1, 2. (a) Kasano a natungpal ti Isaias 60:22 iti daytoy panawen ti panungpalan? (b) Ania dagiti kasapulan iti organisasion ni Jehova ditoy daga ita?

“DAYDIAY met laeng bassit agbalinto a sangaribu, ket daydiay nagbassitan maysa a mannakabalin a nasion.” (Isa. 60:22) Matungtungpalen dayta a padto kadagitoy maudi nga aldaw. Ngamin, bayat ti tawen serbisio iti 2015, adda 8,220,105 nga agibumbunannag ti Pagarian nga aktibo a nakipaset iti panangasaba! Ti maudi a paset ti padto tignayenna koma ti amin a Kristiano, ta kinuna ti nailangitan nga Amatayo: “Siak, ni Jehova, papardasekto dayta iti bukodna a tiempo.” Kas kadagiti pasahero a nakalugan iti pumarpartak a lugan, mariknatayo a pumarpartak met ti trabaho a panangaramid iti adalan. Kasano a makiramramantayo iti dayta nga ipapartak? Ar-aramidentayo kadi ti amin a kabaelantayo kas naregta nga agibumbunannag ti Pagarian? Adu a kakabsat ti agap-aplay kas auxiliary ken regular pioneer. Saan kadi a makaparagsak a makita nga adu ti agserserbi iti lugar a dakdakkel iti panagkasapulan wenno makipaset iti dadduma pay a teokratiko nga aramid?

² Kasta met, makitatayo nga umad-adu ti kasapulan a trabahador. Agarup 2,000 a kongregasion ti mabubuangay kada tawen. No lima a panglakayen ti agserbi iti tunggal kongregasion, 10,000 ngarud a ministerial nga adipen ti masapul nga agbalin a kualipikado  a manangaywan iti kada tawen. Ipakita daytoy a rinibu a kakabsat a lallaki ti masapul a mangragpat kadagiti kualipikasion tapno agbalin a ministerial nga adipen. Kasta met, lallaki man wenno babbai, sigurado nga ‘adu ti aramidentayo iti trabaho ti Apo.’—1 Cor. 15:58.

3, 4. Ania ti kaipapanan kenka ti panangikagumaan a rumang-ay iti naespirituan?

³ Basaen ti 1 Timoteo 3:1. Ti Griego a sao a naipatarus a “ragragpatenna” kaipapananna nga ikagumaan a gaw-aten, nalabit daydiay saanmo a gagangay a magaw-at. Iti panangusar ni apostol Pablo iti dayta a sao, impaganetgetna a masapul ti panagregget tapno rumang-ay iti naespirituan. Panunotem ti maysa a kabsat a lalaki a mangpampanunot iti masanguananna iti kongregasion. Mabalin a saan pay nga agserserbi a ministerial nga adipen, ngem ammona a masapul a patanorenna dagiti naespirituan a kababalin. Umuna, ikagumaanna ti agbalin a kualipikado a ministerial nga adipen. Inton agangay, namnamaenna ti agbalin a kualipikado nga agserbi a panglakayen. Iti tunggal kasasaad, ikagumaanna a ragpaten dagiti kualipikasion a kasapulan tapno maibaklayna dagiti kanayonan a rebbengen iti kongregasion.

⁴ Kasta met, dagiti kakabsat a lallaki ken babbai nga agtarigagay nga agserbi kas payunir, Bethelite, wenno agboluntario nga agibangon kadagiti Kingdom Hall, agreggetda a mangragpat kadagiti kalatda. Usigentayo no kasano nga iparegta ti Sao ti Dios iti amin ti irarang-ay iti pudno a panagdayaw.

5. Kasano nga us-usaren dagiti agtutubo ti pigsada nga agserbi iti Pagarian?

⁵ Napigsa dagiti agtutubo isu nga adu ti maaramidanda iti panagserbi ken Jehova. (Basaen ti Proverbio 20:29.) Dadduma nga agtutubo a lallaki iti Bethel ti agim-imprenta ken agar-aramid kadagiti Biblia ken literatura a naibatay iti Biblia. Adu nga agtutubo a kakabsat ti tumultulong iti panagibangon ken panangtarimaan kadagiti Kingdom Hall. No adda didigra, makiraman dagiti agtutubo kadagiti aduanen ti kapadasan a Saksi tapno tumulongda kadagiti nadidigra. Adu nga agtutubo a payunir ti tumultulong a mangidanon iti naimbag a damag kadagiti lokal ken sabali ti pagsasaoda a tattao.

