1-3. Ania ti dadduma a rason a mabalin nga agbaliw ti annongen dagiti adda iti amin-tiempo a serbisio?

“KALPASAN ti 21 a naragsak a tawtawenmi kas misionero, agpapada nga agkasapulan iti tulong ti uppat a nagannakmi gapu ta nakapuyen ti salun-atda,” malagip da Robert ken Mary Jo. “Maragsakankami a mangaywan kadakuada. Ngem nasakit latta ti riknami a mangpanaw iti lugar nga impatpategmi.”

² “Nagsangitkami idi naammuanmi a saankamin a makasubli iti annongenmi gapu iti sakitmi,” kuna da William ken Terrie. “Nagpatinggan ti arapaapmi nga agserbi ken Jehova iti sabali a pagilian.”

³ “Ammomi a kayat dagiti manangidadanes a maiserra ti sanga nga opisina a pagserserbiak,” kuna ni Aleksey. “Ngem makapakigtot latta idi napasamak dayta ket masapul a panawanmi ti Bethel.”

4. Ania dagiti saludsod a pagsasaritaantayo iti daytoy nga artikulo?

⁴ Kasta met, naikkan iti baro nga annongen ti rinibu nga adda iti special full-time service, a pakairamanan dagiti Bethelite. * Mabalin a marigatan dagitoy a matalek a kakabsat a lallaki ken babbai a mangpanaw iti ipatpategda nga annongen. Ania ti makatulong kadakuada a mangsango iti dayta a panagbalbaliw? Kasanom a matulongan ida? Ti sungbat kadagita a saludsod ket makatulong kadatayo amin no agbaliw ti kasasaadtayo.

5. Ania ti mabalin nga epekto kadatayo ti panagbaliw ti annongentayo?

⁵ Agserserbitayo man iti Bethel wenno iti dadduma pay a kita ti amin-tiempo a serbisio, masursurotayo nga ipateg dagiti tattao ken uray ti lugar a pagserserbiantayo. Isu a maladingitantayo no masapul a panawantayo ti annongentayo. Kailiwtayo dagiti mapanawantayo, ket madanagantayo iti kasasaadda, nangnangruna no pannakaidadanes ti rason a pumanawtayo. (Mat. 10:23; 2 Cor. 11:28, 29) Kanayonanna, masansan a makaikawa unay ti panangawat iti baro nga annongen wenno uray ti panagsubli iti lugartayo. “Saankamin a pamiliar iti bukodmi a kultura ken uray iti panangasaba iti bukodmi a lengguahe,” kuna da Robert ken Mary Jo. “Mariknami a kaslakami ganggannaet iti bukodmi a pagilian.” Ti dadduma a nagbaliw ti annongenda ket mabalin a bigla nga agproblema iti pinansial. Mabalin nga agduadua, madanagan, ken maupayda. Ania ti makatulong?

6. Kasano a makapagtalinaedtayo a nasinged ken Jehova?

⁶ Agtalinaed a nasinged ken Jehova. (Sant. 4:8) Kasanotayo a maaramid dayta? Babaen ti panagtalektayo kenkuana kas ti “Managdengngeg iti kararag.” (Sal. 65:2) “Iyebkasyo kenkuana dagiti linaon ti pusoyo,” kuna ti Salmo 62:8. Kabaelan ni Jehova nga aramiden ti “ad-adu pay ngem iti aglaplapusanan unay, nga agsobsobra pay iti amin a banag a kiddawen wenno mapanunottayo.” (Efe. 3:20) Saan laeng a ti espesipiko a kidkiddawentayo iti kararagtayo ti ipaayna. Mabalin nga aramidenna ti ditay ninamnama, iti labes ti aniaman a mapanunottayo, tapno masolbar dagiti problematayo.

7. (a) Ania ti makatulong tapno agtalinaedtayo a nasinged ken Jehova? (b) Sigun iti Hebreo 6:10-12, ania ti resultana no agtultuloytayo a matalek nga agserbi ken Jehova?

⁷ Tapno agtalinaedka a nasinged ken Jehova, inaldaw a basaem ti Kasuratan ken utobem dayta. Kuna ti maysa a dati a misionero: “Mantenerem ti regular a panagdaydayaw ti pamiliayo ken ti panagsagana iti gimong, kas iti ar-aramidem iti dati nga annongem.” Kasta met, itultuloymo nga ikagumaan nga ikasaba ti naimbag a damag iti baro a kongregasionmo. Laglagipen ni Jehova dagidiay agtultuloy a matalek nga agserserbi, uray no saandan a  maaramid ti dati a maar-aramidanda.—Basaen ti Hebreo 6:10-12.

