IMADYINEM nga agbuybuyaka iti video maipapan iti maysa a sikat, mabalin a ti magusgustuam a popular iti tay-ak ti musika. Nangrugi dayta kadagiti eksena idi ubing pay, idi nagadal iti musika, ken iti namin-adu a panagpraktisna. Kalpasanna, mabuyamon dagiti konsierto ken iyaapanna iti nadumaduma a nasion, agingga a simmikat iti intero a lubong. Idi kuan, in-inut a bimmaket agingga a natay.

Saan la nga es-estoria dayta. Agpayso nga estoria dayta ti biag ti maysa a tao a natayen. Maysa man a musikero, sientista, atleta, wenno sikat a tao, agpapada ti taray ti estoria. Mabalin nga adu ti naaramidanna, ngem saan kadi nga ad-adu pay koma no saan a limmakay wenno bimmaket ken natay?

Makapaladingit ngem dayta ti mapaspasamak kadatayo amin. (Eclesiastes 9:5) Uray ania ti aramidentayo, lumakay, bumaket ken mataytayo. Mabalin met a mataytayo gapu iti aksidente wenno nakaro a sakit. Inladawan ti Biblia a kaslatayo iti linnaaw iti bigat nga “agparang iti apagbiit sa agpukaw.”​—Santiago 4:14.

Para iti adu, awan serserbi ken awan ti direksion ti biag isu a ti prinsipioda ket “mangan ken uminumtayo, ta inton bigat mataytayo.” (1 Corinto 15:32) Mabalin a kasta ti panangmatmatda iti biag ta ammoda a matayda iti aniaman nga oras ken awan ti namnamada iti masanguanan. Addanto kanito iti biagmo, aglalo no addaka iti narigat a kasasaad a maisaludsodmo, ‘Kastoy la ngatan ti biag?’ Pakasarakam ngay iti sungbatna?

Adu ti mangnamnama iti siensia. Gapu iti irarang-ay ti siensia ken medisina, immatiddog ti biagtayo. Ikagkagumaan met ti dadduma a sientista a paatiddogen pay ti biag. Aniaman ti resulta ti panangikagumaanda, adda latta dagiti saludsod nga: Apay a lumakay, bumaket ken mataytayo? Addanto ngata tiempo nga awanen ti kabusortayo nga ipapatay? Mailawlawag dagita kadagiti sumaganad nga artikulo ken masungbatan ti saludsod a, Kastoy la ngatan ti biag?