1. Deskribirem ti napasamak idi inaramid ni Jesus ti umuna a milagrona.

 PANUNOTEM ti napasamak iti maudi a paset ti 29 C.E. Karugrugi idi ti ministerio ni Jesus. Ni Jesus ken ti nanangna a ni Maria ken ti dadduma kadagiti adalanna ket naawis iti maysa a selebrasion ti kasar idiay Cana, maysa a purok iti amianan ti Nazaret nga ili ni Jesus. Ni Maria ket gayyem ti pamilia ti kakaskasar ken agparang a tumultulong a mangasikaso kadagiti bisita. Ngem bayat ti selebrasion ti kasar, adda timmaud a problema a mabalin a pakaibabainan unay ti pamilia ken ti kakaskasar—naibusen ti arak. b Posible nga ad-adu ti bisita ngem iti ninamnamada. Dagus a napan kinasarita ni Maria ti anakna ken imbagana: “Awanen ti arakda.” (Juan 2:1-3) Ania ti aramiden ni Jesus? Nangaramid iti karkarna wenno ekstraordinario—simimilagro a pinagbalinna ti danum a “nasayaat nga arak.”—Juan 2:9, 10.

2-3. (a) Kasano nga inusar ni Jesus ti pannakabalinna nga agaramid iti milagro? (b) Ania ti maitulong kadatayo ti panangusig kadagiti milagro ni Jesus?

² Bayat ti ministerio ni Jesus, adu pay a milagro ti inaramidna. c Inusarna ti pannakabalinna nga agaramid iti milagro tapno matulonganna ti rinibu a tattao. Alaentayo a pagarigan ti dua laeng kadagiti milagrona—ti panangpakanna iti 5,000 a lallaki ken iti 4,000 a lallaki idi agangay. Mabalin nga agdagup iti  nasurok a 27,000 ti natulongan no iramantayo dagiti babbai ken ubbing nga adda met idi sadiay. (Mat. 14:15-21; 15:32-38) Kadagita a gundaway, pinaimbag met ni Jesus ti adu a masakit. (Mat. 14:14; 15:30, 31) Permi la ketdi ti siddaaw dagidiay a nagadu a tattao idi simimilagro a pinaimbag ken pinakan ida ni Jesus!

³ Adu ti masursurotayo kadagiti milagro ni Jesus. Iti daytoy nga artikulo, pagsasaritaantayo ti dadduma nga isuro dagita a milagro a mangpabileg iti pammatitayo. Kalpasanna, adalentayo no kasano a matuladtayo ti kinapakumbaba ken asi nga impakita ni Jesus idi nangaramid kadagiti milagro.

4. Maipapan kadagiti siasino ti isuro dagiti mangpabileg-pammati a milagro ni Jesus?

⁴ Adda dagiti mangpabileg-pammati a masursurotayo kadagiti milagro ni Jesus, saan la a maipapan kenkuana no di ket maipapan pay ken Amana. Ngamin, ni Jehova ti pudno a nagtaudan ti pannakabalin ni Jesus isu a naaramidna dagidiay a milagro. Kuna ti Aramid 10:38: “Dinutokan ti Dios [ni Jesus] babaen ti nasantuan nga espiritu ken pannakabalin, ket napan iti nagduduma a paset ti daga a nagaramid iti naimbag ken pinaimbagna ti amin a pinarigat ti Diablo, ta adda kenkuana ti Dios.” Laglagipentayo met nga iti amin nga imbaga ken inaramid ni Jesus—agraman dagiti milagro nga inaramidna—perpekto a tinuladna ti panagpampanunot ken rikrikna ni Amana. (Juan 14:9) Usigentayo ti tallo a masursurotayo kadagiti milagro ni Jesus.

5. Apay a nagaramid ni Jesus kadagiti milagro? (Mateo 20:30-34)

⁵ Umuna, ay-ayatendatayo unay ni Jesus ken ti Amana. Bayat nga adda ni Jesus ditoy daga, impakitana ti kinauneg ti panagayatna kadagiti tattao babaen ti panangusarna iti pannakabalinna nga agaramid iti milagro tapno tulonganna dagiti agsagsagaba. Iti maysa a gundaway, nagpukkaw ti dua a bulsek a lallaki tapno agpatulongda kenkuana. (Basaen ti Mateo 20:30-34.) Siputanyo ta ni Jesus ket “naasian” isu a pinaimbagna ida. Ti Griego a sao a nausar ditoy a naipatarus kas “naasian” tukoyenna ti kasta unay a pannakipagrikna a marikna iti kaunggan. Ti kasta unay nga asi, a pakakitaan iti ayat, ti nangtignay met ken Jesus a mangpakan kadagiti mabisin ken mangpaimbag iti maysa nga agkukutel. (Mat. 15:32; Mar. 1:41) Masiguradotayo nga ay-ayatennatayo unay ni Jehova, ti Dios ti ‘ayat ken asi,’ ken ay-ayatennatayo met unay ti Anakna. Masaksaktan ti riknada iti panagsagabatayo. (Luc. 1:78; 1 Ped. 5:7) Sigurado a magagaranda unayen a mangikkat iti amin a problema a mangparparigat iti amin a tattao!

