Nadiseniotayo nga Agbiag
ASINO kadatayo ti dina kayat ti atiddog ken naragsak a biag? Panunotem laengen a nagsayaat koma no agbiagtayo iti awan inggana a nasalun-at ken naragsak! Ad-adu ti panawentayo a kadua dagiti ay-ayatentayo, agbiahe iti intero a lubong, mangadal kadagiti baro a paglaingan, agbalin a nasirsirib, ken sursuruen ti aniaman a kayattayo nga aramiden.
Natural kadi ti kasta a tarigagay? Wen! Kuna ti Biblia nga inkabil dayta ti Dios iti pusotayo. (Eclesiastes 3:11) Ibagana pay a “ti Dios ket ayat.” (1 Juan 4:8) Nainkalintegan kadi nga ikabil ti naayat a Dios iti pusotayo ti tarigagay nga agbiag nga agnanayon no imposible dayta?
Nalawag a ti ipapatay ket “kabusor” kas ibaga ti Biblia, saan a gayyem. (1 Corinto 15:26) Nasapa a matay ti dadduma, adda met dagiti atiddog ti biagna, ngem matay ti amin inton agangay. Adu pay ketdi ti mabuteng a mangpanunot iti dayta. Addanto ngata tiempo a maabak daytoy a kabusor? Talaga kadi a posible dayta?
EBIDENSIA A MANGYEG ITI NAMNAMA
Makigtotka kadi no maammuam a saan a pulos a panggep ti Dios a matay dagiti tattao? Mangted ti Genesis a libro iti Biblia iti ebidensia a panggep ti Dios nga agbiag nga agnanayon dagiti tattao ditoy daga. Pinarsua ni Jehova a Dios ti daga ken insaganana a pagyanan ti tattao. Sa pinarsuana ti umuna a tao a ni Adan ken inkabilna iti paraiso, ti hardin ti Eden. Kalpasanna, “nakita ti Dios a nakasaysayaat ti amin nga inaramidna.”—Genesis 1:26, 31.
Ni Adan ket naparsua a perpekto a kaladladawan ti Dios. (Deuteronomio 32:4) Awan met a pulos ti depekto ti asawa ni Adan a ni Eva ta perpekto ti isip ken bagina. Imbaga ni Jehova kadakuada: “Agpaadukayo ken punnuenyo ti daga ken kultibarenyo, ket iturayanyo dagiti ikan iti baybay ken dagiti agtaytayab a parsua iti tangatang ken tunggal sibibiag nga animal iti daga.”—Genesis 1:28.
Tiempo ti kasapulan tapno mapno ti daga kadagiti annakda. Masapul nga aganak ni Eva, ket masapul met nga aganak dagiti annakda tapno ti daga ket naan-anay a mapagnaedan kas iti panggep ti Dios. (Isaias 45:18) Nainkalintegan kadi nga ibaga ni Jehova dayta a namnama kada Adan ken Eva no ti kaatiddog ti biagda ket agingga laeng a makitada dagiti annakda ken mabalin nga uray dagiti appokoda, ken dida pulos ammo ti pagbanaganda?
Panunotem met ti intedna a trabaho a panangituray kadagiti animal. Naibilin ken Adan a panagananna dagiti animal ket agkasapulan dayta iti tiempo. (Genesis 2:19) Ngem tapno maiturayanna ida, masapul nga adalenna ti maipapan kadakuada tapno ammona no kasano a maaywananna. Ad-adu manen a tiempo ti kasapulan iti dayta.
Isu a dagiti imbilin ti Dios a panangpunno iti daga ken panangituray kadagiti animal ti mangipakita a nadisenio ti umuna nga agassawa nga agbiag iti napaut. Talaga a nagbiag ni Adan iti nakaat-atiddog.
PANGGEP TI DIOS NGA AGBIAG NGA AGNANAYON DAGITI TATTAO ITI PARAISO A DAGA
NAGBIAGDA ITI NAKAAT-ATIDDOG
Adan, 930 a tawen
Matusalem, 969 a tawen
Noe, 950 a tawen
Ita, 70-80 a tawen
Ipakita ti Biblia nga at-atiddog idi ti biag ti tao ngem ita. Kunana: “Nagbiag ni Adan iti 930 a tawen sa natay.” Kalpasanna, dinakamatna ti innem pay a lallaki a nagbiag iti nasurok a 900 a tawen! Isuda da Set, Enos, Kenan, Jared, Matusalem, ken Noe. Aminda ket nagbiag sakbay ti Layus idi tiempo ni Noe—600 ti tawen ni Noe sakbay a dimteng ti Layus. (Genesis 5:5-27; 7:6; 9:29) Apay a kasta ti kapaut ti biagda?
Nayanakda iti tiempo nga asideg pay iti kinaperpekto ti tao. Posible a dayta ti kangrunaan a rason a nagbiagda iti nakaat-atiddog. Ngem ania ti koneksion ti kinaperpekto iti atiddog a biag? Ken kasano a mapukawto ti ipapatay? Tapno maammuantayo dagiti sungbat, ammuentayo pay no apay a lumakay, bumaket, ken mataytayo.