Salsaludsod Dagiti Agbasbasa
Ania ti “tanda” ken ti “marka” nga awaten ti tunggal napulotan a Kristiano manipud iti Dios?—2 Cor. 1:21, 22.
Iti napalabas, maideppel ti pangselio a singsing iti pila wenno allid tapno mapatalgedan ti dokumento
Tanda: Sigun iti maysa a reperensia, ti Griego a sao a naipatarus a “tanda” iti 2 Corinto 1:22 ket “maysa a termino a maus-usar iti linteg ken negosio” a kaipapananna “umuna a bayad, deposito, pauna, kari, maysa a pakauna a bayad ti ginatang tapno maibaga a kukuam ti maysa a banag, wenno agserbi dayta a kontrata.” No maipapan kadagiti napulotan, ti naan-anay a bayad, wenno gunggona, ket nadeskribir iti 2 Corinto 5:1-5 kas ti panangikawes iti di agrupsa a nailangitan a bagi. Ti gunggona ramanenna met ti panangawat iti sagut nga immortalidad.—1 Cor. 15:48-54.
Iti moderno a Griego, nausar ti maysa a nainaig a termino para iti engagement ring. Maitutop daytoy nga ilustrasion para kadagidiay agbalin a paset ti simboliko nga asawa ni Kristo.—2 Cor. 11:2; Apoc. 21:2, 9.
Marka: Iti napalabas, nausar ti marka, wenno selio, kas pirma a mangpatalged iti panagtagikua, pudno ti maysa a banag, wenno tulagan. No maipapan kadagiti napulotan, piguratibo a ‘naselioanda,’ wenno natatakanda, iti nasantuan nga espiritu kas sanikua ti Dios. (Efe. 1:13, 14) Ngem saan a permanente daytoy a marka wenno pannakaselio. Agbalin laeng a permanente dayta no matalek ti maysa a napulotan sakbay ti ipapatayna wenno sakbay a mangrugi ti dakkel a rigat.—Efe. 4:30; Apoc. 7:2-4.