1. Sigun iti Efeso 6:10-13, ania ti maysa a nagsayaat a pamay-an nga ipakpakita ni Jehova ti pannakaseknanna kadatayo? Ilawlawag.

MASEKNAN kadatayo ni Jehova kas ad-adipenna. Mariknatayo dayta iti panangtulongna kadatayo a manglaban kadagiti kabusortayo. Dagiti kangrunaan a kabusortayo ket ni Satanas ken dagiti demoniona. Pakpakdaarannatayo ni Jehova maipapan kadagitoy a kabusor, ket ipaayna ti kasapulantayo a manglaban kadakuada. (Basaen ti Efeso 6:10-13.) No awatentayo ti tulong ni Jehova ken naan-anay nga agtalektayo kenkuana, agballigitayo a mangbusor iti Diablo. Matuladtayo daytoy a panagtalek ni apostol Pablo: “No adda kadatayo ti Dios, asinonto ti bumusor kadatayo?”​—Roma 8:31.

2. Ania ti usigentayo iti daytoy nga artikulo?

² Kas pudno a Kristiano, ditay agpokus ken Satanas ken kadagiti demoniona. Nakapokustayo iti panagsursuro ken panagserbi ken Jehova. (Sal. 25:5) Ngem kasapulan nga ammuentayo ti ar-aramiden ni Satanas. Apay? Tapno dinatay maallilaw. (2 Cor. 2:11; ftn.) Iti daytoy nga artikulo, usigentayo ti maysa a kangrunaan a pamay-an a pangal-allilaw ni Satanas ken dagiti demoniona. Usigentayo met no kasano a sibaballigi a malabanantayo ida.

3-4. (a) Ania ti espiritismo? (b) Kasano kasaknap ti panamati iti espiritismo?

³ Espiritismo ti maysa a kangrunaan a pangal-allilaw ni Satanas ken dagiti demoniona. Ibaga dagidiay makiramraman iti espiritismo nga ammoda wenno makontrolda ti  bambanag a saan a gagangay nga ammo wenno makontrol ti tao. Kas pagarigan, ibaga ti dadduma a maammuanda ti masanguanan babaen ti panagbuyon wenno astrolohia. Pagparparangen ti dadduma a kasarsaritada dagiti natay. Adda met dagiti agkulkulam wenno agsalsalamangka, ket padasenda nga orasionan ti sabali a tao. *

⁴ Kasano kasaknap ti panamati iti espiritismo? Sigun iti surbey iti 18 a pagilian iti Latin America ken iti Caribbean, agarup 30 a porsiento kadagidiay napagsaludsodan ti mamati iti panagsalamangka wenno panagkulam, ken dandani kasta met laeng ti kaadu ti mamati a posible ti makisarita kadagiti espiritu. Iti sabali pay a surbey iti 18 a pagilian iti Africa, nasurok a kagudua ti nangibaga a mamatida iti panagkulam. Siempre, sadinoman ti pagnanaedantayo, masapul a protektarantayo ti bagitayo iti espiritismo. Ikagkagumaan ngamin ni Satanas nga allilawen ti “intero a mapagnaedan a daga.”​—Apoc. 12:9.

5. Ania ti panagrikna ni Jehova iti espiritismo?

⁵ Ni Jehova “ti Dios ti kinapudno.” (Sal. 31:5) Isu nga ania ti panagriknana iti espiritismo? Kagurana dayta! Imbaga ni Jehova kadagiti Israelita: “Awan koma kadakayo ti mangipalasat iti anakna a lalaki wenno babai iti apuy, mammuyon, salamangkero, agbirbirok iti partaan, mangkukulam, agor-orasion, makiuman iti espiritista wenno mammadles, wenno makisarita iti natay. Ta kagura ni Jehova ti asinoman nga agar-aramid kadagita a banag.” (Deut. 18:10-12) Saanen a sursuroten dagiti Kristiano ti Linteg nga inted ni Jehova kadagiti Israelita. Ngem ammotayo a saan a nagbaliw ti riknana iti espiritismo.​—Mal. 3:6.