6-8. (a) Kasano a binalbaliwan ti maysa nga agtutubo a lalaki ti panangmatmatna iti panagserbi iti Dios, ket ania ti resultana? (b) Kasano a mariknatayo ken ‘makitatayo a ni Jehova naimbag’?

⁶ Mabalin nga ibilangmo a napateg ti naimpusuan a panagserbi iti Dios. Ngem no ngay mariknam ti kas iti narikna idi ti kabsat nga agnagan iti Aaron? Nupay napadakkel iti Kristiano a pamilia, inaminna, “Para kaniak, makauma ti makigimong ken mangasaba.” Kayatna koma a maragsakan nga agserbi iti Dios ngem masmasdaaw no apay a saan. Ania ti inaramidna?

⁷ Nangaramid ni Aaron iti naespirituan a rutina a panagbasa iti Biblia, panagsagana maipaay kadagiti gimong, ken panagkomento. Kanayon metten nga agkararag. In-inut nga immuneg ti panagayatna ken Jehova ken rimmang-ay iti naespirituan. Manipud idin, maragragsakanen ni Aaron nga agpayunir ken makipagtrabaho iti dadduma a tumulong kadagiti nadidigra, ken mangasaba iti sabali a pagilian. Agserserbi itan ni Aaron iti Bethel ken maysan a panglakayen. Ania ti makunana iti inaramidna? “Nariknak ken nakitak a ‘ni Jehova naimbag.’ Gapu iti bendisionna, mariknak a dakkel ti utangko kenkuana ken matignayak nga ad-adda nga agserbi kenkuana, ket mangyeg dayta iti ad-adu a bendision.”

⁸ Inkanta ti salmista: ‘Dagidiay mangsapul ken Jehova, saandanto nga agkurang iti aniaman a naimbag.’ (Basaen ti Salmo 34:8-10.) Kinapudnona, saan a pulos paayen ni  Jehova dagiti naregta nga agserbi kenkuana. Talaga a mariknatayo ken ‘makitatayo a ni Jehova naimbag’ no aramidentayo ti amin a kabaelantayo nga agserbi kenkuana. No naimpusuan nga agserbitayo kenkuana, awan kaasping ti ragsak a mariknatayo.

9, 10. Apay a nakapatpateg nga ipakita ti ‘panaguray’?

⁹ Bayat a ragragpatem ti kalatmo, ikagumaam ti ‘aguray.’ (Mik. 7:7) Kanayon a tulongan ni Jehova dagiti matalek nga adipenna, uray pay no ipalubosna nga agurayda a maaddaan iti pribilehio wenno sumayaat ti kasasaadda. Inkarina ken Abraham a maaddaan iti anak a lalaki, ngem masapul nga aganus ken maaddaan iti pammati ni Abraham. (Heb. 6:12-15) Nupay adu a tawen a naguray ni Abraham sakbay a nayanak ni Isaac, saan a naawanan iti namnama, ket saan a pinaay ni Jehova.—Gen. 15:3, 4; 21:5.

¹⁰ Saan a nalaka ti aguray. (Prov. 13:12) No sangkapanunottayo dagiti pakaupayan, lallalo a maupaytayo. Imbes ketdi, usarentayo ti tiempotayo a mangparang-ay iti espiritualidadtayo. Kitaentayo ti tallo a pamay-an a maaramidtayo dayta.

11. Ania dagiti naespirituan a kababalin a masapul a patanorentayo, ket apay a napateg dagitoy?

¹¹ Patanoren dagiti naespirituan a kababalin. No basaen ken utobentayo ti Sao ti Dios, maaddaantayo iti sirib, pannakatarus, pannakaammo, ken nasimbeng a panunot. Mapatanortayo met ti abilidad nga agpanunot ken agdesision. Napateg dagita a kualidad kadagiti mangidadaulo iti pudno a panagdayaw. (Prov. 1:1-4; Tito 1:7-9) No basbasaentayo dagiti naibatay iti Biblia a publikasiontayo, maammuantayo dagiti pampanunot ti Dios  mainaig iti bambanag. Inaldaw nga agdesisiontayo mainaig iti paglinglingayan, panagbadbado, kuarta, ken iti pannakilangen iti sabsabali. No iyaplikartayo dagiti naadaltayo iti Biblia, makaaramidtayo kadagiti desision a makaay-ayo ken Jehova.