8. Kasano a matulongannaka ti 1 Juan 2:15-17 tapno agtalinaed a simple ti biagmo?

⁸ Pagtalinaedem a simple ti biagmo. Dimo ipalubos a ‘lapdan’ dagiti pakaringgoran iti lubong ni Satanas ti naespirituan nga aktibidadmo. (Mat. 13:22) Dika agpaimpluensia iti lubong wenno kadagiti kasla maseknan a gagayyem wenno kakabagiam a mangibagbaga a kasapulam ti agurnong iti ad-adu a kuarta tapno nasaysayaat ti biagmo. (Basaen ti 1 Juan 2:15-17.) Agtalekka ken Jehova, a mangikarkari nga ipaayna ti amin a naespirituan, emosional, ken material a kasapulam iti “umiso a tiempo.”—Heb. 4:16; 13:5, 6.

9. Sigun iti Proverbio 22:3, 7, apay a napateg a liklikantayo ti di kasapulan a panagutang, ken ania ti makatulong tapno makapagdesisiontayo iti nasayaat?

⁹ Liklikam ti di kasapulan a panagutang. (Basaen ti Proverbio 22:3, 7.) Mabalin a dakkel ti magastos iti panagakar, ket nalaka ti mailumlom iti utang. Tapno maliklikam dayta, saanka nga umutang tapno laeng makagatangka iti bambanag a saanmo met a talaga a kasapulan. No maburburiborantayo, kas no ay-aywanantayo ti masakit nga ipatpategtayo, mabalin a marigatantayo nga agdesision no kasano kadakkel ti utangentayo. Iti kasta a situasion, laglagipem a makatulong ti “kararag ken panagpakaasi” tapno makapagdesisionka iti nasayaat. Kas sungbat ni Jehova iti kararagmo, itedna ti talna a ‘mangsalaknib iti puso ken isipmo,’ a tumulong kenka tapno kalmado a makapagpanunotka.—Fil. 4:6, 7; 1 Ped. 5:7.

10. Kasano a maaddaantayo iti baro a gagayyem?

¹⁰ Agtalinaedka a nasinged kadagidiay nasayaat ti impluensiana. Ibagam ti rikriknam ken kapadasam kadagiti nasinged a gagayyemmo, nangnangruna kadagidiay nakapadas iti kasasaadmo. Makatulong dayta tapno lumag-an ti riknam. (Ecl. 4:9, 10) Gagayyemmo latta dagiti nagbalin a gagayyemmo iti dati nga annongem. Ngem kasapulam ti baro a gagayyem iti baro nga annongem. Laglagipem a tapno maaddaanka iti gayyem, kasapulam ti agbalin a gayyem. Kasano? Iyestoriam dagiti nagsasayaat a kapadasam, ken ipakitam ti rag-om iti panagserbim ken Jehova. Uray no saan a matarusan ti dadduma iti kongregasion ti panangipategmo iti amin-tiempo a serbisio, mabalin nga adda dagiti interesado iti kapadasam ket agbalinda a nasayaat a gagayyemmo. Ngem laglagipem koma a saanmo a sangkaestoria dagiti naaramidam, ken saanka nga agpokus iti negatibo a rikriknam.

11. Ania ti aramidenyo tapno naragsak latta ti panagasawayo?

¹¹ No kasapulan a panawanyo ti annongenyo gapu iti salun-at ti asawam, dimo pabpabasolen  isuna. Ket no sika met ti adda problemana iti salun-at, dika koma makonsiensia, nga ipapanmo a pinaaymo ti asawam. Laglagipem a ‘maymaysakayo a lasag,’ ket inkariyo iti sanguanan ni Jehova nga aywananyo ti maysa ken maysa iti aniaman a kasasaad. (Mat. 19:5, 6) No pinanawanyo ti annongenyo gapu iti di naiplano a panagsikog, siguraduenyo a maammuan ti anakyo a napatpateg isuna ngem iti annongenyo. Ipasiguradoyo kenkuana nga ibilbilangyo kas “bendision” manipud iti Dios. (Sal. 127:3-5) Iyestoriayo met dagiti nagsasayaat a kapadasanyo iti dati nga annongenyo. No aramidenyo dayta, maparegtayo ti anakyo a mangusar iti biagna iti naragsak a panagserbi ken Jehova a kas kadakayo.

12. (a) Kasano a matulongantayo dagiti adda iti amin-tiempo a serbisio nga agtultuloy iti annongenda? (b) Kasano a matulongantayo dagiti nakaawat iti baro nga annongen tapno nalaklakada a maka-adjust?

¹² Makomendaran ti adu a kongregasion ken indibidual ta ar-aramidenda ti kabaelanda tapno agtalinaed iti annongenda dagiti adda iti amin-tiempo a serbisio. Iparparegtada nga agtultuloy dagitoy iti annongenda, mangipapaayda iti pinansial wenno dadduma pay a material a suporta, wenno tultulonganda ida a mangaywan kadagiti kapamiliada. (Gal. 6:2) No maipan iti kongregasionyo dagiti adda iti amin-tiempo a serbisio a nagbaliw ti annongenda, dimo koma panunoten a nakaaramidda iti dakes wenno nadisiplinada. * Imbes ketdi, tulongam ida tapno nalaklakada a maka-adjust. Sibabara nga abrasaem ida ken komendaram ti nagapuananda, uray no limitadon ti maaramidanda gapu iti nakapuy a  salun-atda. Am-ammuem ida. Adu ti masursurom iti pannakaammo, pannakasanay, ken kapadasanda.

