1. Apay nga agkomentotayo kadagiti gimong?

 APAY a makigimgimongtayo? Kangrunaan iti amin, tapno maidaydayawtayo ni Jehova. (Sal. 26:12; 111:1) Makigimgimongtayo met tapno makapagpipinnaregtatayo bayat dagitoy narigat a tiempo. (1 Tes. 5:11) No agitayag ken agkomentotayo, maaramidtayo dagita a dua a panggep.

2. Ania dagiti gundawaytayo a makapagkomento kadagiti gimong?

² Kada lawas, addaantayo kadagiti gundaway nga agkomento kadagiti gimongtayo. Kas pagarigan, kadagiti ngudo ti lawas, mabalintayo ti makipaset bayat ti Panagadal iti Pagwanawanan. Kadagiti gimong iti tengnga ti lawas, mabalintayo ti agkomento bayat ti Panagkali iti Naespirituan a Gameng, Panagadal ti Kongregasion iti Biblia, ken dadduma pay a paset ti gimong a mabalin ti sumungbat.

3. Apay a mabalin a marigatantayo nga agkomento, ken kasano a makatulong ti Hebreo 10:24, 25?

³ Kayattayo amin nga idaydayaw ni Jehova ken paregtaen dagiti kapammatiantayo. Ngem no agkomentotayo, baka marigatantayo ta mabalin nga agnerbiostayo, wenno baka kayattayo ti mamin-adu nga agkomento ngem manmanotayo a maawagan. Ania ti makatulong kadatayo? Masarakantayo ti sungbat iti surat ni apostol Pablo kadagiti Hebreo. No pagsasaritaantayo ti kinapateg ti panaggigimong, imbagana a masapul nga agpokustayo iti ‘panagpipinnaregta.’ (Basaen ti Hebreo 10:24, 25.) No panunotentayo a maparegta  dagiti immatender iti uray simple laeng nga ebkas ti pammatitayo, saantayo unay nga agnerbios nga agkomento. Ken no manmanotayo a maawagan, naragsaktayo latta ta adda gundaway ti dadduma nga agkomento.—1 Ped. 3:8.

4. Ania ti tallo a punto a pagsasaritaantayo iti daytoy nga artikulo?

⁴ Iti daytoy nga artikulo, pagsasaritaantayo nga umuna no kasano a makapagpipinnaregtatayo iti bassit a kongregasion a bassit ti agkomento. Kalpasanna, kitaentayo no kasano a makapagpipinnaregtatayo iti dakkel a kongregasion nga adu ti agitayag tapno agkomento. Kamaudiananna, pagsasaritaantayo dagiti pamay-an tapno talaga nga agbalin a makaparegta ti linaon dagiti komentotayo.

5. Kasanotayo a makapagpipinnaregta no bassit ti bilang ti immatender?

⁵ Iti bassit a kongregasion wenno grupo, saan nga adu ti agkomento a mabalin a pagpilian ti agikonkondukta. No dadduma, mabalin a kasapulan nga aguray biit sakbay nga adda agboluntario nga agkomento. Kasla bumayag no kuan ti gimong ket saan a makaparegta dayta. Ania ti mabalinmo nga aramiden? Agitayagka iti mamin-adu. No kasta ti aramidem, matignaymo ti dadduma a sansanenda ti agkomento.

6-7. Kasanotayo a maksayan ti nerbiostayo nga agkomento?

⁶ Kasanon no pampanunotem pay la ti agkomento ket agnernerbioskan? Adu ti makarikna iti kasta. Ngem tapno lallalo a maparegtam dagiti kakabsat, ammuem dagiti pamay-an a mangkissay iti nerbiosmo no agkomentoka. Ania dagita?

⁷ Mabalin a makatulong no repasuem ti dadduma a suhestion a naipablaak kadagiti napalabas a ruar Ti Pagwanawanan. b Kas pagarigan, agsaganaka a naimbag. (Prov. 21:5) No mas pamiliarka iti maad-adal, saanka unay nga agnerbios no agkomentoka. Agkomentoka met iti ababa. (Prov. 15:23; 17:27) No ababa ti isungbatmo, saanka unay nga agnerbios. Ti ababa a komento, a nalabit buklen ti maysa wenno dua laeng a sentensia, ket mabalin a nalaklaka a maawatan dagiti kakabsat ngem iti atiddog a komento a mangparuar iti adu a punto. No ababa ti komentom ken iti bukodmo a sasao, maipakitam a nagsaganaka a naimbag ken nalawag ti pannakaawatmo iti maad-adal.

