Para kada María, Raúl, Arne, ken iti dadduma pay, ti kararag ket espesial a regalo. Para kadakuada, no agkararagda makasaritada ti Dios, makapagyamanda kenkuana, ken makapagpatulongda. Kombinsidoda nga agpayso ti ibagbaga ti Biblia maipapan iti panagkararag iti Dios: “Agtalektayo kenkuana, nga uray ania ti dawatentayo maitunos iti pagayatanna, denggennatayo.”—1 Juan 5:14.

Iti sabali a bangir, adu ti saan a mamati iti ibagbaga ti Biblia maipapan iti kararag. Imbaga ni Steve maipapan iti kararag: “Idi 17 ti tawenko, natay ti tallo kadagiti gagayyemko iti aksidente. Maysa ti natay iti aksidente iti lugan, ken ti dua ket nalmes iti baybay.” Ania ti inaramid ni Steve? “Inkararagko iti Dios no apay a napasamak dagita, ngem saannak a sinungbatan, isu nga apay koma nga  agkararagak pay.” Gapu kadagiti kasla saan a masungsungbatan a kararag, adu dagiti mangpampanunot no adda met la serserbi ti panagkararag.

Adda pay sabali a rason no apay a pagduaduaan dagiti tattao ti kararag. Kuna ti dadduma nga ammo ti Dios ti amin a banag, ammona dagiti kasapulan ken problematayo, isu nga apay pay laeng nga ibagatayo dagita kenkuana.

Adda met dagiti mamati a saan a kayat a denggen ti Dios dagiti kararagda gapu kadagiti kamali a naaramidda iti napalabas. Kuna ni Jenny: “Ti kadakkelan a problemak ket panagriknak awan ti serserbik. Adda dagiti naaramidko a pagbabbabawyak, isu nga ibagbagak iti bagik a saannak met la a denggen ti Dios no agkararagak.”

Sika ngay, ania ti makunam? No adda met panagduaduam maipapan iti kararag, maliwliwaka la ketdi a makaammo nga adda makapnek a sungbat ti Biblia kadagita. Mapagtalkantayo ti kuna ti Biblia maipapan iti kararag; * masungbatanna dagiti saludsod a kas iti:

• Talaga kadi a dengdenggen ti Dios dagiti kararagtayo?

• Apay a saan a masungsungbatan ti dadduma a kararag?

• Kasanoka nga agkararag tapno denggennaka ti Dios?

• Ania ti maitulong kenka ti kararag?