6. Ania a pannakabalin ti inted ti Dios ken Jesus?

⁶ Maikadua, ti Dios inikkanna ni Jesus iti pannakabalin a mangsolbar iti amin a problema ti amin a tao. Nagaramid ni Jesus kadagiti milagro tapno ipakitana ti pannakabalinna a mangsolbar iti amin a problema a ditay pulos masolbar a datdatayo. Kas pagarigan, adda pannakabalinna a mangparut iti ramut dagiti problema ti amin a tao—ti natawid a basol ken dagiti epektona, agraman ti sakit ken ipapatay. (Mat. 9:1-6; Roma 5:12, 18, 19) Pinaneknekan dagiti milagrona a mapaimbagna “ti nadumaduma” a sakit ken mapagungarna pay ketdi dagiti natay. (Mat. 4:23; Juan 11:43, 44) Adda met pannakabalinna a mangkontrol iti nakapigpigsa nga angin ken mangparuar kadagiti demonio a nanglugan kadagiti tattao. (Mar. 4:37-39; Luc. 8:2) Makaparagsak a maammuan nga inikkan ni Jehova ti Anakna iti kasta a pannakabalin!

7-8. (a) Ania ti masiguradotayo gapu kadagiti milagro ni Jesus? (b) Ania a milagro ti kayatmo la unay a mapasamak iti um-umayen a baro a lubong?

 ⁷ Maikatlo, naan-anay a masiguradotayo a mapasamakto dagiti bendision iti masanguanan nga iyeg ti Pagarian ti Dios. Dagiti milagro nga inaramid ni Jesus idi nagbalin a tao ditoy daga isuroda kadatayo dagiti aramidennanto iti intero a daga kas ti nailangitan nga Ari ti Pagarian ti Dios. Kitaentayo dagiti asidegen a mapasamak kadatayo iti panagturay ni Kristo. Perpektonton ti salun-attayo, ta ikkatennanto ti amin a sakit ken pisikal a depekto a mangparparigat kadagiti tattao. (Isa. 33:24; 35:5, 6; Apoc. 21:3, 4) Ditayton pulos agbisin wenno agsagaba kadagiti natural a didigra. (Isa. 25:6; Mar. 4:41) Perminto ti ragsaktayo a mangabrasa kadagiti mapagungar nga ipatpategtayo iti biag manipud kadagiti “pakalaglagipan a tanem.” (Juan 5:28, 29) Ania a milagro ti kayatmo la unay a mapasamak iti um-umayen a baro a lubong?

⁸ Idi nagaramid ni Jesus kadagiti milagro, impakitana ti kasta unay a kinapakumbaba ken asi—dagiti kualidad a nagsayaat a tuladentayo. Usigentayo ti dua a pagarigan. Umuna, ti salaysay maipapan iti selebrasion ti kasar idiay Cana.

9. Ania ti inaramid ni Jesus iti selebrasion ti kasar? (Juan 2:6-10)

⁹ Basaen ti Juan 2:6-10. Idi naibusen ti arak iti selebrasion ti kasar, kasapulan kadi  nga adda aramiden ni Jesus? Awan. Awan ti padto a nangipakpakauna a ti Mesias ket mangaramid iti arak babaen ti milagro. Ngem ania ngata ti mariknam no naibusen dagiti ipainummo kadagiti bisitam iti mismo a kasarmo? Naasian la ketdi ni Jesus iti pamilia, nangruna iti kakaskasar, ken saanna a kayat a maibabainda. Isu a kas nadakamat iti rugrugi, nangaramid iti milagro. Pinagbalinna ti agarup 390 a litro (103 gal) a danum a nagsayaat nga arak. Mabalin a nangaramid iti kasta kaadu tapno adda mabati nga usaren ti kakaskasar iti masanguanan wenno mabalin nga ilakoda pay ketdi tapno makatulong kadakuada iti pinansial. Sigurado nga agyamyaman unay idi ti kakaskasar!