8. Kasano ti panangmatmat ni Jehova iti panagreggettayo?

⁸ Kasanon no permi latta ti nerbiosmo nga agkomento iti maminsan wenno mamindua uray no pinadasmon ti dadduma kadagita a suhestion? Masiguradom nga ap-apresiaren ni Jehova ti napasnek a panagreggetmo a mangaramid iti kabaelam. (Luc. 21:1-4) Saan a kidkiddawen ni Jehova ti nalablabes ngem iti kabaelantayo. (Fil. 4:5) Ammuem ti kayam nga aramiden, agporsegika a mangragpat iti dayta, ken ikararagmo nga agkalma ti pusom. Iti damo, baka umanayen ti maminsan a panagkomentom iti ababa.

9. Apay a mabalin a narigat ti agkomento iti dadakkel a kongregasion?

⁹ No adu ti agibumbunannag iti kongregasionmo, mabalin a sabali a rigat ti pakaipasanguam. Adu siguro ti agitayag isu a  manmanoka a maayaban. Kas pagarigan, kanayon a magusgustuan ni Danielle ti agkomento kadagiti gimong. c Ibilangna dayta a paset ti panagdaydayawna, ken pamay-an tapno mangparegta ken mapabilegna ti pammatina kadagiti isursuro ti Biblia. Ngem idi immakar iti dakdakkel a kongregasion, manmanon a maawagan—no dadduma, saan a pulos a maawagan iti intero a gimong. “Maup-upayak idi,” imbagana. “Nariknak a kasla naikapisak iti maysa a pribilehio. No maulit-ulit a mapasamak dayta, panagriknam, kasla maigaggagara.”

10. Kasanotayo a maaddaan iti ad-adu a tsansa nga agkomento?

¹⁰ Nariknam met kadin ti narikna ni Danielle? No wen, mabalin a kaykayatmo lattan ti saan nga agitayag ken dumngeg laengen iti gimong. Ngem dika agsardeng nga agkomento. Ania ti mabalinmo nga aramiden? Mabalin a makatulong no agsaganaka iti sumagmamano a komento iti kada gimong. Iti kasta, no saanka a naawagan iti damo a paset ti panagadal, adda pay ti gundawaymo nga agkomento bayat a madama ti gimong. No agsagsaganaka para iti Panagadal iti Pagwanawanan, panunotem no kasano a konektado dagiti parapo iti tema ti artikulo. No kasta ti aramidem, posible nga adda ti maikomentom iti intero a panagadal. Mangisaganaka met iti komento kadagiti parapo a mangilawlawag kadagiti naun-uneg a kinapudno a narigrigat nga ilawlawag. (1 Cor. 2:10) Apay? Gapu ta mabalin a manmano ti agitayag kadagita a parapo. Kasano ngay no inaramidmon dagita a suhestion ngem saanka latta a naawagan nga agkomento kalpasan ti sumagmamano a gimong? Sakbay ti gimong, mabalinmo a kasarita ti agikondukta ken ibagam kenkuana ti saludsod a kayatmo a sungbatan.

11. Ania ti iparparegta kadatayo ti Filipos 2:4?

¹¹ Basaen ti Filipos 2:4. Impaisurat ti Dios ken apostol Pablo nga iparegtana kadagiti Kristiano a sapulenda dagiti pagimbagan ti dadduma. Kasanotayo a mayaplikar dayta a balakad bayat dagiti gimong? Laglagipentayo a kayat met ti dadduma ti agkomento a kas kadatayo.

12. Ania ti nasayaat a pamay-an a maparegtatayo ti dadduma kadagiti gimong? (Kitaen met ti ladawan.)

 ¹² Panunotem daytoy. No makiin-innestoriaka kadagiti gagayyemmo, sika kadi ti makaadu nga agsao ket bassiten ti gundawayda nga agsao? Siempre saan! Kayatmo met a pagestoriaen ida. Kasta met kadagiti gimong. Kayattayo nga adu ti agkomento agingga a posible. Kinapudnona, ti maysa kadagiti kasayaatan a pamay-an a maparegtatayo dagiti kakabsat ket ikkantayo ida iti tsansa a mangyebkas iti pammatida. (1 Cor. 10:24) Usigentayo no kasanotayo a maaramid dayta.

13. Ania dagiti mabalin nga aramidentayo tapno ad-adu ti agkomento?

¹³ Umuna, kanayon nga agkomentotayo iti ababa, tapno ad-adu ti makapagkomento. Dagiti panglakayen ken dadduma pay nga eksperiensiado a kakabsat ket mabalin a mangipakita iti ulidan. Uray no ababa ti komentom, saanka a mangdakamat iti adu unay a punto. No kimarem wenno komentuam ti intero a parapo, awanen ti maisungbat ti dadduma. Kas pagarigan, iti daytoy a parapo, adda dua a suhestion—kanayon nga agkomentotayo iti ababa ken saantayo a mangdakamat iti adu unay a punto. No sika ti umuna a maayaban nga agkomento iti daytoy a parapo, maysa laeng a punto ti komentuam.

