti kemikal a mayisprey a pangwarawara iti langis lapdanda dagiti natural a proseso a mangrunaw iti langis. Makasabidong met dagita a kemikal ken agpaut dagiti makadadael nga epektoda iti aglawlaw. Ngem ti abilidad ti nakaparsuaan a mangrunaw iti langis ken dagiti “mikrobio a mabisin iti langis,” ket makatulong iti baybay tapno isu a mismo ti mangdalus iti bagina nga awan dagiti dakes nga epektona a kas kadagiti maited ti artipisial a pamay-an. *

Ania ti makunam? Basta latta kadin timmaud dagiti bakteria a mangmangan iti langis? Wenno adda nangdisenio kadagita?