Mabalin a mariknatayo a kasla awan ti maaramidantayo a tumulong iti gayyemtayo nga addaan iti problema iti mental a salun-at. Ngem maipakitatayo nga ipatpategtayo ti gayyemtayo no tulongantayo isuna a manglaban iti nagrigat a sakitna. Kasano?

‘Alistoka a dumngeg.’—SANTIAGO 1:19.

Maysa kadagiti kasayaatan a pamay-an a matulongam ti gayyemmo ket ti panangdengngeg kenkuana no kayatna ti makisarita. Saanmo a kasapulan a sungbatan ti amin nga ibagana. Ipakitam a dumdumngegka ken makipagriknaka. Ikagumaam a tarusan ti marikriknana ken dimo husgaran wenno kritikaren. Laglagipem a mabalin a makaibaga kadagiti saanna a napagpanunotan a sasao a pagbabawyannanto met laeng.—Job 6:2, 3.

‘Liwliwaem dagiti malidliday.’—1 TESALONICA 5:14.

Mabalin a madandanagan ti gayyemmo, wenno lablabananna ti riknana a kasla awan serserbina. No ipasiguradom a napateg isuna, agbalinka a makaliwliwa ken makaparegta uray no dimo ammo ti eksakto nga ibagam.

“Ti pudno a gayyem agayat iti amin a tiempo.”—PROVERBIO 17:17.

Mangtedka iti praktikal a tulong. Imbes nga ipapanmo nga ammomon ti maitulongmo, damagem ketdi no ania ti mabalinmo nga aramiden para kenkuana. No marigatan ti gayyemmo a mangibaga no ania ti kasapulanna, mangtedka iti praktikal  a suhestion a mabalinyo nga aramiden a dua, kas iti panagpagnapagna. Wenno mabalinmo a kaduaan nga ag-shopping, agdalus, wenno aramiden ti dadduma pay a trabaho.—Galacia 6:2.

‘Agbalinka a naanus.’—1 TESALONICA 5:14.

Mabalin nga adda tiempo a di kayat ti gayyemmo ti makisarita. Ipasiguradom a nakasaganaka a dumngeg no kayatnanton ti makitungtong. Gapu iti sakitna, mabalin a makaibaga wenno makaaramid ti gayyemmo iti banag a pakasaktam. Mabalin nga ibabawina dagiti naiplanoyon nga aramiden wenno alisto nga agbaliw ti mood-na. Agbalinka a naanus ken mannakaawat bayat a tultulongam isuna.—Proverbio 18:24.

“Ipaspasiguradok a kanayonak a nakasagana a tumulong kenkuana. Uray no diak masolbar dagiti problemana, ikagkagumaak a denggen dagiti ibagbagana. No dadduma, kasapulanna laeng nga adda dumngeg kenkuana tapno sumayaat ti riknana.”—Farrah, a adda gayyemna nga addaan iti eating ken anxiety disorder ken clinical depression.

“Adda gayyemko a nakasingsingpet ken nakapospositibo. Inawisnak a mapan mangan idiay balayda. Gapu ta nakaay-ayat, saanak a narigatan a nangibaga iti rikriknak. Talaga a naparegtaak!”—Ha-eun, addaan iti clinical depression.

“Nakapatpateg ti kinaanus. No masuronak iti inaramid ni baketko, ipalagipko iti bagik a gapu dayta iti sakitna, saan a gapu ta talaga a kasdiay isuna. Makatulong dayta tapno saanak a makaunget ken tapno agbalinak a mas nakonsiderar.”—Jacob, adda clinical depression ti asawana.

“Nagdakkel ti mait-ited ni baketko a liwliwa ken suporta kaniak. No kasta unayen ti panagdanagko, saannak a piliten a mangaramid iti aniaman a diak kayat nga aramiden. Isu a no dadduma, saanna a maaramid dagiti pagay-ayatna nga aramiden. Awan ti makunak iti kinamanagsakripisio ken kinaparaburna.”—Enrico, addaan iti anxiety disorder.