Apay nga Agtataripnongtayo Tapno Agdayaw?
“Agpipinnanunottayo koma iti maysa ken maysa . . . , a saantay a baybay-an ti panagtataripnongtayo.”—HEB. 10:24, 25.
KANTA: 20, 119
1-3. (a) Kasano nga impakita dagiti Kristiano a magagaranda a makigimong? (Kitaen ti ladawan iti rugi ti artikulo.) (b) Ania ti usigentayo iti daytoy nga artikulo?
IDI agtawen laeng iti 17 ni Corinna, naaresto ni nanangna ken naipan iti kampo a pagtrabahuan idiay Soviet. Idi agangay, naipan met ni Corinna idiay Siberia, a rinibu a milia ti kaadayona iti pagtaenganda. Natrato a kasla adipen. No dadduma, napilit nga agtrabaho iti ruar a nakalamlamiis ken awan ti napuskol a badona. Iti laksid dagita a narigat a kasasaad, porsegido ni Corinna ken ti sabali a kabsat a babai a tumabuno iti gimong iti kongregasion.
2 “Panawanmi ti pagtrabahuanmi iti rabii,” kinunana, “sa magmagnakami a mapan iti estasion ti tren a 25 a kilometro (15 a milia) ti kaadayona. Pumanaw ti tren iti alas dos iti parbangon, ket innem nga oras nga aglugankami sa dumsaagkami ket magmagnakami iti 10 a kilometro (6 a milia) a mapan iti paggigimongan.” Sulit kadi ti panagbiaheda? Kuna ni Corinna: “Iti gimong, adalenmi ti Pagwanawanan ken agkantakami kadagiti kanta ti Pagarian. Makapabileg ken makaparegta unay iti pammatimi daytoy a kapadasanmi.” Nupay tallo nga aldaw a saan a makasubli ni Corinna ken ti kaduana, saan a nadnadlaw ti makinkukua iti pagtrabahuanda nga awanda.
Ara. 2:42) Siempre, kayatmo met a regular a makigimongka iti kongregasion. Ngem maipaspasango ti amin a Kristiano kadagiti lapped. Mabalin a marigatantayo a makigimong gapu iti trabaho, okupado nga eskediul, wenno iti pannakabannogtayo iti inaldaw nga aktibidadtayo. Ania ti mangtignay kadatayo tapno mapagballigiantayo dagitoy a lapped ket kanayon a makigimongtayo? [1] Kasano a matulongantayo dagiti iyad-adalantayo iti Biblia ken ti sabsabali a makakita iti kinapateg ti pannakigimong? Iti daytoy nga artikulo, usigentayo ti walo a rason nga agtataripnongtayo tapno agdayaw. Mabingbingay dagitoy a rason iti tallo a grupo: no ania ti epektona kenka, no ania ti epektona iti sabsabali, ken no ania ti epektona ken Jehova ti pannakigimongmo. [2]
3 Kanayon nga impateg dagiti adipen ni Jehova dagiti panagtataripnongda. Kalpasan a nabuangay ti kongregasion Kristiano, rinugian dagiti pasurot ni Jesus nga impamaysa ti bagbagida iti panagtataripnong a sangsangkamaysa. (NO ANIA TI EPEKTONA KENKA
4. Kasano a ti pannakigimongtayo makatulong kadatayo nga agsursuro maipapan ken Jehova?
4 Makasursurotayo kadagiti gimong. Tunggal gimong iti kongregasion makasursurotayo maipapan iti Dios a ni Jehova. Kas pagarigan, iti agarup dua a tawen, inadal ti kaaduan a kongregasion ti libro nga Umadanika ken Jehova iti Panagadal ti Kongregasion iti Biblia. Saan kadi a dayta a panagadal kadagiti kualidad ti Dios, kasta met ti naimpusuan a komento dagiti kakabsat tinignaynaka nga ad-adda a mangayat iti nailangitan nga Amatayo? Immadu met ti pannakaammotayo iti Sao ti Dios gapu iti panagimdengtayo a naimbag kadagiti palawag ken panagbasa iti Biblia, ken panagbuya kadagiti demostrasion. (Neh. 8:8) Kas pagarigan, panunotem dagiti naespirituan a gameng a naammuam iti linawas a panagsaganam ken panagimdengmo kadagiti tampok iti panagbasa iti Biblia!