10. Ania ti dadduma a napateg a detalye iti salaysay iti Juan kapitulo 2? (Kitaen met ti ladawan.)

¹⁰ Usigentayo ti dadduma a napateg a detalye iti salaysay iti Juan kapitulo 2. Nadlawyo kadi a saan a ni Jesus ti nangpunno kadagiti burnay iti danum? Imbes nga iturongna ti atension iti bagina, imbagana kadagiti adipen a punnuenda dagiti burnay. (Bersikulo 6, 7) Ket idi napagbalinen ni Jesus ti danum nga arak, saan a nangtako iti arak tapno ipanna iti direktor ti kasar. Dagiti ketdi adipen ti imbagana a mangaramid iti dayta. (Bersikulo 8) Sigurado a saan a nangala ni Jesus iti sangakopa nga arak, sana impakita dayta kadagiti bisita ken impangasna, ‘Ramananyo ti kaar-aramidko nga arak!’

11. Ania dagiti masursurotayo iti milagro ni Jesus?

¹¹ Ania dagiti masursurotayo iti milagro ni Jesus a pinagbalinna ti danum nga arak? Kinapakumbaba. Saan nga impannakkel ni Jesus ti inaramidna a milagro; kinapudnona, dina pulos impannakkel dagiti naaramidanna. Sipapakumbaba ketdi ken kanayon nga intedna ken Amana ti amin a dayag ken dayaw. (Juan 5:19, 30; 8:28) Matuladtayo ni Jesus no kanayontayo a napakumbaba. Ditay ipannakkel dagiti nagapuanantayo. Aniaman ti mabalintayo nga aramiden iti panagserbitayo ken Jehova, saan a ti bagitayo ti ipannakkeltayo no di ket ti nagsayaat a Dios a pribilehiotayo a pagserbian. (Jer. 9:23, 24) Itedtayo kenkuana ti amin a dayaw. Ngamin, adda kadi nasayaat a maaramidantayo no awan ti tulong ni Jehova?—1 Cor. 1:26-31.

12. Ania pay ti pamay-an a matuladtayo ti kinapakumbaba ni Jesus? Mangted iti pagarigan.

¹² Usigentayo ti sabali pay a pamay-an a matuladtayo ti kinapakumbaba ni Jesus. Kas pagarigan, adu nga oras a tinultulongan ti maysa a panglakayen ti agtutubo a ministerial nga adipen a mangisagana iti damo a palawagna iti publiko. Kas resultana, nagustuan ti kongregasion ti makaparegta a palawag ti agtutubo a brother. Kalpasan ti gimong, adda immasideg iti panglakayen ken imbagana: ‘Nagmayat diay palawag ni Brother kua, ’nia?’ Masapul kadi nga ibaga ti panglakayen: ‘Wen a, ta adu nga oras a tinultulongak’? Wenno sipapakumbaba nga ibagana: ‘Wen, ipagpannakkelko unay isuna’? No napakumbabatayo, masapul a saantayo nga iturong ti dayaw iti bagitayo gapu kadagiti nasayaat nga ar-aramidentayo para iti dadduma. Mapnektayon iti pannakaammo a makitkita ken ipatpateg ni Jehova dagiti ar-aramidentayo. (Idilig ti Mateo 6:2-4; Heb. 13:16) Sigurado a maparparagsaktayo ni Jehova no tultuladentayo ti kinapakumbaba ni Jesus.—1 Ped. 5:6.

13. Ania ti nakita ni Jesus iti asideg ti siudad ti Nain, ken ania ti inaramidna? (Lucas 7:11-15)

¹³ Basaen ti Lucas 7:11-15. Imadyinentayo daytoy nga eksena a napasamak agarup iti katengngaan ti ministerio ni Jesus. Mapmapan idi idiay Nain, a maysa a siudad iti Galilea nga  asideg iti Sunem, a nangpagungaran ni propeta Eliseo iti barito ti maysa a babai agarup 900 a tawenen ti napalabas. (2 Ar. 4:32-37) Bayat nga umas-asideg ni Jesus iti ruangan, nakitana ti nagadu a tattao a rumrummuar iti siudad ta adda ipumponda. Nakalidliday ti eksena—adda balo a natay ti kakaisuna nga anakna. Ngem saan nga agmaymaysa ti malmaldaang nga ina; adu a taga-siudad ti kimmuyog kenkuana. Pinasardeng ni Jesus ti pannagnada ken adda inaramidna a nakaskasdaaw para iti daytoy malmaldaang nga ina—pinagungarna ti anak dayta a balo! Dayta a lalaki ti immuna kadagiti tallo a pinagungar ni Jesus nga espesipiko a nadakamat kadagiti Ebanghelio.

