1. Ania a pammaregta ti impaay ni Jehova kalpasan ti panagrebelde idiay Eden?

SIPUD idi nagbasol ken nagbalin nga imperpekto ti tao, impakita ni Jehova nga isu ket Dios a mangipapaay iti pammaregta. Kalpasan la unay ti panagrebelde idiay Eden, nangipaay ti Dios iti pakaparegtaan dagiti masanguanan a kaputotan ni Adan. Adda namnama nga agur-uray iti tao. Apaman a matarusan ti padto iti Genesis 3:15, mangipaay dayta iti namnama iti sangatauan a madadaelto ti “kadaanan a serpiente,” ni Satanas a Diablo, ken dagiti dakes nga aramidna.—Apoc. 12:9; 1 Juan 3:8.

2. Kasano a pinaregta ni Jehova ni Noe?

² Nagbiag ni Noe nga adipen ni Jehova iti di nadiosan a lubong. Ni laeng Noe ken ti pamiliana ti agdaydayaw idi ken Jehova. Mabalin koma a naupay ni Noe ta nasaknap idi ti kinaranggas  ken seksual nga immoralidad. (Gen. 6:4, 5, 11; Jud. 6) Ngem adda makaparegta kenkuana nga imbaga ni Jehova a kasapulanna tapno makapagtultuloy a ‘makipagna iti Dios.’ (Gen. 6:9) Imbaga ni Jehova ken Noe a pagpatinggaenna ti dakes a lubong ken insurona ti aramidenna tapno sigurado a makalasat ti pamiliana. (Gen. 6:13-18) Impakita ni Jehova ken Noe nga isu ket Dios a manangparegta.

3. Ania a pammaregta ti naipaay ken Josue? (Kitaen ti ladawan iti rugi ti artikulo.)

³ Idi agangay, naikkan ni Josue iti nagrigat nga annongen a mangiturong iti ili ti Dios iti Naikari a Daga. Karaman iti daytoy nga annongen ti panangparmek kadagiti nabileg nga armada dagiti nasion nga agnanaed sadiay. Gagangay laeng nga agbuteng ni Josue. Gapu ta ammo dayta ni Jehova, binilinna ni Moises a paregtaenna ni Josue. Kinuna ti Dios: “Parebbengam ni Josue ken paregtaem ken papigsaem, agsipud ta isu ti bumallasiw iti sanguanan daytoy nga ili ken isu ti mamagtawid kadakuada iti daga a makitamto.” (Deut. 3:28) Sakbay a nagtignay ni Josue a mangsakup iti daga, imparegta kenkuana ni Jehova: “Saan aya a binilinka? Bumilegka ken pumigsaka. Dika mapakigtotan wenno agkullayaw, ta ni Jehova a Diosmo adda kenka iti sadinoman a papanam.” (Jos. 1:1, 9) Talaga a makaparegta dayta!

4, 5. (a) Ania a pammaregta ti impaay ni Jehova iti nagkauna nga ilina? (b) Kasano a pinaregta ni Jehova ti Anakna?

⁴ Saan laeng a dagiti indibidual ti pinaregta ni Jehova. Pinaregtana pay ti ilina kas maysa a grupo. Nangipaay met ni Jehova iti padto a makaparegta kadagiti Judio a naipan idiay Babilonia. Imbagana: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto. Pudno a tulongankanto. Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg.” (Isa. 41:10) Manamnama met laeng dayta dagiti nagkauna a Kristiano, ken uray ti ili ti Dios ita.—Basaen ti 2 Corinto 1:3, 4.

⁵ Impaayan met ni Jehova ti Anakna iti pammaregta. Kalpasan a nabautisaran ni Jesus, nangngegna ti maysa a timek manipud langit, a nagkuna: “Daytoy ti Anakko, ti dungdungnguen, nga inanamongak.” (Mat. 3:17) Napabileg la ketdi ni Jesus kadagitoy a sasao bayat ti ministeriona ditoy daga!