13. Ania a tulong ti maipaaytayo kadagiti nakaawat iti baro nga annongen?

¹³ Iti damo, dagidiay nakaawat iti baro nga annongen mabalin a kasapulanda ti tulongmo tapno maaddaanda iti pagyanan, lugan, trabaho, ken dadduma pay a kangrunaan a kasapulanda. Baka kasapulanda met ti impormasion maipapan iti dadduma pay a banag, kas iti panagbayad iti buis ken panangala iti insurance. Kangrunaanna, kayatda a matarusantayo ti situasionda, imbes a maasiantayo kadakuada. Mabalin nga adda sakitda wenno ti maysa a kapamiliada. Baka agladladingitda iti ipapatay ti maysa nga ipatpategda. * Ken mabalin met a maladladingitanda, uray saanda nga ibagbaga, gapu ta kailiwda dagiti gagayyemda iti dati nga annongenda. Medio nabayag a mailiwliwag ti kasta a rikrikna, ket mabalin a narigat a maawatanda dayta.

14. Kasano a natulongan dagiti kakabsat ti maysa a sister tapno maka-adjust iti baro nga annongenna?

¹⁴ Kabayatanna, makatulong iti panag-adjust-da ti suporta ken ulidanmo. “Iti dati nga annongek, inaldaw a mangyadalak iti Biblia,” kuna ti maysa a sister nga adu a tawen a nagserbi iti sabali a pagilian. “Ngem ita, nagrigat uray laeng ti mangibasa iti teksto wenno mangipabuya iti video iti ministerio. Ngem inawisdak dagiti kakabsat iti panagsarungkar ken panangyadalda iti Biblia. Ti pannakakitak kadagidiay a naregta ken natured a kakabsat a mangyadal iti Biblia ti nangparegta kaniak nga agtultuloy a positibo. Nasursurok ti mangirugi iti saritaan iti baro a teritoriak. Nakatulong amin dagitoy tapno mapasublik ti rag-ok.”

15. Kasano a makapagballigika iti baro nga annongem?

¹⁵ Makapagballigika iti baro nga annongem. Dimo ibilang a napaayka wenno bassiten ti pategmo gapu iti dayta a panagbalbaliw. Panunotem ti adu a pamay-an a tultulongannaka ni Jehova iti agdama, ken itultuloymo ti mangasaba. Tuladem dagiti matalek a Kristiano idi  umuna a siglo. “Dagidiay naiwarawara napanda iti nagduduma a paset ti daga ket impakpakaammoda ti naimbag a damag ti sao ti Dios.” (Ara. 8:1, 4) Adu ti nasayaat a resultana no itultuloymo ti mangasaba. Kas pagarigan, dagiti payunir a napapanaw iti maysa a pagilian immakarda iti maysa a kaarruba a pagilian nga addaan met iti dakkel a panagkasapulan iti lengguaheda. Kalpasan ti sumagmamano a bulan, adda dagiti nabukel a grupo.

16. Kasano a mariknam ti rag-o iti baro nga annongem?

¹⁶ “Ti rag-o nga ipaay ni Jehova ti bilegyo.” (Neh. 8:10, ftn.) Ti koma kangrunaan a paggapuan ti rag-otayo ket ti relasiontayo ken Jehova, saan a ti annongentayo, uray no ipatpategtayo dayta. Gapuna, itultuloymo ti makipagna ken Jehova, nga agpannurayka iti sirib, panangiwanwan, ken suportana. Laglagipem nga inayatmo ti dati nga annongem gapu ta inaramidmo ti amin a kabaelam a tumulong kadagiti tattao sadiay. Kasta met laeng ti aramidem iti agdama nga annongem ket makitamto a tulongannaka ni Jehova a mangayat met iti dayta.—Ecl. 7:10.

17. Ania koma ti laglagipentayo maipapan iti agdama nga annongentayo?

¹⁷ Laglagipentayo koma nga agnanayon ti panagserbitayo ken Jehova, ngem temporario ti agdama nga annongentayo. Inton baro a lubong, mabalin nga agbalbaliwto amin ti annongentayo. Ni Aleksey, a nadakamat itay, patienna a ti agdama a kapadasanna ti mangisagsagana kenkuana iti dayta a panagbalbaliw. “Ammok nga agpaypayso ni Jehova ken ti baro a lubong, ngem kasla agpada idi nga adayoda kaniak,” kuna ni Aleksey. “Ita, nakasingsingedakon ken Jehova, ken mariknak a nakaas-asidegen ti baro a lubong.” (Ara. 2:25) Aniaman ti annongentayo, itultuloytayo koma ti makipagna ken Jehova. Dinatayto pulos panawan, no di ket tulongannatayo a makarikna iti rag-o iti panangaramidtayo iti kabaelantayo nga agserbi kenkuana—sadinoman dayta.—Isa. 41:13.