5. Kasano a natulongannaka dagiti gimong a mangyaplikar kadagiti naadalmo iti Biblia ken mangpasayaat iti panangasabam?
5 Masursurotayo kadagiti gimong no kasano nga iyaplikar dagiti prinsipio ti Biblia iti amin a paset ti biagtayo. (1 Tes. 4:9, 10) Kas pagarigan, nadisenio ti Panagadal iti Pagwanawanan tapno maipaay ti kasapulan dagiti adipen ti Dios. Adda kadi artikulo a naadal iti Panagadal iti Pagwanawanan a nangtignay kenka a mangusig kadagiti kalatmo, mangpakawan iti padam a Kristiano, wenno mangpasayaat iti kalidad dagiti kararagmo? Ti gimong iti tengnga ti lawas suruannatayo no kasano nga agballigitayo iti ministerio. Masursurotayo no kasano nga ikasaba ti naimbag a damag ken no kasano a sieepektibo nga isuro dagiti prinsipio ti Biblia.—Mat. 28:19, 20.
6. Kasano a maparegtanatayo dagiti gimong ken makatulong kadatayo nga agtalinaed a natibker?
6 Maparegtatayo kadagiti gimong. Daytoy a sistema ti bambanag pakapuyennatayo iti mental, emosional, ken iti naespirituan. Ngem dagiti gimong iti kongregasion paregtaen ken pabilgendatayo. (Basaen ti Aramid 15:30-32.) Iti kaaduan a gimongtayo, adalentayo ti kaitungpalan ti padto ti Biblia. Kas resultana, bumileg ti pammatitayo a matungpal dagiti kari ni Jehova iti masanguanan. Siempre, saan laeng a dagiti agpalpalawag ti mangparegta kadatayo. Maparegtatayo met kadagiti naimpusuan a komento ken panagkanta dagiti padatayo a Kristiano. (1 Cor. 14:26) Ken no makisaritatayo kadagiti kakabsattayo sakbay ken kalpasan dagiti gimong, mariknatayo a pasetnatayo ti kongregasion ken mabang-arantayo.—1 Cor. 16:17, 18.
7. Apay a nakapatpateg nga addatayo kadagiti gimongtayo?
7 Kadagiti gimong, maiwanwantayo babaen ti nasantuan nga espiritu. Kinuna ni Jesu-Kristo: “Daydiay addaan lapayag denggenna koma ti kunaen ti espiritu kadagiti kongregasion.” Apoc. 2:7) Wen, iwanwanwan ni Jesus ti kongregasion Kristiano babaen ti nasantuan nga espiritu. Kasapulantayo ti nasantuan nga espiritu tapno malabanantayo ti sulisog, tapno agbalintayo a natured iti ministerio, ken tapno makaaramidtayo kadagiti nainsiriban a desision. Aprobetsarentayo koma ti amin a probision agraman dagiti gimong iti kongregasion tapno maawattayo dayta nga espiritu!
(NO ANIA TI EPEKTONA ITI SABSABALI
8. Kasano a makatulong kadagiti kakabsattayo no makitadatayo iti gimong ken no mangngegda nga agkomento ken agkantatayo? (Kitaen ti kahon a “Kanayon nga Agawid a Nasaysayaat ti Riknana.”)
8 Kadagiti gimong, maaddaantayo iti gundaway a mangipakita kadagiti kakabsat nga ay-ayatentayo ida. Panunotem a naimbag dagiti rigat a masapul nga ibturan ti dadduma a kakabsat iti kongregasionmo. Di pakasdaawan nga insurat ni apostol Pablo a maseknantayo koma iti maysa ken maysa. Kalpasanna, inlawlawag ni Pablo a maipakitatayo a maseknantayo no “saantay a baybay-an ti panagtataripnongtayo a sangsangkamaysa.” (Heb. 10:24, 25) No makigimongka, ipakpakitam a maikari nga ipaayam iti tiempo, atension, ken pannakaseknan dagiti kapammatiam. Kasta met, maparegtam dagiti padam a Saksi kadagiti naimpusuan a komentom ken panagkantam.—Col. 3:16.
9, 10. (a) Ilawlawagmo no kasano a makatulong dagiti sasao ni Jesus iti Juan 10:16 tapno matarusantayo no apay a napateg nga agtataripnongtayo nga agkakabsat. (b) No regular a makigimongtayo, kasano a matulongantayo ti maysa nga inlaksid ti pamiliana?
