TI KUNA TI DADDUMA

Adu ti mamati a kinabaknang laeng ti makaited iti ragsak ken pannakapnek, ken no adu ti kuartam, makuna a naballigika. Manamnama a saan a maaddaan iti naragsak ken makapnek a biag dagiti di makalunglung-aw iti rigat gapu ta saanda a makapageskuela iti elementaria wenno haiskul, manmano wenno saanda a makapagpadoktor, ken bassit wenno awan benepisio a maaw-awatda.

TI KUNA TI BIBLIA

Isursuro ti Biblia nga agdepende ti pudpudno a ragsak ti maysa a tao iti relasionna iti Dios, saan nga iti kinabaknangna. Kuna ti Biblia: “Naragsak dagidiay sipapanunot iti naespirituan a kasapulanda.” (Mateo 5:3) Baknang man wenno saan, no sipapanunot ti maysa iti naespirituan a kasapulanna, matignay a mangammo iti kapanunotan ti Dios kadagiti bambanag. Isu a masursurona dagiti kinapudno iti Biblia a makaited iti pudpudno a liwliwa ken talna iti isip. Dayta ti mangted iti pudpudno a kinaragsak.

Dagidiay makatarus ken mangsursurot iti balakad ti Biblia ket mas nakasagana a mangsango iti kinarigat ti biag. Kas pagarigan, makatulong ti balakad ti Biblia tapno maliklikan dagiti makadangran a bisio, kas iti panagsigarilio ken panagbartek. Masayang laeng ti kuarta kadagitoy a bisio ken posible a pakaigapuan iti nangina a panagpaagas.—Proverbio 20:1; 2 Corinto 7:1.

Mamakdaar met ti Biblia maipapan kadagiti makadadael nga epekto ti kinaagum ken materialismo. (Marcos 4:19; Efeso 5:3) Makatulong dayta a balakad tapno maliklikan a masayang ti kuarta iti sugal wenno maliklikan a tumanor ti “ayat iti kuarta,” nga ibaga ti Biblia kas ti “ramut ti amin a kita ti kinadakes.” (1 Timoteo 6:10) Impakdaar ti Biblia: “Ti pudno a biag ti tao saan a maibatay iti sanikua, uray no kasano ti kinabaknangna.” (Lucas 12:15, Ti Baro a Naimbag a Damag Biblia) Iti sabali a pannao, uray kasano kaadu ti kuarta ti maysa, dina magatang ti biag. Ngem no agbiag a maitunos iti rasonable a balakad ti Biblia, agbalin a pudpudno a naragsak ken makapnek ti biagna.

Mabalin nga ikarkarigatan dagiti napanglaw ti maaddaan iti taraon, bado ken pagyanan. Ngem mabalin a makariknada latta iti pudpudno a kinaragsak no sursuruenda ti agbalin a kontento, usarenda ti biagda a mangparagsak iti Namarsua, ken agbiagda maitunos iti pagayatanna. Bigbigenda a pudno ti kari ti Biblia a ‘ti bendision ni Jehova isu ti mangpabaknang, ket awan rigat nga inayonna iti dayta.’—Proverbio 10:22.

MAKATULONG A TEKSTO: “Naragsak dagidiay sipapanunot iti naespirituan a kasapulanda.”—Mateo 5:3.

TI KUNA TI BIBLIA

Uray saan a nagballigi ti panangikagumaan dagiti tattao a mangsolusion iti kinapanglaw, iti naikeddeng a tiempo, pukawento ti Dios ti ramut dayta a problema—ti tendensia dagiti naagum a tattao ken gobierno a mangipangpangruna iti bukodda laeng a pagsayaatan. (Eclesiastes 8:9) Suktanto ti Namarsua dagiti natauan a gobierno nga iturturayan dagiti tattao a ti la bagida ti pampanunotenda. Aglaplapusanan ken patasto nga ited ti Pagarianna, wenno ti nailangitan a gobierno, ti kasapulan ti amin nga agnanaed iti daga. Nalawag ti kari ti Biblia a sidudungngo nga ipaayto ti Ari ti Pagarian ti Dios ti kasapulan dagiti napanglaw. ‘Ispalennanto daydiay napanglaw nga agpatpatulong. Maasianto iti daydiay nanumo ken napanglaw, ket dagidiay napanglaw isalakannanto.’—Salmo 72:12-14.

Agbalinto ti daga a paraiso nga addaan iti balbalay ken taraon para iti amin, ken awanton a pulos pakailasinan ti kinapanglaw. Iti libro ti Biblia nga Isaias, inkari ti Dios kadagiti adipenna a “mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. . . . Ti aramid dagiti bukodda nga ima usarento a naan-anay dagidiay pinilik.” (Isaias 65: 21, 22) Awanton ti agpakarigat a mangyan-anay iti bassit a pagbiagda ta tagiragsakenton ti amin ti “maysa a bangkete dagiti nataba [wenno adu] unay a putahe” ken dadduma pay a naimbag a bambanag nga ited ni Jehova.—Isaias 25:6.

APAY A RUMBENG A PANUNOTEM?

No pampanunotem ti kari ti Dios nga awanton ti napanglaw ditoy lubong, maipasigurado kenka nga ipatpateg ti Dios dagidiay nakakaasi ti biagna ken asidegen nga agpatingga ti panagrigrigatda. No ipamaysam ti panunotmo iti dayta a namnama, maaddaanka iti pigsa a mangibtur kadagiti narigat a kasasaad ita.

MAKATULONG A TEKSTO: ‘Ispalennanto daydiay napanglaw nga agpatpatulong. Maasianto iti daydiay nanumo ken napanglaw, ket dagidiay napanglaw isalakannanto.’—Salmo 72:12, 13.