14. Ania ti dadduma a napateg a detalye iti salaysay iti Lucas kapitulo 7? (Kitaen met ti ladawan.)

¹⁴ Usigentayo ti dadduma a napateg a detalye iti salaysay iti Lucas kapitulo 7. Nadlawyo kadi a ‘nakita’ ni Jesus ti malmaldaang nga ina isu a “naasian”? (Bersikulo 13) Naasian unay ni Jesus iti nakitana—mabalin a ti panagsangit ti balo bayat a magmagna iti sanguanan ti bangkay ti anakna. Saan la a narikna ni Jesus ti asi para iti dayta nga ina; impakitana pay ti asina kenkuana. Sigurado a makaliwliwa ti tono ti boses ni Jesus idi kinasaritana, sa imbagana: “Isardengmon ti agsangit.” Kalpasanna, adda inaramidna tapno matulonganna dayta a balo. Pinagungarna ti natay a lalaki sa ‘inyasidegna iti inana.’—Bersikulo 14, 15.

15. Ania dagiti masursurotayo iti milagro ni Jesus?

¹⁵ Ania dagiti masursurotayo iti milagro ni Jesus a panangpagungarna iti anak ti balo? Masapul nga ipakitatayo ti asi kadagiti malmaldaangan. Siempre, saantayo a mapagungar dagiti natay, kas iti inaramid ni Jesus. Ngem kas kenkuana, agbalintayo a naasi kadagiti natayan babaen ti panagbalintayo a managobserbar. Datayo koma ti umuna a mangipakita iti asi iti sao ken aramid tapno matulongan ken maliwliwatayo ida. d (Prov. 17:17; 2 Cor. 1:3, 4; 1 Ped. 3:8) Nagdakkel ti maaramidan uray ti simple laeng a sasao ken aramid.

16. Kas nayakto iti ladawan, ania ti masursurom iti kapadasan ti maysa nga ina a nabiit pay a natay ti anakna?

 ¹⁶ Kitaentayo ti maysa a kapadasan. Sumagmamano a tawenen ti napalabas, bayat ti panagkanta iti maysa a gimong, adda sister a nakadlaw nga aglulua ti maysa nga ina iti asidegna. Nadakamat iti kanta ti namnama a panagungar. Nabiit pay ngamin a natay ti balasitangna. Ammo dayta ti sister, isu nga inasitgan, kinallabay, ken dinanggayanna nga agkanta iti nabatbati a paset ti kanta. Idi agangay, kinuna ti ina: “Nariknak nga ay-ayatendak unay dagiti kakabsat.” Agyamyaman unay ta nakigimong. Imbagana, “Iti Kingdom Hall a maawatmi ti tulong a kasapulanmi.” Masiguradotayo a makitkita ken ipatpateg ni Jehova uray dagiti simple nga ar-aramidentayo tapno maipakitatayo ti asi kadagiti natayan a “nadudog ti espirituda.”—Sal. 34:18.

17. Ania dagiti nasursurotayo iti daytoy nga artikulo?

¹⁷ Dagiti milagro ni Jesus iti salaysay dagiti Ebanghelio ket maysa a proyekto iti panagadal a mangpabileg iti pammati. Isuroda kadatayo nga ay-ayatendatayo unay da Jehova ken Jesus, addaan ni Jesus iti pannakabalin a mangsolbar iti amin a problema ti amin a tao, ken naan-anay a masiguradotayo a matungpalto dagiti naikari a bendision nga asidegen nga iyeg ti Pagarian. Bayat nga us-usigentayo dagita a salaysay, makapanunottayo kadagiti pamay-an a mabalin a matuladtayo dagiti kualidad ni Jesus. Mabalin kadi nga iti inyeskediulyo a personal a panagadal wenno Panagdaydayaw ti Pamilia, pagbalinenyo a proyekto ti panangadal iti dadduma pay a milagro ni Jesus? Kitaenyo no ania dagiti masursuroyo ken iranudyo dagita iti sabsabali. Makapabilegto la ketdi dagiti panagiinnestoriayo!—Roma 1:11, 12.

18. Ania ti pagsasaritaantayo iti sumaruno nga artikulo?

¹⁸ Idi dandanin agpatingga ti ministerio ni Jesus, inaramidna ti maikatlo ken maudi a panangpagungarna a nairekord iti Biblia. Ngem naiduma daytoy—pinagungarna ti patpatgenna a gayyem, ken inaramidna dayta iti naiduma a kasasaad. Ania dagiti masursurotayo iti dayta a milagro a naisalaysay iti Ebanghelio? Ken kasanotayo a mapabileg ti pammatitayo iti namnama a panagungar? Sungbatan ti sumaruno nga artikulo dagita a saludsod.