9 Kadagiti gimong, maikaykaysatayo kadagiti kapammatiantayo. (Basaen ti Juan 10:16.) Inyarig ni Jesus ti bagina iti pastor, ket inyarigna dagiti pasurotna iti arban ti karnero. Panunotem: No adda dua a karnero iti turod, adda met dua a karnero iti kapatagan, ken agar-arab ti maysa iti sabali a lugar, ibagatayo kadi a maysa nga arban dagiti lima a karnero? Kinapudnona, agkakadua ti arban ti karnero nga ay-aywanan ti maysa a pastor. Kasta met, saantayo a masurot ti Pastortayo no igagaratayo nga isina ti bagitayo. Masapul a makitaripnongtayo iti dadduma a Kristiano tapno pasettayo ti “maymaysa nga arban” nga ay-aywanan ti “maymaysa a pastor.”
10 No makigimongtayo, tumultulongtayo iti panagkaykaysatayo kas agkakabsat. (Sal. 133:1) Dadduma a kapammatiantayo ti inlaksid dagiti nagannakda ken kakabsatda. Ngem inkari ni Jesus a maaddaanda iti naespirituan a pamilia a mangayat ken mangaywan kadakuada. (Mar. 10:29, 30) No regular a makigimongka, nalabit agbalinka nga ama, ina, kabsat a lalaki, wenno kabsat a babai kadagitoy a kakabsat! Saan kadi a dayta ti mangtignay kadatayo tapno ikagumaantayo nga atenderan ti amin a gimong?
NO ANIA TI EPEKTONA KEN JEHOVA
11. Kasano a ti pannakigimong tulongannatayo a mangipaay ken Jehova ti maikari kenkuana?
11 No makigimongtayo, ipapaaytayo ken Jehova ti maikari kenkuana. Kas Namarsua kadatayo, maikari ni Jehova iti dayaw, dayag, ken panagyaman. (Basaen ti Apocalipsis 7:12.) No agkararag, agkanta, ken agkomentotayo maipapan ken Jehova kadagiti gimongtayo, ipapaaytayo ti maiparbeng unay kenkuana—ti panagdayawtayo. Ipategtayo ti pribilehio a mangidayaw iti Daydiay adun ti inaramidna para kadatayo.
12. Ania ti marikna ni Jehova no agtulnogtayo iti bilinna a makigimongtayo?
12 Ni Jehova maikari met iti panagtulnogtayo. Imbilinna kadatayo a saantayo a baybay-an ti panagtataripnongtayo, nangruna bayat daytoy tiempo ti panungpalan. Maragsakan ni Jehova no situtulok nga agtulnogtayo iti dayta a bilin. (1 Juan 3:22) Ammona ken ipatpategna ti panagreggettayo nga agatender iti tunggal gimong.—Heb. 6:10.
13, 14. Kasano a sumingedtayo ken Jehova ken ni Jesus kadagiti gimong?
13 No makigimongtayo, ipakpakitatayo ken Jehova a kayattayo ti suminged kenkuana ken iti Anakna. Kadagiti gimongtayo, isursuronatayo ti Naindaklan nga Instruktor babaen ti Saona, ti Biblia. (Isa. 30:20, 21) Uray dagiti saan a Saksi a makigimong, mabalin a kunada: “Ti Dios pudno nga adda iti tengngayo.” (1 Cor. 14:23-25) Bembendisionan ni Jehova dagiti gimong babaen ti nasantuan nga espirituna ken iwanwanwanna ti naibatay iti Biblia a programa a panangisuro. Gapuna, kadagiti gimong, im-imdengantayo ti timek ni Jehova ken marikriknatayo ti naayat a panangaywanna. Iti kasta, sumingedtayo kenkuana.
14 Kinuna ni Jesus: “No sadino nga adda dua wenno tallo a naguurnong iti naganko, sadiay addaak iti nagtengngaanda.” (Mat. 18:20) Gapuna, agaplikar ti imbaga ni Jesus kadagiti gimongtayo. Kas ulo ti kongregasion, ni Kristo “magmagna iti nagtetengngaan” ti kongregasion dagiti adipen ti Dios. (Apoc. 1:20–2:1) Panunotem! Direkta a pabpabilgennatayo ni Jehova ken ni Jesus kadagiti Nakristianuan a gimong. Ania ti mapanunotmo a rikna ni Jehova no makitana a magagarantayo a suminged kenkuana ken iti Anakna?
