Rinibu a tawenen nga awan ti makaammo iti sungbat dayta a saludsod. Minilion a tao ti natay gapu kadagiti epidemia. Idi agangay, naammuan dagiti sientista ti kinapudno. Nadiskobreda a dagiti sakit ket masansan a gapu kadagiti mikrobio, kas iti bakteria wenno virus. Dayta a nadiskobre a kinapudno ti nakatulong kadagiti tattao tapno maliklikan ken maagasan ti adu a sakit isu nga at-atiddog ken nasalsalun-at ti biag ti binilion a tattao ita.

Komusta ngay ti dadduma a napapateg a saludsod? Ania ngata ti epektona kenka dagiti mabirokam a kinapudno maipapan kadagitoy a saludsod?

• Asino ti Dios?

• Asino ni Jesu-Kristo?

• Ania ti Pagarian ti Dios?

• Ania ti mapasamak iti masanguanan?

Nabirokanen ti minilion a tattao dagiti sungbat kadagita a saludsod ket simmayaaten ti biagda. Makatulong met kenka ti sungbat dagita.

Mabalin a mapanunotmo, ‘Posible kadi a mabirokak ti kinapudno maipapan iti amin a banag?’ Kasla rumigrigat nga ammuen ti kinapudno maipapan iti adu a banag. Apay?

Saan nga agtalek ti adu a tattao a pudno ti ibagbaga dagiti gobierno, negosiante, wenno ti media. Marigatanda a mangilasin no pudno ti ibagbaga ti dadduma wenno no dagita ket opinion, kurang nga impormasion, wenno kinaulbod. Gapu ta awanen ti panagtalek dagiti tattao ken gagangayen ti peke nga impormasion, agduduma ti pannakaawatda kadagiti impormasion ken uray iti mismo a kaipapanan ti kinapudno.

Nupay kasta, posible latta a mabirokan dagiti pudno a sungbat kadagiti napapateg a saludsod iti biag. Kasano? Babaen ti panangsurotmo iti dadduma nga ar-aramidem a mangbirok iti sungbat kadagiti di unay napateg a banag.

Iti inaldaw, ikagkagumaam a biroken ti kinapudno. Kitaem ti situasion ni Jessica. Kunana: “Nagkaro ti allergy ti anakko iti mani. Uray bassit laeng a protina ti mani, mabalin a pakatayanna.” No gumatang ni Jessica iti makan, siguraduenna a natalged a kanen ti anakna. “Ti umuna nga aramidek ket basaek a naimbag dagiti ingrediente ti produktoda, saak ag-research ken tawagak ti nangaramid iti produkto tapno siguraduek nga awan ti nailaok uray bassit laeng a protina ti mani. Basaek met ti dadduma pay a mapagtalkan nga impormasion tapno masiguradok a ti kompania dayta a produkto ket natalged ti panangisaganana iti makan.”

Ti inaldaw a panagbirokmo iti kinapudno ket mabalin a saan a kas ken Jessica ti kaseriosona. Ngem kas ken Jessica, mabalin nga us-usarem dagitoy a pamay-an a mangbirok iti sungbat kadagiti saludsodmo:

• Ammuem ti kinapudno.

• Ag-research-ka.

• Siguraduem a mapagtalkan dagiti impormasion.

Dagita ti tumulong met kenka a mangbirok iti sungbat kadagiti napapateg a saludsod iti biag. Kasano?

Idi agbirbirok ni Jessica iti kinapudno iti Biblia, inusarna ti isu met la a pamay-an nga us-usarenna ita nga ag-research maipapan kadagiti makan nga allergic ti anakna. Kunana: “Nakatulong ti panagbasak ken panag-research-ko a naimbag tapno mabirokak ti kinapudno iti Biblia.” Kas ken Jessica, nabirokanen ti minilion a tattao ti sungbat ti Biblia kadagitoy:

• Apay nga addatayo?

• Ania ti mapasamak no mataytayo?

• Apay nga agrigrigattayo?

• Ania ti ar-aramiden ti Dios tapno agpatingga ti amin a panagrigrigat?

• Kasano nga agbalin a naragsak ti pamiliatayo?

Mabirokam dagiti pudno a sungbat dagitoy ken ti dadduma pay a saludsod no basaem ti Biblia ken ag-research-ka online iti www.pr418.com/ilo.