Biroken ti Banag a Napatpateg Ngem Balitok
Nakasarakka kadin iti sangatukel a balitok? Manmano a tattao ti nakasarak iti kasta. Ngem minilion ti nakasarak iti napatpateg ngem dayta. Dayta ti sirib a nagtaud iti Dios, ket ‘saan a maited a kasukat ti puro a balitok.’—Job 28:12, 15.
ADDA pagpadaan dagiti napasnek nga agad-adal iti Biblia ken dagiti agbirbirok iti balitok. Masapul a nagaget nga agtrabaho dagitoy ken itultuloyda a sukimaten ti Kasuratan tapno masarakanda ti di magatadan a sirib. Kas estudiante ti Biblia, ania ti maadaltayo no usigentayo ti tallo a pamay-an ti panagbirok iti balitok?
NAKABIROKKA ITI BALITOK!
Panunotem a magmagnaka iti igid ti karayan ket adda nakitam a gumilgilap a bassit a bato gapu iti lawag ti init. Pinidutmo ket maragsakanka ta nakasarakka iti sangatukel a balitok. Basbassit pay dayta ngem ti ulo ti posporo ken manmano a masarakan ngem ti nangato ti kalidadna a diamante. Siempre, kitaem ti aglawlaw no adda pay.
Umasping iti dayta, mabalin nga adda idi Saksi ni Jehova nga immay iti balaymo a nangilawlawag iti namnama a masarakan iti Biblia. Nalabit malagipmo pay ti nasarakam nga arigna umuna a sangatukel a naespirituan a balitok. Mabalin nga idi damo a nakitam iti Biblia a Jehova ti nagan ti Dios. (Sal. 83:18) Wenno nalabit idi naammuam a mabalinmo ti agbalin a gayyem ni Jehova. (Sant. 2:23) Ammom a dagus a nakasarakka iti napatpateg pay ngem balitok! Ket mabalin a magagaranka a makasarak iti ad-adu pay a naespirituan a balitok.
AD-ADU PAY TI NASARAKAM!
Maurnong dagiti kasla rinet wenno darat ti kabassitna a balitok iti waig ken karayan. No dadduma, mabalin a makasarak dagiti nagaget nga agsapsapul iti balitok iti sumagmamano a kilo a balitok, nga aggatad iti pinullo a ribu a doliar.
Idi nakipagadalka iti Biblia iti maysa a Saksi ni Jehova, mabalin nga inyarigmo ti bagim iti agbirbirok iti balitok nga agyakayak iti naurnong a balitok. Ti panangpanunotmo kadagiti bersikulo ti Biblia ti nangpaadu iti pannakaammom, ket rimmang-ay ti espiritualidadmo. Bayat a pinampanunotmo dagiti napateg a kinapudno iti Biblia, naammuam no kasano nga umadanika ken Jehova ken agtalinaed iti ayatna, a pampanunoten ti biag nga agnanayon iti masanguanan.—Sant. 4:8; Jud. 20, 21.
Kas iti nagaget nga agsapsapul iti balitok, ikagkagumaam kadi nga ammuen dagiti nagpateg a kinapudno iti Biblia?
No kasano a dagiti agyakyakayak nagagetda nga agbirok iti naurnong a nayanud a balitok, nalabit nagagetka met nga agsukimat iti napapateg a naespirituan a kinabaknang. Idi naammuam dagiti Mat. 28:19, 20.
kangrunaan a kinapudno iti Biblia, mabalin a natignayka a mangipaay iti biagmo ken Jehova ken agpabautisar.—ITULTULOYMO TI AGBIROK!
Ti agsapsapul iti balitok ket mabalin a makasarak kadagiti babassit a nagtutukel a balitok kadagiti narunaw idi a batbato. Dadduma kadagita a bato ti adu ti balitokna. Makali dagita a naba, wenno bato nga addaan balitok, sa magiling tapno maala ti balitok nga adda iti dayta. Mabalin a saan a makita a dagus ti balitok iti naba. Apay? Gapu ta ti nangato ti kalidadna a maysa a tonelada a naba ket mabalin nga addaan laeng iti 10 a gramo a balitok! Nupay kasta, para kadagiti minero, sulit ti panangminas iti dayta.
Masapul met ti panagregget tapno saan laeng a “ti pagdamdamuan a doktrina maipapan iti Kristo” ti maammuam. (Heb. 6:1, 2) Masapul nga ikagumaam nga ammuen dagiti baro a pannakaammo ken praktikal a sursuro manipud iti panagadalmo iti Biblia. Gapuna, ania ti maaramidam tapno masiguradom a nabunga ti panagadalmo iti Biblia, uray no adu a tawenen nga ad-adalem ti Biblia?
Interesadoka koma nga agsursuro. Siputam ken ipapusom dagiti impormasion a maammuam. Ikagumaam ti agsapul, ket makasarakka iti Kasuratan kadagiti napapateg nga arig balitok a sirib ken panangiwanwan a nagtaud iti Dios. (Roma 11:33) Tapno umadu ti pannakaammom iti Kasuratan, usarem a naimbag dagiti alikamen a magun-odan iti lengguahem. Anusam a biroken ti kasapulam a panangiwanwan ken ti sungbat dagiti saludsodmo maipapan iti Biblia. Saludsodem iti dadduma dagiti teksto ken artikulo a nangnangruna a nakaparegta ken nakatulong kadakuada. Iranudmo dagiti nakitam a makaparagsak a naammuam bayat ti panagadalmo iti Sao ti Dios.
Siempre, ti panggepmo ket saan laeng a tapno umadu ti pannakaammom. Namakdaar ni apostol Pablo a ti “pannakaammo mamagtangsit.” (1 Cor. 8:1) Ngarud, ikagumaam ti agtalinaed a napakumbaba ken maaddaan iti nabileg a pammati. Ti regular a panagdaydayaw ti pamilia ken ti personal a panagadal iti Biblia ket makatulong kenka tapno makapagbiagka a maitunos kadagiti pagalagadan ni Jehova. Matignayka met a tumulong iti sabsabali. Kangrunaanna, maragsakanka ta nakasarakka iti banag a napatpateg ngem balitok.—Prov. 3:13, 14.