Nagyan ti pamiliami idiay Tellancourt a purok iti amianan a daya ti France. French ni Tatang, ken Italian met ni Nanang. Idi walo ti tawenko, immakarkami iti napanglaw a lugar iti siudad ti Rome, Italy. Nagulo ti pamiliami. Nakaro ti panagap-apa dagiti nagannakko gapu iti problema iti kuarta.

Idi agtawenakon iti 15, binagbagaannak ni nanangko a rummuarak met iti balay ket makigayyemak. Isu a nasursurok ti pumanaw iti balaymi agingga a mabayagen a diak agaw-awid. Idi kuan, naibarkadaak kadagiti dakes a tattao. Maysa nga aldaw, adda lalaki nga immasideg kaniak a kasla nasingpet met. Inikkannak iti droga, ket inawatko ta kayatko nga ipakita a saanakon nga ubing. Alistoak a nailumlom iti lubong ti droga ken immoralidad. Namin-adu a seksual a naabusoak. Saanen nga importante ti biag kaniak ket awanen ti bibiangko uray matayak. Pirmi ti lidayko. Idi 16 anyosak, pinadasko ti agpakamatay. Imminumak iti sangabote nga arak sa timpuakak iti maysa a dan-aw (lake). Kas resultana, tallo nga aldawak a na-comatose.

Sipud idin, naamirisko a napateg ti biag. Ngem nagbalinak latta a bayolente ken manangloko. Awisek dagiti tattao a makiseks kaniak, iyopreserak ida iti droga iti balayda, sa takawak ida. Us-usarendak dagiti dadakkel a sindikato nga aglako ken agipuslit iti droga iti Italy. Kanayon a problemadak dagiti polis. Kasla awanen serserbi ti biagko ken diakon maurnos. Ngem patiek nga adda rason nga agbibiagak. Nagkararagak iti Dios ket indawatko nga ikkannak uray makatawen laeng a talna ken kinaragsak.

Idi 24 ti tawenko, immakarak ditoy England. Gapu iti pannakipagtrabahok kadagiti aglaklako iti droga, agpelpeligro ti biagko. Sakbay a pimmanawak, binisitak ni nanangko ket nakigtotak idi nakitak a kaskasabaan isuna ti maysa a lalaki a ni Annunziato Lugarà. * Gapu ta ammok a dati a kriminal daytoy a lalaki, nabutnganak ket dinamagko kenkuana no apay nga adda idiay. Inestoriana ti dakkel a panagbalbaliw nga inaramidna iti biagna tapno agbalin a Saksi ni Jehova, ken pinagkarinak a makisaritaakto kadagiti Saksi inton  makadanonak ditoy England. Nagkariak met. Ngem idi nakadanonakon ditoy, sinubliak a dagus ti dati a kabibiagko.

Maysa nga aldaw, adda nakasaritak a Saksi a mangmangted iti magasin a Pagwanawanan ken Agriingkayo! iti maysa a natao a kalsada iti London. Nalagipko ti karik ken ni Annunziato isu a dinamagko iti Saksi no mabalinko ti agpayadal iti Biblia.

Nasdaawak kadagiti naadalko iti Biblia. Kas pagarigan, natignay ti pusok iti kuna ti 1 Juan 1:9: “No ipudnotayo dagiti basoltayo, isu matalek ken nalinteg tapno pakawanennatayo kadagiti basoltayo ken tapno dalusannatayo manipud iti isuamin a kinakillo.” Nagdakkel ti epektona kaniak dayta ta panagriknak, nakarugrugitak gapu iti kabibiagko. Dagus nga inrugik ti makigimong iti Kingdom Hall dagiti Saksi ni Jehova. Nabara ti panangawat kaniak dagiti Saksi. Idi nakitak ti nadekket a panaggagayyemda—banag a nabayagen a sapsapulek—kayatko met ti agbalin a miembro ti kasla pamilia a kongregasionda.

Uray saanak unay a narigatan a mangisardeng iti panagdrogak ken iti immoral a panagbiagko, narigatanak a mangpasayaat iti kababalinko. Napanunotko a masapul a pasayaatek pay ti panangtratok kadagiti tattao, respetuek ida, ken agbalinak a nakonkonsiderar. Kinapudnona, adda latta dagiti lablabanak a madi nga ugalik. Ngem iti tulong ni Apo Jehova, adda metten dagiti panagbalbaliw a naaramidak. Kalpasan ti innem a bulan a panagadalko iti Biblia, nabautisaranak kas Saksi ni Jehova idi 1997.

Kalpasan ti panagbautisarko, nagkasarkami ken Barbara a nabiit pay met idi a nabautisaran a Saksi ni Jehova. Idi nakita ti maysa a nabayagen a gayyemko a nagdakkel ti nagbalbaliwak, nagadal met iti Biblia. Idi agangay, nagbalin a Saksi, ken uray ni manangna. Ti kabsat ni lolak, nga agtawen iti nasurok a 80, ket nagadal met iti Biblia ken nabautisaran sakbay a natay.

Maysaak itan a panglakayen (mangidadaulo) iti kongregasionmi ken agserserbikami ken baketko kas full-time a ministro. Tultulonganmi dagiti tattao nga agsasao iti Italian ditoy London tapno maawatanda ti Biblia. No dadduma, malidayanak latta gapu iti dati a kabibiagko, ngem nagdakkel a tulong ni Barbara kaniak. Ita, adda met laengen natalna a pamiliak a nabayagen nga il-iliwek, ken addan naayat nga Amak a nabayagen a sapsapulek. Indawatko iti Dios nga ikkannak iti makatawen a talna ken kinaragsak, ngem ad-adu nga amang ti intedna kaniak!