Balakad ti Biblia: “Iti panagbiagyo, saanyo nga ayaten ti kuarta, no di ket kontentokayo koman kadagiti agdama a bambanag.”​—Hebreo 13:5.

Nagadu ita ti produkto ken serbisio a kasapulantayo kano. Ngem ibaga ti Biblia a “kontento[tayo] koman kadagiti agdama a bambanag.” Kasano?

“Saanyo nga ayaten ti kuarta.” Isaksakripisio dagiti tattao ti salun-at, pamilia, gagayyem, moralidad, ken dignidadda gapu laeng iti ‘ayatda iti kuarta.’ (1 Timoteo 6:10) Nagdakkel ti saysayangenda! Ngamin, ti agayat iti kinabaknang ket “saanto a mapnek.”​—Eclesiastes 5:10.

Ipategmo dagiti tattao, saan a dagiti bambanag. Adda met ketdi ti pakausaran dagiti material a bambanag. Ngem saandatayo a maayat wenno maapresiar ta dagiti laeng tattao ti makaaramid iti dayta. Ti kaadda ti “pudno a gayyem” ket makatulong tapno agbalintayo a kontento iti biag.​—Proverbio 17:17.

Balakad ti Biblia: “Ti naragsak a puso ket nasayaat nga agas.”​—Proverbio 17:22.

Kas iti “nasayaat nga agas,” makatulong ti kinaragsak tapno malabanantayo ti sakit. Ngem kasanotayo nga agbalin a naragsak no agsaksakittayo?

Agbalin a managyaman. No sangkapanunottayo dagiti problematayo, kasla dakes ti “amin nga aldaw.” (Proverbio 15:15) Isu a kuna ti Biblia: “Ipakitayo a managyamankayo.” (Colosas 3:15) Sursuruem nga apresiaren dagiti nagsayaat a banag, kasano man kabassit dagita. Ti napintas nga ilelennek ti init, makapabang-ar a pul-oy ti angin, ken ti isem ti maysa nga ay-ayaten ket mangparagsak iti biagtayo.

Tumulong. Uray no adda an-annayentayo, “naragragsak ti mangted ngem ti umawat.” (Aramid 20:35) No apresiaren ti dadduma ti ar-aramidentayo, mariknatayo ti pannakapnek ken malipatantayo dagiti problematayo. Agbalin a nasaysayaat ti biagtayo no tulongantayo ti padatayo a tao a mangpasayaat iti biagna.

Balakad ti Biblia: ‘Siguraduenyo ti napatpateg a bambanag.’​—Filipos 1:10.

Posible a madadael ti relasion dagiti agassawa a manmano nga agkadua. Masapul nga ibilang dagiti agassawa a ti relasionda kas agassawa ti maysa kadagiti napatpateg a banag iti biagda.

Agkaduakayo kadagiti aramidenyo. Imbes a basta aramidem lattan ti maysa a banag, apay a diyo planuen dayta a dua? “Nasaysayaat ti dua ngem ti maysa,” kuna ti Biblia. (Eclesiastes 4:9) Agkaduakayo nga agluto, agehersisio, agrelaks, wenno agaramid kadagiti banag a magusgustuanyo.

Ipakitayo nga agin-innayatkayo. Iparparegta ti Biblia kadagiti agassawa nga aginnayat ken agrinnespetoda. (Efeso 5:28, 33) Ti panaginnisem, panaginnarakup, wenno panagrinnegalo ket mangpatibker iti panagasawa. Siempre, masapul a ti laeng kadennaen dagiti agassawa ket ti asawada.​—Hebreo 13:4.