Ni Delphine, ti ina a nadakamat iti maikadua nga artikulo, nariknana a dagiti pakadanaganna ti mangidurduron kenkuana nga aginum iti adu. Saan nga iparit ti Biblia ti kalkalainganna a panaginum iti arak, ngem ibagana: “Dika makikadua kadagiti nakaro ti panagin-inumna iti arak.” (Proverbio 23:20) Naipagarup nga adda koneksion ti nalabes a panaginum iti arak kadagiti nakaro a sakit, nadadael a relasion, ken ti nasapa nga ipapatay ti minilion iti kada tawen. Maliklikan koma dagitoy no suroten dagiti tattao ti balakad ti Biblia.

Kasta ti inaramid ni Delphine. Kunana itan: “Nabigbigko a saan a masolbar ti arak dagiti pakadanagak. Sinurotko ti kuna ti Filipos 4:6, 7: ‘Dikay maringgoran iti aniaman, no di ket . . . maipakaammo koma dagiti dawatyo iti Dios.’ Iti rabii a nariribuk ti panunotko, agpatulongak ken Jehova. Ibukbukko ti amin a marikriknak, agraman pungtot, sakit ti nakem, ken pannakapaayko, ken agpakaasiak a tulongannak nga agbalin a positibo. Kabigatanna, siguraduek nga awanen dagita a marikriknak. Ti panagkarkararag ti nakatulong tapno agpokusak iti adda kaniak, saan nga iti awan. Nagdesisionak a saanakon a pulos aginum iti arak. Nakapatpateg ti talna nga adda kaniak itan, ket diak kayat a mapukaw dayta.”

Ti immoralidad ti maysa kadagiti pakaigapuan ti nakaro a ladingit ken pannakasugat ti puso. Ngem makatulong dagiti prinsipio ti Biblia tapno maliklikantayo dagiti kangrunaan a makagapu iti immoralidad—kas iti panag-flirt wenno ti ang-angaw a panangipakita iti romantiko nga interes ken ti pornograpia. Kuna ti agtutubo a ni Samuel: “Naglaka ti ag-flirt. Uray no saanko met idi a kursonada ti balasang, no mariknak a kayatnak, maawisak nga ag-flirt.” Gapu ta kanayon a maibagbaga idi nga isu ket flirt uray saanna nga igaggagara, impaypaysonan dayta. Ngem nariribukan. Kunana itan: “Nagdakes ti epekto dayta ta nairuamak idin a bagik laeng ti pampanunotek.”

Nabasa ni Samuel ti maysa nga artikulo iti website a jw.org para kadagiti agtutubo. Pinampanunotna ti kuna ti Proverbio 20:11: “Babaen a mismo iti ar-aramidna ipabigbig ti maysa nga ubing ti bagina no ti aramidna nasin-aw ken nalinteg.” Kasano a nakatulong dayta? Nakitana a saan a nasin-aw ken saan a nalinteg ti panag-flirt. Imbagana: “Naawatak a no flirt ti maysa nga agtutubo, in-inutto a maaddaan kadagiti ugali a mamagbalin kenkuana a saan a nasayaat nga asawa. Pinampanunotko ti reaksion ti agbalinto nga asawak no makitanak a mangipakpakita iti romantiko nga interes iti sabali a babai. Isu a nabigbigko a serioso dayta a banag. Saan a gapu ta nalaka nga aramiden, umiso daytan.” Nagbalbaliw ni Samuel, isu a naliklikanna ti immoralidad.

Nakarkaro pay ti situasion ni Antonio. Dandani idin matnag iti silo ti immoralidad ta naadikto iti pornograpia. Uray adda asawanan nga ay-ayatenna, saanna latta idi a maisardeng ti agbuya. Nakatulong ti panangpanunotna iti 1 Pedro 5:8: “Agtalinaedkayo a sipupuot, managbantaykayo koma. Ti kabusoryo, ti Diablo, agsursursor a kasla leon a ngumerngernger, nga agsapsapul iti alun-onenna.” Imbaga ni Antonio: “Dandani makita iti amin a lugar dagiti pornograpiko a ladawan, ket mabalin a maimulada iti panunottayo. Impalagip kaniak dayta a bersikulo ti naggapuan dagita a sulisog. Masapul a sanayek ti bagik tapno dagus a malagipko a naggapu iti Diablo dagita. Ammok itan a ni laeng Jehova ti makatulong tapno ‘agtalinaedak a sipupuot ken nakabantay’ ket malabanak dagiti mangdadael iti panunot, puso, ken panagasawak.” Inawat ni Antonio ti tulong ket naisardengna met laeng ti dakes nga aramidna. Gapu iti dayta, nalisianna ti nakarkaro pay a problema.

Nalawag a makatulong ti balakad ti Biblia tapno maliklikan ti nakaro a problema. Ngem kasano ngay no nairamuten ken kasla agtultuloy ti problema? Kitaentayo no kasano a makatulong ti Sao ti Dios.