6. Kasano a makaparegta kadatayo ti ilustrasion maipapan kadagiti talento?

⁶ Tinulad ni Jesus ti ulidan ni Amana. Iti ilustrasion ni Jesus maipapan kadagiti talento, a karaman iti padtona maipapan iti panungpalan ti sistema ti bambanag, imparegtana ti panagbalin a matalek. Pinadayawan ti apo ti tunggal matalek nga adipen. Kinunana: “Nasayaat unay, naimbag ken matalek nga adipen! Matalekka iti sumagmamano a banag. Dutokankanto iti adu a banag. Sumrekka iti rag-o ni apom.” (Mat. 25:21, 23) Makaparegta unay dagita a sasao tapno agtultuloytayo a simamatalek nga agserbi ken Jehova!

7. Ania ti imparegta ni Jesus kadagiti apostol ken kasta met ken Pedro?

⁷ Masansan a pagriririan idi dagiti apostol ni Jesus no asino kadakuada ti katan-okan, ngem siaanus a pinaregta ida ni Jesus nga agpakumbabada ken agserbida iti sabsabali, imbes nga isuda ti pagserbian. (Luc. 22:24-26) Adda dagiti gundaway a saan a naragsakan ni Jesus iti inaramid ni Pedro. (Mat. 16:21-23; 26:31-35, 75) Imbes a laksidenna ni Pedro, pinaregtana ken binilinna  pay ketdi a pabilgenna dagiti kakabsatna.—Juan 21:16.

8. Kasano a pinaregta ni Ezekias dagiti panguluen ti militar ken umili ti Juda?

⁸ Uray sakbay nga immay ditoy daga ti Anak ni Jehova ken nangipaay iti perpekto nga ulidan iti panangparegta iti sabsabali, ammon dagiti matalek nga adipen ni Jehova a masapul a mangparegtada. Idi pinangtaan dagiti Asirio ni Ezekias, inummongna dagiti panguluen ti militar ken dagiti umili ti Juda tapno paregtaenna ida. “Ket rinugian dagiti umili nga isadag ti bagbagida iti sasao[na].”—Basaen ti 2 Cronicas 32:6-8.

9. Ania ti masursurotayo iti libro a Job maipapan iti panangipaay iti pammaregta?

⁹ Nupay agkasapulan idi ni Job iti liwliwa, insurona ketdi dagiti tallo a ‘makariribuk a manangliwliwa’ no kasano ti mangipaay iti pammaregta. Imbagana kadakuada a no isu ti adda iti kasasaadda, ‘papigsaenna ida iti sasao ti ngiwatna, ket ti pangliwliwa dagiti bibigna [mangted iti bang-ar].’ (Job 16:1-5) Idi agangay, immawat ni Job iti pammaregta manipud ken Eliu, kasta met ken Jehova.—Job 33:24, 25; 36:1, 11; 42:7, 10.

10, 11. (a) Apay a kasapulan idi a maparegta ti balasang ni Jefte? (b) Siasino met ita ti maikari iti kasta a pammaregta?

¹⁰ Ti sabali pay a pagarigan idi un-unana nga agkasapulan iti pammaregta ket ti balasang ni Jefte. Sakbay a napan nakigubat ni Ukom Jefte kadagiti Ammonita, inkarina a no pangabaken ni Jehova, ti tao nga umuna a sumabat kenkuana kalpasan ti pannakigubatna ket ipaayna ken Jehova tapno agserbi idiay tabernakulo. Ngem nairana a ti balasangna, ti kakaisuna nga anakna, ti rimmuar a makipagragsak iti panangabakna. Napalalo ti ladingit ni Jefte. Ngem tinungpalna ti karina ket imbaonna ti balasangna idiay Silo tapno agserbi idiay tabernakulo iti intero a panagbiagna.—Uk. 11:30-35.

¹¹ Nupay narigat dayta ken Jefte, mabalin a narigrigat pay dayta iti balasangna ngem situtulok latta a nagtulnog iti desision ni amana. (Uk. 11:36, 37) Kaipapanan daytoy a saanen a makiasawa, saanen a maaddaan iti annak, ken saanen a mataginayon ti nagan ken tawid ti pamiliana. Talaga a kasapulanna ti liwliwa ken pammaregta. Kuna ti Biblia: “Ket nagbalin nga alagaden iti Israel: Iti tinawentawen mapan ti annak a babbai ti Israel tapno mangipaayda iti pammadayaw iti anak a babai ni Jefte a Galaadita, uppat nga aldaw iti makatawen.” (Uk. 11:39, 40) Saan kadi a maikari met a komendaran ken paregtaentayo dagiti awanan asawa a Kristiano a mangipampamaysa iti biagda iti “bambanag iti Apo”?—1 Cor. 7:32-35.