6. (a) Kasano nga us-usaren ni Satanas ti espiritismo a mangdangran kadagiti tattao? (b) Sigun iti Eclesiastes 9:5, ania ti agpayso a kasasaad dagiti natay?

⁶ Pakpakdaarannatayo ni Jehova maipapan iti espiritismo ta ammona nga us-usaren dayta ni Satanas a pangdangran kadagiti tattao. Us-usaren dayta ni Satanas a mangiwaras kadagiti kinaulbod​—a pakairamanan ti kinaulbod a sibibiag dagiti natay iti sabali a lubong. (Basaen ti Eclesiastes 9:5.) Us-usarenna met ti espiritismo tapno butbutngenna dagiti tattao ken mayadayona ida ken Jehova. Planona nga agtalek dagiti tattao kadagiti dakes nga espiritu imbes a ken Jehova.

7. Ania ti ibagbaga kadatayo ni Jehova?

⁷ Kas nadakamaten, ibagbaga ni Jehova ti kasapulan a maammuantayo tapno dinatay maallilaw ni Satanas ken dagiti demonio. Kitaentayo ti dadduma a praktikal nga addang tapno malabanantayo ida.

8. (a) Ania ti kangrunaan a pamay-an a malabanantayo dagiti dakes nga espiritu? (b) Kasano nga ibutaktak ti Salmo 146:4 ti kinaulbod ni Satanas maipapan kadagiti natay?

⁸ Basaen ken utoben ti Sao ti Dios. Daytoy ti kangrunaan a pamay-antayo a manglaksid kadagiti kinaulbod nga itantandudo dagiti dakes nga espiritu. Ti Sao ti Dios ket kas iti natadem nga espada a mangsalput wenno mangibutaktak kadagiti kinaulbod  nga itantandudo ni Satanas. (Efe. 6:17) Kas pagarigan, ibutaktak ti Sao ti Dios ti kinaulbod a mabalin a makisarita dagiti natay kadagiti sibibiag. (Basaen ti Salmo 146:4.) Ipalagipna met a ni Jehova laeng ti umiso a makaipadto iti masanguanan. (Isa. 45:21; 46:10) No regular a basaen ken utobentayo ti Sao ti Dios, ditay patien ken guraentayo dagiti kinaulbod a kayat dagiti dakes nga espiritu a patientayo.

9. Aniada a kita ti aramid a konektado iti espiritismo ti liklikantayo?

⁹ Liklikan ti aniaman a konektado iti espiritismo. Kas pudno a Kristiano, ditay pulos makiraman iti aniaman a kita ti espiritismo. Kas pagarigan, ditay agkonsulta kadagiti espiritista wenno ditay pulos makisarita kadagiti natay. Kas nailawlawag iti napalabas nga artikulo, liklikantayo dagiti kostumbre iti panagminatay a naibatay iti patpatien a sibibiag pay laeng dagiti natay iti sabali a lugar. Ken ditay ammuen ti masanguanan babaen ti astrolohia wenno panagipadles. (Isa. 8:19) Ammotayo a nakapegpeggad dagita nga aramid ken baka direkta a makikomkomunikartayon ken Satanas ken kadagiti demonio.

10-11. (a) Ania ti inaramid ti dadduma idi umuna a siglo idi naammuanda ti kinapudno? (b) Sigun iti 1 Corinto 10:21, apay a masapul a tuladentayo dagiti nagkauna a Kristiano, ken kasano?

