Maikaskasaban ti naimbag a damag maipapan iti Pagarian ti Dios iti intero a daga, kas impadto ni Jesus. (Mateo 24:14) Ibaga ti libro ti Biblia a Daniel a daytoy a Pagarian ket gobierno ti Dios. Naglaon ti kapitulo 2 dayta a libro iti padto maipapan iti panagsasaruno dagiti nabileg a gobierno, wenno pagarian, ti tao manipud pay iti nagkauna a Babilonia agingga ita. Kastoy ti naipadto iti bersikulo 44:

“Mangipasdekto ti Dios ti langit iti maysa a pagarian a saanto pulos a madadael. Daytoy a pagarian ket saanto a mayawat iti aniaman a sabali nga ili. Rumeken ken pagpatinggaennanto amin dagitoy a pagarian, ket daytanto laeng ti agtalinaed iti agnanayon.”

Ipakita dayta ken ti dadduma pay a padto iti Biblia a suktanto ti Pagarian ti Dios ti amin a turay ti tao ken mangyegto iti kinatalged ken talna ditoy daga. Kasanonto ti biagtayo iti sidong dayta a Pagarian? Dagitoy ti sumagmamano a nakaskasdaaw a kari nga asidegen a matungpal.

• AWANTON TI GUBAT

  Salmo 46:9: “[Pagsardengen ti Dios] dagiti gubat iti intero a daga. Tukkolenna dagiti pana ken putdenna dagiti pika; puoranna dagiti lugan ti militar.”

  Panunotem ti kasasaad no ti amin a kuarta ken paglaingan a maus-usar ita iti panagaramid kadagiti armas ket mausar para iti pagsayaatan dagiti tattao imbes a mangpapatay kadakuada! Matungpalto dayta a kari iti sidong ti Pagarian ti Dios.

• AWANTON TI SAKIT

  Isaias 33:24: “Awanto ti residente a mangibaga: ‘Masakitak.’”

  Panunotem ti kasasaad inton awanen ti sakit iti puso, kanser, malaria, wenno dadduma pay a sakit. Saantayton a kasapulan ti ospital ken agas. Perpektonton ti salun-at ti amin nga agnanaed ditoy daga.

• AWANTON TI BISIN

  Salmo 72:16: “Naruayto dagiti bukbukel ditoy daga; nagadunto ti maani iti rabaw dagiti bantay.”

  Mangpataudto ti daga iti umdas a taraon, ket magun-odanto dayta ti amin. Awanton ti bisin ken malnutrision.

• AWANTON TI UT-OT, LADINGIT, KEN IPAPATAY

  Apocalipsis 21:4: “[Punasento ti Dios] ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.”

   Kayatna a sawen, agbiagtayton nga agnanayon iti perpekto a kasasaad iti paraiso a daga! Kari dayta ti naayat a Namarsua, ni Jehova a Dios.

Kasla kadi imposible dagita? Uray no umanamong ti kaaduan a nakasaysayaat ti biag a naikari ken nailadawan iti Biblia, saanda a maawatan ti ideya a panagbiag iti agnanayon gapu iti adu a rason. Ditay pakasdaawan dayta ta awan pay ti tao a nakapadas iti dayta tapno iyestoriana kadatayo.

Naadipen dagiti tattao iti basol ken ipapatay ken nabayagen nga agbibiagda a napno iti saem, rigat, ken problema isu nga imbilangen ti adu a dayta ti normal a biag. Ngem naiduma unay dayta iti panggep ni Jehova a Dios, ti Namarsua kadatayo.

Tapno agtalektayo a matungpal ti amin nga inkari ti Dios, impaganetgetna maipapan iti saona: “Saanto nga agsubli kaniak nga awan resultana, no di ket sigurado nga itungpalna ti aniaman a pagragsakak, ken sigurado nga agballigi iti pangibaonak.”​—Isaias 55:11.

Ibaga ti Biblia a ni Jehova ket Dios a “saan a mabalin nga agulbod.” (Tito 1:2) Gapu ta inkarina amin dagitoy a nakaskasdaaw a banag para iti masanguanan, nagsayaat ngarud a panunotentayo: Talaga kadi a posible nga agbiag nga agnanayon dagiti tattao iti naikari a Paraiso a daga? Ania ti aramidentayo tapno mabenepisiarantayo iti kari ti Dios? Kadagiti sumaruno a panid, makitam ti sumagmamano a makatulong nga impormasion a mangsungbat kadagita a saludsod.