12, 13. Kasano a ‘pinabileg ni Pedro dagiti kakabsatna’?

¹² Iti rabii sakbay a natay ni Jesus, imbagana ken apostol Pedro: “Simon, Simon, adtoy! kinalikaguman ni Satanas nga ikutannakayo tapno yakayakennakayo a kas iti trigo. Ngem immararawakon maipaay kenka tapno saan nga agkapuy ti pammatim; ket sika, apaman a nakasublikan, pabilgem ti kakabsatmo.”—Luc. 22:31, 32.

¹³ Nagbalin ni Pedro a pannakaadigi ti nagkauna a kongregasion Kristiano. (Gal. 2:9) Naparegtana dagiti kakabsatna gapu iti kinaturedna bayat ti Pentecostes ken nagpatpatuloy. Nagsurat kadagiti padana a Kristiano idi dandanin agpatingga ti napaut a ministeriona. Inlawlawagna no apay: “Nagsuratak kadakayo iti sumagmamano a  sasao, tapno mangipaayak iti pammaregta ken napasnek a panangsaksi nga isu daytoy ti pudno a di kaikarian a kinamanangngaasi ti Dios; nga iti dayta agtakderkayo a sititibker.” (1 Ped. 5:12) Nagtultuloy a nakaipaay iti pammaregta dagiti surat ni Pedro kadagiti Kristiano idi ken uray ita. Talaga a kasapulantayo daytoy a pammaregta bayat nga ur-urayentayo a matungpal dagiti kari ni Jehova!—2 Ped. 3:13.

14, 15. Kasano a nangipaay iti pammaregta dagiti surat ni apostol Juan kadagiti Kristiano manipud idi agingga ita?

¹⁴ Maysa met ni apostol Juan a pannakaadigi ti nagkauna a kongregasion Kristiano. Makaparegta kadagiti Kristiano manipud idi agingga ita ti makapainteres nga Ebangheliona maipapan iti ministerio ni Jesus. Ti laeng Ebangheliona ti nakaisuratan ti sasao ni Jesus a ti ayat ti pakabigbigan dagiti pudno nga adalanna.—Basaen ti Juan 13:34, 35.

¹⁵ Naglaon met ti tallo a surat ni Juan kadagiti agkakapateg a kinapudno. No madagdagsenantayo gapu iti basol, saan kadi a mabang-arantayo a makabasa a “ti dara ni Jesus . . . dalusannatayo manipud iti amin a basol”? (1 Juan 1:7) Ket no agtultuloy nga ukomennatayo ti pusotayo, saan kadi a malag-anan ti riknatayo ken makaluatayo iti ragsak no mabasatayo a “ti Dios dakdakkel ngem kadagiti pusotayo”? (1 Juan 3:20) Ni laeng Juan ti nangisurat a “ti Dios ket ayat.” (1 Juan 4:8, 16) Iti maikadua ken maikatlo a suratna, kinomendaranna dagiti Kristiano nga agtultuloy a ‘magmagna iti kinapudno.’—2 Juan 4; 3 Juan 3, 4.

16, 17. Ania a pammaregta ti impaay ni apostol Pablo kadagiti nagkauna a Kristiano?

¹⁶ Idi umuna a siglo, ti apostol a kaaduan ti naaramidan a mangparegta kadagiti kakabsat ket nalabit ni apostol Pablo. Agparang nga idi nabiit pay ti kongregasion Kristiano,  nagtalinaed ti kaaduan nga apostol idiay Jerusalem, a nagtultuloy nga ayan ti bagi a manarawidwid. (Ara. 8:14; 15:2) Inkaskasaba dagiti Kristiano idiay Judea ti maipapan ken Kristo kadagiti tattao a mamati iti maysa a Dios gapu iti impluensia ti Judaismo. Ngem imbaon ti nasantuan nga espiritu ni apostol Pablo a mangasaba kadagiti Romano, Griego, ken dadduma pay nga agdaydayaw iti adu a dios.—Gal. 2:7-9; 1 Tim. 2:7.