¹⁰ Dadaelen dagiti banag a konektado iti espiritismo. Makiramraman iti espiritismo ti dadduma a taga-Efeso idi umuna a siglo. Idi naammuanda ti kinapudno, nangaramidda iti dakkel a panagbalbaliw. “Adu a salamangkero ti nangummong kadagiti libroda sa pinuoranda dagita iti sanguanan ti amin a tattao.” (Ara. 19:19) Talaga a kayatda a labanan dagiti dakes nga espiritu. Nakanginngina dagiti libroda maipapan iti panagsalamangka. Ngem imbes nga ipadawat wenno ilakoda dagita a libro, pinerdida dagita. Napatpateg kadakuada ti panangparagsak ken Jehova ngem iti kangina dagita a libro.

 ¹¹ Kasanotayo a matulad ida? Nasaysayaat a dadaelentayo ti aniaman nga adda kadatayo a konektado iti espiritismo. Karaman kadagita ti an-anib, anting-anting, wenno dadduma pay a banag nga us-usaren wenno iduldulin dagiti tattao tapno maprotektaranda kano kadagiti dakes nga espiritu.​—Basaen ti 1 Corinto 10:21.

12. Ania dagiti masapul nga isaludsodtayo iti bagitayo maipapan iti paglinglingayantayo?

¹² Usigem a naimbag ti paglinglingayam. Isaludsodmo iti bagim: ‘Agbasbasaak kadi kadagiti libro, magasin, wenno artikulo iti Internet maipapan iti espiritismo? Ti ngay musika a dengdenggek, dagiti pelikula ken programa iti TV a buybuyaek, wenno dagiti video game nga ay-ayamek? Adda kadi laokna nga espiritismo ti paglinglingayak? Adda kadi ipakpakitana a bampira, zombie, wenno karkarna a banag? Pagparparangenna kadi a pagpalpaliwaan laeng ti panagsalamangka, panagorasion, wenno panagilunod?’ Siempre, saan nga amin a paglinglingayan a mangitampok iti pantasia wenno parparbo nga estoria ket konektado iti espiritismo. No us-usigem ti paglinglingayam, piliem koma ti makatulong kenka nga umadayo iti aniaman a kagura ni Jehova. Kayattayo nga ikagumaan a “pagtalinaeden a nadalus ti konsiensia[tayo]” iti sanguanan ti Diostayo.​—Ara. 24:16. *

13. Ania ti kayattayo a liklikan?

¹³ Liklikan a pagiinnestoriaan dagiti demonio. Iti daytoy a banag, kayattayo a tuladen ti ulidan nga impakita ni Jesus.  (1 Ped. 2:21) Sakbay nga immay ditoy daga, nagnaed ni Jesus idiay langit, ken adu ti ammona maipapan ken Satanas ken kadagiti demonio. Ngem saanna nga inyestoria ti inar-aramidda. Kayatna nga isuro ti maipapan ken Jehova, imbes a ken Satanas. Matuladtayo ni Jesus no ditay iwarwaras dagiti estoria maipapan kadagiti demonio. Imbes ketdi, ipakitatayo iti sasaotayo nga “adda nagsayaat a banag a mangtigtignay iti puso[tayo],” ti kinapudno.​—Sal. 45:1.

14-15. (a) Apay a ditay koma kabuteng dagiti dakes nga espiritu? (b) Ania ti ebidensia a protprotektaran ni Jehova dagiti adipenna ita?

¹⁴ Di pagbutngan dagiti dakes nga espiritu. Iti daytoy imperpekto a lubong, mabalin nga adda dakes a mapasamak kadatayo. Baka maaksidente, agsakit, wenno bigla a mataytayo. Ngem ditay koma panunoten nga amin dagita ket aramid dagiti espiritu. Ilawlawag ti Biblia a ti “tiempo ken di ninamnama a pasamak” ket mabalin a mapasaran ti asinoman. (Ecl. 9:11) Impakita ni Jehova nga adayo a nabilbileg ngem kadagiti demonio. Kas pagarigan, saan nga impalubos ti Dios a patayen ni Satanas ni Job. (Job 2:6) Idi tiempo ni Moises, impakita ni Jehova a nabilbileg ngem kadagiti salamangkero a papadi ti Egipto. (Ex. 8:18; 9:11) Babaen ti pannakabalin nga inted ni Jehova, impakita ti naipadayag a ni Jesus a nabilbileg ngem ni Satanas ken dagiti demonio idi intapuakna ida ditoy daga. Asidegen a maitapuakda iti nakaun-uneg nga abut, ket saandanton a madangran ti asinoman.​—Apoc. 12:9; 20:2, 3.

