Agduma ti salaysay da Mateo ken Lucas maipapan kadagiti pasamak a mainaig iti pannakayanak ken panagubing ni Jesus. Ngamin, agduma a salaysay ti nangipamaysaan dagitoy a mannurat ti Ebanghelio.

Impamaysa ni Mateo ti salaysayna kadagiti pasamak nga adda pakainaiganna ken Jose. Dinakamatna ti damo a reaksion ni Jose idi nagsikog ni Maria, idi inlawlawag ti anghel kenkuana ti situasion babaen ti tagtagainep, ken ti panangakseptarna iti dayta a pannakailawlawag. (Mat. 1:​19-25) Iti salaysay ni Mateo, dinakamatna pay ti panagtagtagainep ni Jose idi binilin ti anghel nga agkamang idiay Egipto, ti panagdaliasatna a kaduana ti pamiliana, idi nagtagtagainep a binilin ti anghel nga agsublin iti Israel, ti panagsublina, ken ti desisionna nga agnaed ti pamiliana idiay Nazaret. (Mat. 2:​13, 14, 19-23) Kadagiti umuna a kapitulo ti Ebanghelio ni Mateo, naminwalo a nadakamat ti nagan ni Jose idinto ta namimpat laeng ken Maria.

Impamaysa met ni Lucas ti salaysayna ken Maria. Ramanen dayta ti ibibisita ni anghel Gabriel ken Maria, ti ibibisitana iti kasinsinna a ni Elisabet, ken ti panangidaydayaw ni Maria ken Jehova. (Luc. 1:​26-56) Insurat met ni Lucas ti imbaga ni Simeon ken Maria maipapan iti panagsagabanto ni Jesus. Uray iti salaysay maipapan iti ibibisita ti pamiliana idiay templo idi agtawen ni Jesus iti 12, ti imbaga ni Maria ti insurat ni Lucas, saan a dagiti sasao ni Jose. Innayon ni Lucas a dakkel ti epekto dagitoy a pasamak ken Maria. (Luc. 2:​19, 34, 35, 48, 51) Iti umuna a dua a kapitulo ti Ebanghelio ni Lucas, namin-12 a nadakamat ti nagan ni Maria idinto ta namitlo laeng ken Jose. Gapuna, ad-adda nga inladawan ni Mateo dagiti inaramid ken aktibidad ni Jose idinto ta impamaysa met ni Lucas ti maipapan iti akem ken kapadasan ni Maria.

Malaksid iti dayta, agduma met ti insurat ti dua a mannurat maipapan iti pamilia a nagtaudan ni Jesus. Tinunton ni Mateo ti pamilia a nagtaudan ni Jose ken impakitana a ni Jesus, kas siuman ni Jose, ti legal nga agtawid iti kinaari ni David. Apay? Gapu ta ni Jose ket kaputotan ni Ari David iti anakna a ni Solomon. (Mat. 1:​6, 16) Tinunton met ni Lucas ti pamilia a nagtaudan ni Maria ken impakitana a ni Jesus ti rebbeng nga agtawid, “sigun iti lasag,” iti kinaari ni David. (Roma 1:3) Apay? Gapu ta ni Maria ket kaputotan ni Ari David iti anakna a ni Natan. (Luc. 3:31) Ngem apay a saan nga insurat ni Lucas ni Maria kas anak ni Heli nga amana? Gapu ta gagangay idi a dagiti nagan ti lallaki ti maisurat iti listaan ti nagtaudan ti pamilia. Ngarud, idi insurat ni Lucas ti nagan ni Jose ken imbagana nga isu ket anak ni Heli, kaawatan a tuktukoyenna ni Jose kas manugang ni Heli.​—Luc. 3:23.

Ti listaan ti nagtaudan ti pamilia nga insurat da Mateo ken Lucas ket nalawag a pammaneknek a ni Jesus ti naikari a Mesias. Kinapudnona, talaga a pagaammo ti linia ti pamilia ni Jesus ta uray dagiti Fariseo ken Saduceo saanda a mailibak dayta. Iti panawentayo, ti insurat da Mateo ken Lucas maipapan iti pamilia a nagtaudan ni Jesus ket agpada a paset ti nakaibatayan ti pammatitayo ken pammasingked a matungpal dagiti kari ti Dios.