¹⁷ Nagdaliasat ni Pablo iti adayo a lugar a kas iti Grecia, Italia, ken iti maawagan itan iti Turkey tapno mangbuangay kadagiti kongregasion Kristiano kadagiti saan a Judio. Dagitoy a nabiit pay a Kristiano ket “nagsagaba iti im-ima dagiti mismo a kailian[da]” isu a kasapulanda ti pammaregta. (1 Tes. 2:14) Idi agarup 50 C.E., insurat ni Pablo iti nabiit pay a kongregasion idiay Tesalonica: “Kankanayon nga agyamankami iti Dios no dakamatenmi ti maipapan kadakayo amin kadagiti kararagmi, ta di agressat a laglagipenmi ti matalek nga aramidyo ken ti naayat a panagbannogyo ken ti panagibturyo.” (1 Tes. 1:2, 3) Imparegtana met a pabilgenda ti maysa ken maysa: “Itultuloyyo a liwliwaen ti maysa ken maysa ken pabilgen ti maysa ken maysa.”—1 Tes. 5:11.

18. Kasano a ti bagi a manarawidwid idi umuna a siglo pinaregtana ni Felipe?

¹⁸ Ti bagi a manarawidwid idi umuna a siglo ket nangipaay iti pammaregta kadagiti mangidadaulo ken iti amin a Kristiano. Idi inkaskasaba ti ebanghelisador a ni Felipe ti maipapan ken Kristo kadagiti Samaritano, naan-anay a simmuporta kenkuana dagiti miembro ti bagi a manarawidwid. Nangibaonda iti dua kadakuada, da Pedro ken Juan, a mangikararag kadagiti baro a manamati tapno umawatda iti nasantuan nga espiritu. (Ara. 8:5, 14-17) Naparegta la ketdi a mismo ni Felipe kasta met dagidiay binautisaranna gapu iti daytoy a suporta ti bagi a manarawidwid!

19. Ania ti epekto ti surat ti bagi a manarawidwid iti nagkauna a kongregasion Kristiano?

¹⁹ Idi agangay, nakiddaw iti bagi a manarawidwid a desisionanda no masapul pay a makugit dagiti Kristiano a saan a Judio, kas ipapaaramid ti Linteg ni Moises kadagiti Judio. (Ara. 15:1, 2) Kalpasan nga inusig dagiti nadutokan a lallaki ti Kasuratan babaen ti tulong ti nasantuan nga espiritu, inkeddengda a saanen a kasapulan ti panagkugit, ket sinuratanda dagiti kongregasion maipapan iti dayta. Naibaon dagiti pannakabagi ti bagi a manarawidwid a mangitulod iti dayta a surat kadagiti kongregasion. Ania ti resultana? “Kalpasan a nabasada dayta, nagrag-oda gapu iti pammaregta.”—Ara. 15:27-32.

20. (a) Ania a pammaregta ti ipapaay ita ti Bagi a Manarawidwid iti amin a kakabsat? (b) Ania a saludsod ti masungbatan iti sumaganad nga artikulo?

²⁰ Ita, mangipapaay ti Bagi a Manarawidwid dagiti Saksi ni Jehova iti pammaregta kadagiti miembro ti pamilia ti Bethel, kadagiti special full-time nga agserserbi iti tay-ak, ken kinaagpaysuanna, iti amin a pudno a Kristiano iti intero a lubong. Kas resultana, naragsakanda iti dayta a pammaregta, kas idi umuna a siglo! Kanayonanna, impablaak ti Bagi a Manarawidwid ti broshur nga Agsublika ken Jehova idi 2015, a talaga a nangparegta iti adu a kakabsat iti intero a lubong. Ngem dagiti laeng kadi addaan iti autoridad ti masapul a mangtulad ken Jehova iti panangipaay iti pammaregta? Masungbatan dayta a saludsod iti sumaganad nga artikulo.