12. Kasano a mapaneknekan dagiti miembro ti kongregasion a mapagtalkanda?

¹² Paneknekam a mapagtalkanka. Datayo man ket lalaki wenno babai, aramidentayo ti amin a kabaelantayo a mangaramid iti aniaman a teokratiko a rebbengentayo. Kas gobernador, inikkan ni Nehemias iti rebbengen ti dadduma nga adipen ti Dios. Siasino dagiti dinutokanna? Dagiti managbuteng iti Dios, napudno, ken mapagtalkan. (Neh. 7:2; 13:12, 13) Kasta met ita, ti namnamaen dagiti manangaywan ket ti “tao masarakan a matalek.” (1 Cor. 4:2) Sigurado a madlaw dagiti nasayaat nga ar-aramid.—Basaen ti 1 Timoteo 5:25.

13. Kasano a matuladmo ti ulidan ni Jose no saan a nasayaat ti panangtrato ti dadduma kenka?

¹³ Bay-am a ni Jehova ti mamagbalin kenka a nasayaat a tao. Ania ti aramidem no saan a nasayaat ti panangtrato ti dadduma kenka? Mabalin a dagus a risutem dayta. Ngem no dadduma, no idepensam ti bagim ad-adda met a kumaro ti problema. Saan idi a nasayaat ti panangtrato dagiti kakabsat ni Jose kenkuana, ngem saan a nagimula iti sakit ti nakem. Idi agangay, siuulbod a napabasol ni Jose ken di nainkalintegan a naibalud. Nupay kasta, binay-anna a ni Jehova ti mangiwanwan kenkuana iti narigat a tiempo. Ania ti nagbanaganna? Pinasayaat, wenno “pinasudi ti mismo a sasao ni Jehova.” (Sal. 105:19) Idi nagpatingga dagita a pannubok, nagbalin a kualipikado ni Jose nga umawat iti naisangsangayan a rebbengen. (Gen. 41:37-44; 45:4-8) Bayat nga itultuloymo a sanguen dagiti narigat a problema, kiddawem ti sirib babaen iti kararag, agtignayka a sitatanang ken agsaoka a siaalumamay, ken agpatulongka iti Dios a pabilgennaka. Tulongannaka ni Jehova.—Basaen ti 1 Pedro 5:10.

14, 15. (a) Apay a kanayon koma nga ‘itultuloytayo nga asikasuen’ ti pamay-an ti panangasabatayo? (b) Kasano a makibagaytayo kadagiti agbaliwbaliw a kasasaad? (Kitaen ti ladawan iti rugi ti artikulo ken ti kahon a “ Kayatmo Kadi a Padasen ti Sabali a Pamay-an?”)

¹⁴ Imparegta ni Pablo ken Timoteo: “Itultuloymo nga igaed ti bagim iti panagbasa iti publiko, iti panangbagbaga, iti panangisuro. Itultuloymo nga asikasuen ti bagim ken ti isursurom.” (1 Tim. 4:13, 16) Nalaingen a manangaskasaba iti Pagarian ni Timoteo. Ngem epektibo laeng ti ministeriona no ‘itultuloyna nga asikasuen’ ti panangisurona. Saanna a namnamaen a kanayon nga aginteres dagiti tattao iti gagangay a pamay-an ti panangasabana. Tapno agtultuloy a madanonna ti puso dagiti tattao, masapul nga ibagayna ti pamay-an ti panangisurona iti kasapulanda. Kas manangaskasaba iti Pagarian, kasta met laeng ti aramidentayo.

¹⁵ Masansan nga awan ti tao a masarakantayo no agbalaybalaytayo. Iti dadduma a lugar, saantayo a makastrek kadagiti apartment ken kadagiti napaderan a komunidad. No kasta ti teritoriayo, padasenyo ti dadduma a pamay-an ti panangikasaba iti naimbag a damag.

16. Apay nga epektibo ti panangasaba iti publiko?

¹⁶ Ti panangasaba iti publiko ket maysa a nagsayaat a pamay-an tapno maisaknap ti naimbag a damag. Babaen iti dayta, epektibo ken makagunggona ti panangasaba ti adu a Saksi. Makisaritada kadagiti tattao iti estasion ti bus ken tren, kadagiti plasa ken parke, ken dadduma pay a lugar. Nataktika a rugian ti maysa a Saksi ti makisarita iti maysa a tao babaen ti panangkomentona iti damdamag, panangapresiarna iti annak ti kasaritana, wenno panagsaludsodna maipapan iti trabahona. Bayat ti panagsaritada, mabalin a  mangibaga ti agibumbunannag iti maysa a teksto ket denggenna ti sungbat ti kasarsaritana. Masansan a ti komento ti tao ti mangiturong iti ad-adu a panagsarita maipapan iti Biblia.