15. Kasano a ti pannakigimongtayo ipakitana iti Dios a kayattayo ti agtulnog kenkuana?
15 No makigimongtayo, ipakpakitatayo a supsuportarantayo ti kalintegan ti Dios a mangituray. Nupay imbilin ni Jehova a makigimongtayo, saannatayo a pilpiliten nga agtulnog. (Isa. 43:23) Gapuna, adda kadatayo a mangipakita ken Jehova no kasano kapudno ti panagayattayo kenkuana ken no kasano katibker ti panangsuportatayo iti panangiturayna. (Roma 6:17) Kas pagarigan, mabalin a pilitennatayo ti amotayo nga aglangan iti gimong gapu iti trabahotayo. Mabalin a butbutngennatayo ti gobierno a pagmultaen, ibalud, wenno nakarkaro pay ti aramidenna no agtataripnongtayo tapno agdayaw. Wenno mabalin a maallukoytayo nga aglinglingay imbes a makigimongtayo. Kadagitoy a situasion, masapul nga agdesisiontayo: Siasino ti pagserbiantayo? (Ara. 5:29) No pilientayo a suportaran ti kinasoberano ni Jehova, maparagsaktayo ti pusona.—Prov. 27:11.
ITULTULOYMO TI MAKITARIPNONG
16, 17. (a) Kasanotayo nga ammo a nakapatpateg dagiti gimong para kadagiti Kristiano idi umuna a siglo? (b) Ania ti komento ni Brother George Gangas maipapan kadagiti Nakristianuan a gimong?
16 Saan laeng a basta nagtataripnong dagiti nagkauna a Kristiano iti apagbiit a tiempo kalpasan a napasamak ti milagro idi Pentecostes 33 C.E. Intuloyda nga impamaysa ti bagbagida iti sursuro dagiti apostol ken iti panagtataripnong a sangsangkamaysa. (Ara. 2:42) Ti Griego a sao a naipatarus nga impamaysada ti bagbagida kaipapananna ti panagibtur wenno panangitultuloy iti napasnek a panagregget. Iti sidong ti turay ti Roma ken ti ibubusor dagiti lider ti relihion, saan a nalaka para kadagidiay a Kristiano ti makigimong. Ngem nagtultuloyda.
17 Ita, adu nga agserserbi ken Jehova ti mangap-apresiar kadagiti Nakristianuan a gimong. Kinuna ni George Gangas, a nagserbi kas miembro ti Bagi a Manarawidwid iti nasurok a 22 a tawen: “Para kaniak, ti pannakitaripnong kadagiti kakabsat ti maysa kadagiti kararagsakan a paset ti biagko ken mangparparegta kaniak. Agingga a mabalin, kaykayatko ti umuna a sumangpet iti Kingdom Hall ken maudi a pumanaw. Maragragsakanak no kasarsaritak dagiti kakabsat. No kaduak ida, mariknak a kaduak ti pamiliak, iti naespirituan a paraiso.” Kinunana pay: “No kasano a ti kompas kanayon a nakatudo iti amianan, kasta met ti tarigagayko a makigimong.”
18. Ania ti makunam kadagiti gimongtayo, ket ania ti determinasionmo?
18 Kasta kadi met ti makunam maipapan iti panagtataripnongtayo tapno agdayaw ken Jehova? Ngarud, determinadoka koma nga agibtur ken agtultuloy nga agregget tapno regular a makigimongka. Iti kasta, maipakitam nga umanamongka ken Ari David a nagkuna: “Jehova, inayatko ti pagnaedan iti balaymo.”—Sal. 26:8.
^ [1] (parapo 3) Dadduma a kapammatiantayo ti saan a regular a makigimong gapu kadagiti kasasaad a saanda a makontrol, kas iti nakaro a sakit. Masiguradoda a maawatan ni Jehova ti situasionda ken apresiarenna unay ti amin-kararua a panagdayawda. Dagiti panglakayen matulonganda dagitoy a kakabsat a magunggonaan kadagiti naespirituan a programa, nalabit babaen ti panangirekordda kadagiti gimong wenno i-hook-up dagita babaen ti telepono.
^ [2] (parapo 3) Kitaen ti kahon a “No Apay a Makigimongtayo.”