Mailadawam kadi ti daga nga awan ti init? Mangted ti init iti enerhia kadagiti kayo tapno mangpataud iti bulong, sabong, bunga, nues (nuts), ken bukbukel. Gapu iti init, maagsep dagiti kayo ti danum manipud iti daga babaen kadagiti ramutna, sa umuli kadagiti bulong ken rummuar iti angin kas alingasaw (water vapor).

Ti tudo ket nagpateg a sagut ti Dios tapno makapataud ti daga iti taraon a kanentayo. Ipapaayannatayo ti Dios iti tudo manipud langit ken adu nga apit, a pempennekennatayo iti taraon ken parparagsakenna ti pusotayo.

Madanagan ti adu nga ama no pangalaanda iti umdas a taraon ken bado para iti pamiliada. Kitaenyo ti kuna ti Kasuratan: “Paliiwenyo dagiti billit iti tangatang; saanda nga agmula iti bin-i wenno agani wenno agipempen kadagiti kamarin, ngem pakanen ida ni Amayo nga adda idiay langit. Saan kadi a napatpategkayo ngem kadakuada?”​—Mateo 6:25, 26.

“Adda masursuroyo kadagiti lirio iti tanap, no kasano ti panagdakkelda . . . ; ngem laglagipenyo nga uray nakadaydayag ni [Ari] Solomon, saan a nakawesan iti kas kapintas ti maysa kadagitoy a sabong. No kawesan ti Dios iti napintas dagiti mula iti tanap . . . , saan kadi a nangnangruna a kawesannakayo?”​—Mateo 6:28-30.

Gapu ta maipaayannatayo ti Dios iti taraon ken bado, sigurado a matulongannatayo a maaddaan kadagiti dadduma pay a kasapulantayo iti biag. No aramidentayo ti pagayatan ti Dios, sigurado a bendisionanna ti panangikagumaantayo nga agtalon wenno tulongannatayo nga agbirok iti trabaho tapno magatangtayo dagiti kasapulantayo.​—Mateo 6:32, 33.

Talaga nga adu ti nasayaat a rasontayo a mangayat iti Dios no adalentayo ti maipapan iti init, tudo, billit, ken sabsabong. Ilawlawag ti sumaruno nga artikulo no kasano a nakikomunikar iti sangatauan ti Namarsua kadatayo.