Ti Masapul a Piliem
Dagiti pilientayo a pagibasaran iti umiso ken di umiso ket dakkel ti epektona iti pagbanagan ti biagtayo. Ammo ni Jehova a Dios dayta. Isu a kayatna nga agbiagtayo maitunos kadagiti ibagbagana nga umiso ken di umiso.
Kayat ni Jehova a natalna ken naragsak ti biagtayo.
“Siak, ni Jehova a Diosyo, Daydiay mangisursuro kadakayo tapno magunggonaankayo, Daydiay mangiturturong iti dalan a rumbeng a pagnaanyo. No laeng koma tungpalenyo dagiti bilinko! Iti kasta, agbalin ti talnayo a kas iti karayan, ken ti kinalintegyo a kas kadagiti dalluyon ti baybay.”—Isaias 48:17, 18.
Kas Namarsua kadatayo, ammo ti Dios no kasano ti kasayaatan a panagbiagtayo. Kayatna a surotentayo dagiti ibilbilinna ta pagsayaatantayo dagita. No agtulnogtayo kadagiti bilinna, saantayo nga agduadua no nasayaatto met laeng ti resulta dagiti desisiontayo. Kanayonto a masiguradotayo nga umiso ti desisiontayo. Natalna ken naragsakto ti biagtayo.
Saan nga ipaaramid ni Jehova ti saantayo a kaya.
“Saan a narigat ken kabaelanyo a tungpalen daytoy a bilin nga itedko ita kadakayo.”—Deuteronomio 30:11.
Mabalin a kasapulan a balbaliwantayo ti panagpampanunot ken ar-aramidentayo no kayattayo ti agbiag maitunos kadagiti ibagbaga ti Dios nga umiso ken di umiso. Ngem saan a narigat ti kidkiddawen ni Jehova kadatayo. Ngamin, kas Namarsua kadatayo, ammona no ania ti kayatayo. Bayat nga umad-adu ti maammuantayo maipapan ken Jehova, mapaneknekantayto a “saan a makapadagsen dagiti bilinna.”—1 Juan 5:3.
Ikarkari ni Jehova a tulonganna dagidiay pilienda ti agbiag maitunos kadagiti ibagbagana nga umiso ken di umiso.
“Siak, ni Jehova a Diosmo, ig-iggamak ti kannawan nga imam, Daydiay mangibagbaga kenka, ‘Dika agbuteng. Tulongankanto.’”—Isaias 41:13.
Iti tulong ti Dios, kayatayo nga aramiden dagiti ibagbagana nga umiso ken liklikan dagiti ibagbagana a di umiso. Us-usarenna ti Biblia a Saona a mangpapigsa iti pakinakemtayo a mangaramid iti ipapaaramidna ken tapno maaddaantayo iti namnama.
Minilionen iti intero a lubong ti simmayaat ti biagda gapu ta sinurotda dagiti ibagbaga ti Biblia. Kayatmi a maammuam ti ad-adu pay a nagsasayaat a pammagbaga manipud iti Biblia. Makatulong ti panagadalmo iti naibatay iti Biblia a broshur nga Agbiagka a Naragsak iti Agnanayon! Libre a mai-download dayta iti jw.org/ilo. Dagitoy ti dadduma a leksion a linaonna:
-
Kasano a Matulongannaka ti Biblia?
-
Mangted ti Biblia iti Namnama
-
Masiguradom Kadi a Husto ti Ibagbaga ti Biblia?
Bayat nga ad-adalem ti Biblia a Sao ti Dios, makitamto a makatulong pay laeng dayta agingga ita. “Kanayon a mapangnamnamaan . . . ita ken iti agnanayon.” (Salmo 111:8) Ti panangsurottayo kadagiti ibagbaga ti Biblia ti kasayaatan a pamay-an ti panagbiag. Ngem saannatayo a pilpiliten ti Dios. (Deuteronomio 30:19, 20; Josue 24:15) Adda kadatayo no surotentayo dayta wenno saan.