¹⁵ Adu ti ebidensia a protprotektaran ni Jehova dagiti adipenna ita. Panunotem daytoy: Ikaskasaba ken isursurotayo ti kinapudno iti intero a daga. (Mat. 28:19, 20) Kas resultana, ibutbutaktaktayo dagiti dakes nga aramid ti Diablo. Napasardeng koman ni Satanas ti trabahotayo no kabaelanna, ngem saanna a kaya dayta. Isu a ditay koma pagbutngan dagiti dakes nga espiritu. Ammotayo a “sipsiputan dagiti mata ni Jehova ti intero a daga tapno ipakitana ti pigsana kadagidiay naan-anay ti pusoda kenkuana.” (2 Cron. 16:9) No matalektayo ken Jehova, didatay naan-anay a madangran dagiti demonio.

16-17. Mangted iti pagarigan no apay a kasapulan ti tured a manglaban kadagiti dakes nga espiritu.

¹⁶ Kasapulantayo ti tured a manglaban kadagiti dakes nga espiritu, aglalo no busorendatayo dagiti manangisakit a gagayyem wenno kakabagiantayo. Ngem bendisionan ni Jehova dagiti addaan iti kasta a tured. Alaentayo a pagarigan ti inaramid ni Erica a taga-Ghana. Agtawen iti 21 idi makipagadal iti Biblia. Gapu ta padi ken salamangkero ni tatangna, namnamaen dagiti tattao a surotenna ti kostumbre a pannangan iti nayatang a karne kadagiti dios ni tatangna. Idi nagkedked ni Erica, imbilang dagiti kapamiliana a pananginsulto dayta kadagiti dios. Patien ti pamiliana a dusaen ida dagiti dios iti mental ken pisikal a sakit.

¹⁷ Pinilit dagiti kapamilia ni Erica a sumurot iti kostumbre, ngem saan a simmuko uray mapapanaw iti balayda. Nakipagyan kadagiti Saksi. Binendisionan ni Jehova ni Erica iti baro a pamilia​—dagiti kapammatianna a nagbalin a kasla agpaypayso a kakabsatna. (Mar. 10:29, 30) Nupay inlaksid dagiti kabagianna ken pinuoranda pay dagiti personal a bambanagna, nagtalinaed a matalek ken Jehova, nabautisaran ket regular pioneer itan. Saan a nagbuteng kadagiti demonio. Kinuna ni Erica, “Inaldaw nga ikarkararagko a mapadasanto koma ti pamiliak ti ragsak iti pannakaam-ammo ken Jehova ken ti wayawaya a resulta ti panagserbi iti naayat a Diostayo.”

18. Ania dagiti awatentayo a bendision no agtalektayo ken Jehova?

¹⁸ Saantayo amin a maipasango iti kasta a pannakasubok ti pammati. Ngem kasapulantayo a labanan dagiti dakes nga espiritu ken agtalek ken Jehova. No aramidentayo dayta, umawattayo iti adu a bendision ken dinatay maallilaw dagiti kinaulbod ni Satanas. Kasta met, ditay ipalubos a ti panagbuteng kadagiti demonio ti mangpasardeng iti panagserbitayo ken Jehova. Kangrunaanna, bumileg ti pannakigayyemtayo ken Jehova. “Agpasakupkayo iti Dios,” insurat ni adalan a Santiago, “ngem busorenyo ti Diablo, ket panawannakayto. Umasidegkayo iti Dios, ket umasidegto kadakayo.”​—Sant. 4:7, 8.