17, 18. (a) Kasano nga agbalinka a natured a mangasaba iti publiko? (b) Apay a napateg kenka ti kababalin ni David a nangidayaw ken Jehova bayat nga itultuloymo ti ministeriom?

¹⁷ No marigatankayo a mangasaba iti publiko, saankayo a maupay. Ni Eddie a maysa a payunir idiay New York City, saanna idi a kayat ti makisarita kadagiti tattao iti publiko. Ngem naaddaan iti tured idi agangay. Ania ti nakatulong kenkuana? Kinunana: “Bayat ti panagdaydayaw ti pamilia, sukimatenmi ken baketko ti sungbat dagiti opinion ken saludsod dagiti tattao. Nagdamagkami met kadagiti singasing ti dadduma a Saksi.” Ita, maragragsakanen ni Eddie a mangasaba iti publiko.

¹⁸ Bayat a lumalaing ken tumurturedka a mangasaba, makitanton ti panagrang-aymo iti naespirituan. (Basaen ti 1 Timoteo 4:15.) Kasta met, sigurado a maidaydayawmo ti nailangitan nga Amatayo kas iti inaramid ni David, a nangikanta: “Bendituekto ni Jehova iti amin a tiempo; patinayon a ti pakaidaydayawanna addanto iti ngiwatko. Gapu ken Jehova agpasindayagto ti kararuak; dagidiay naemma mangngegdanto ket agrag-odanto.” (Sal. 34:1, 2) Ket mabalin a kas resulta ti ministeriom, maragsakan dagiti nasingpet a makikadua kenka iti pudno a panagdayaw.

19. Apay nga agbalin koma a naragsak ti maysa a matalek nga adipen ni Jehova uray no adda dagiti makalapped a kasasaad?

¹⁹ Inkanta pay ni David: ‘Amin nga ar-aramidmo idayawdakanto, O Jehova, ket dagidiay nasungdo kenka bendituendakanto. Ti maipapan iti dayag ti kinaarim saritaendanto, ket ti maipapan iti pannakabalinmo sawendanto, tapno ipakaammoda iti annak ti tattao ti mannakabalin nga ar-aramidmo ken ti dayag ti kinangayed ti kinaarim.’ (Sal. 145:10-12) Sigurado nga ipakita dagitoy a sasao ti rikrikna ti amin a matalek a Saksi ni Jehova. Ngem kasano ngay no limitado ti maaramidam iti ministerio gapu iti sakit wenno edadmo? Laglagipem a no iranranudmo ti naimbag a damag kadagiti paraaywan ken iti dadduma, maidaydayaw ti nagsayaat a Diostayo gapu iti sagrado a panagserbim. No maibaludka gapu iti pammatim, mabalin nga ibagam ti kinapudno no ipalubos ti kasasaad, ket makaparagsak dayta ken Jehova. (Prov. 27:11) Kasta met laeng ti epektona uray saan a Saksi ti pamiliam ngem itultuloymo dagiti naespirituan nga aktibidadmo. (1 Ped. 3:1-4) Uray no narigat ti kasasaad, maidaydayawmo ni Jehova ken mabalin a rumang-ayka iti naespirituan.

20, 21. No ad-adu a trabaho ti naitalek kenka iti organisasion ni Jehova, kasano nga agbalinka a bendision iti sabsabali?

²⁰ Sigurado a bendisionannaka ni Jehova no itultuloymo ti rumang-ay iti naespirituan. Nalabit no baliwam ti eskediulmo wenno wagas ti panagbiagmo, mabalin nga ad-adu ti maaramidam iti panangikasaba iti nagpateg a kinapudno maipapan iti Dios kadagiti agkasapulan iti namnama. Kasta met, ti irarang-aymo iti naespirituan ken ti panagsakripisiom ket talaga a makagunggona kadagiti kapammatiam. Gapu iti napakumbaba a panagreggetmo iti kongregasion, ipateg, apresiaren, ken tulongandaka dagiti mangay-ayat ken Jehova.

²¹ Adu man a tawenen wenno sumagmamano a bulan laeng nga agserserbitayo ken Jehova, mabalin a rumang-aytayo amin iti panagdayaw kenkuana. Ngem kasano a makatulong dagiti nataengan a Kristiano kadagiti kabbaro tapno rumang-ayda iti naespirituan? Pagsasaritaantayo dayta iti sumaganad a panagadal.