14. Ania ti makatulong tapno ammotayo no kasanotayo kasansan nga agitayag? (Kitaen met ti ladawan.)

¹⁴ Panunotem a naimbag no kasano kasansan nga agitayagka. No tayagtayo a tayag, mabalin a mapilitan ti agikonkondukta a maulit-ulit a mangawag kadatayo uray no saan pay a nakapagkomento ti dadduma. Mabalin a maupayda ket saandan nga agitayag.—Ecl. 3:7.

15. (a) Ania ti reaksiontayo no saantayo a maayaban nga agkomento? (b) Kasano a maipakita dagiti agikonkondukta ti konsiderasion iti amin? (Kitaen ti kahon a “ No Sika ti Agikonkondukta.”)

¹⁵ No adu a kakabsat ti agitaytayag bayat ti  panagadal, mabalin a saantayo a makapagkomento iti kasansan a kayattayo. No dadduma, mabalin a dinatayo pulos maayaban ti agikonkondukta. Makapaupay dayta, ngem saan koma nga agsakit ti nakemtayo no saannatayo nga inayaban.—Ecl. 7:9.

16. Kasanotayo a maparegta dagidiay nagkomento?

¹⁶ No saanka a nakapagkomento kas iti kasansan a kayatmo, dumngegka a naimbag bayat nga agkomkomento ti dadduma. Kalpasan ti gimong, komendaram ida gapu iti komentoda. Mabalin nga ibilang dagiti kakabsat a makaparegta ti komendasionmo kas kadagiti sungbatmo a saanmo a naikomento. (Prov. 10:21) Ti panangkomendar ket sabali pay a pamay-an tapno makapagpipinnaregtatayo.

17. (a) Kasano a matulongan dagiti nagannak dagiti annakda a mangisagana kadagiti maitutop a komento? (b) Sigun iti video, ania ti uppat a pamay-an iti panangisagana iti komento? (Kitaen met ti footnote.)

¹⁷ Kasanotayo pay a makapagpipinnaregta kadagiti gimong? No maysaka nga ama wenno ina, tulongam dagiti annakmo a mangisagana kadagiti komento a maitutop iti edadda. (Mat. 21:16) Adda dagiti tiempo a serioso a banag ti mausig bayat ti panagadal kas kadagiti problema dagiti agassawa wenno kadagiti isyu maipapan iti moral. Ngem posible nga adda maysa wenno dua a parapo a mabalin a komentuan ti anakyo. Kasta met, ipaawatyo iti annakyo no apay a mabalin a saanda a maawagan kada agitayagda. Iti kasta, saanda a  maupay no sabali ti maawagan imbes nga isuda.—1 Tim. 6:18. d

18. No agkomkomentotayo, ania ti aramidentayo tapno saan nga iti bagitayo ti pakaiturongan ti atension? (Proverbio 27:2)

¹⁸ Amintayo ket makaisagana kadagiti makapabileg a komento a mangidaydayaw ken Jehova ken mangparegta kadagiti padatayo a Kristiano. (Prov. 25:11) Uray no mabalin nga adda dagiti tiempo nga iyestoriatayo iti ababa ti personal a kapadasantayo, masapul a ditay isentro unay iti bagitayo dagiti komentotayo. (Basaen ti Proverbio 27:2; 2 Cor. 10:18) Imbes ketdi, ikagumaantayo nga isentro dagita ken Jehova, iti Saona, ken iti ilina. (Apoc. 4:11) Siempre, no masapul a personal ti sungbat iti saludsod ti maysa a parapo, maitutop laeng dayta. Kasta ti saludsod iti sumaruno a parapo iti daytoy nga artikulo.

19. (a) Ania ti resultana no ipakpakitatayo ti konsiderasion iti amin a nakigimong? (Roma 1:11, 12) (b) Ania ti personal nga ap-apresiarem maipapan iti panagkomento kadagiti gimong?

¹⁹ Awan met ketdi dagiti istrikto a pagannurotan iti panagkomento. Ngem ikagkagumaantayo amin a pagbalinen a makaparegta dagiti komentotayo. Mabalin a kaipapanan dayta a masansan nga agkomentotayo. Wenno baka kontentotayon uray no manmanotayo a maawagan. Naragsaktay ketdi ta adda gundaway ti dadduma nga agkomento. No nakapokustayo iti pagimbagan ti dadduma, “makapagpipinnaregtatayo” kadagiti gimong ti kongregasion.—Basaen ti Roma 1:11, 12.