1. Siasino dagiti timmulong iti pannakabuangay ti kongregasion ti Filipos?

IDI nakadanon da apostol Pablo, Silas, Lucas, ken Timoteo idiay Filipos a kolonia ti Roma, adu ti nasarakanda nga interesado iti mensahe ti Pagarian. Timmulong dagitoy nga uppat a naregta a kakabsat iti pannakabuangay ti kongregasion sadiay, ket nangrugi nga aggigimong ti amin nga adalan, nalabit iti balay ti managpadagus a manamati nga agnagan Lidia.—Ara. 16:40.

2. Ania a narigat a situasion ti dagus a nakaipasanguan dayta a kongregasion?

² Di nagbayag, naipasango ti kabubuangay a kongregasion iti narigat a situasion. Tinignay ni Satanas dagiti bumusbusor iti kinapudno a siraranggas a mangkontra iti panangasaba dagitoy a matalek a Kristiano. Naaresto da Pablo ken Silas, napangpang-orda, ken naibaludda. Idi nawayawayaandan, binisitada dagiti kabbaro nga adalan sa pinaregtada ida. Kalpasanna, pimmanaw iti siudad da Pablo, Silas, ken Timoteo ngem agparang a nagtalinaed ni Lucas. Ania itan ti aramiden ti kabubuangay a kongregasion? Iti tulong ti espiritu ni Jehova, intultuloyda ti naregta a panagserbida kenkuana. (Fil. 2:12) Talaga a maipagpannakkel ida ni Pablo!

3. Kas nailadawan iti Filipos 1:9-11, ania ti inkararag ni Pablo?

³ Agarup 10 a tawen kalpasanna, sinuratan ni Pablo ti kongregasion ti Filipos. No basaem dayta a surat, nalakam a madlaw ti nauneg a panagayat ni Pablo kadagiti kakabsat. Insuratna: “Mailiwak unay kadakayo amin, ta nadungngo ti panagayatko kadakayo a kas iti ayat ni Kristo Jesus.” (Fil. 1:8) Insuratna nga ikarkararaganna ida. Kiniddawna ken Jehova a  tulonganna nga umadu wenno aglaplapusanan ti ayatda, siguraduenda ti napatpateg a bambanag, awan koma ti pakapilawanda, dida itibkol ti sabsabali, ken itultuloyda ti mangpataud iti nalinteg a bunga. Sigurado nga umanamongka a magunggonaantayo ita iti dayta a naimpusuan a sasao ni Pablo. Basaentayo ngarud ti insuratna kadagiti taga-Filipos. (Basaen ti Filipos 1:9-11.) Kalpasanna, usigentayo dagiti punto a dinakamatna ken pagsasaritaantayo no kasano a mayaplikartayo dagita.

4. (a) Sigun iti 1 Juan 4:9, 10, kasano nga impakita ni Jehova ti ayatna kadatayo? (b) Kasano koma ti panangayattayo iti Dios?

⁴ Impakita ni Jehova ti dakkel nga ayatna kadatayo idi imbaonna ditoy daga ti Anakna tapno matay gapu kadagiti basoltayo. (Basaen ti 1 Juan 4:9, 10.) Matignaytayo a mangayat iti Dios gapu iti di managimbubukodan nga ayatna. (Roma 5:8) Kasano koma ti panangayattayo iti Dios? Sinungbatan ni Jesus dayta a saludsod idi imbagana iti maysa a Fariseo: “Masapul nga ayatem ni Jehova a Diosmo iti amin a pusom ken amin a kararuam ken amin a panunotmo.” (Mat. 22:36, 37) Kayattayo nga ayaten ti Dios iti amin a pusotayo. Ken kayattayo a bumileg ti ayattayo kenkuana iti tunggal aldaw. Imbaga ni Pablo kadagiti taga-Filipos nga “ad-adda pay koma nga umadu” wenno aglaplapusanan ti ayatda. Ania ti aramidentayo tapno bumileg ti ayattayo iti Dios?

5. Kasano a bumileg ti ayattayo?

⁵ Masapul nga am-ammotayo ti Dios tapno maayattayo. Kuna ti Biblia: “Asinoman a saan nga agayat ket dina am-ammo ti Dios, ta ti Dios ket ayat.” (1 Juan 4:8) Impakita ni apostol Pablo a bumileg ti ayattayo iti Dios bayat a gunggun-odentayo ti “umiso a pannakaammo ken naan-anay a pannakatarus” maipapan Kenkuana. (Fil. 1:9) Idi damotayo ti agadal iti Biblia, rinugiantayo nga ayaten ti Dios uray no limitado ti ammotayo maipapan kadagiti nagsasayaat a kualidadna. Sa idi immadun ti nasursurotayo maipapan ken Jehova, bimmileg ti ayattayo kenkuana. Nakapatpateg ngarud a regular nga adalentayo ti Sao ti Dios ken utobentayo ti mabasatayo iti dayta!—Fil. 2:16.

6. Sigun iti 1 Juan 4:11, 20, 21, kasano nga umadu ti ayattayo?

⁶ Ti dakkel nga ayat ti Dios kadatayo ti pakatignayantayo a mangayat kadagiti kakabsat. (Basaen ti 1 Juan 4:11, 20, 21.) Baka panunotentayo a nalaka laeng a maayattayo dagiti kakabsat. Siempre, agdaydayawtayo ken Jehova ken ikagkagumaantayo a tuladen dagiti nagsasayaat a kualidadna. Tultuladentayo met ti ulidan ni Jesus, a nakadakdakkel ti ayatna nga uray la intedna ti biagna para kadatayo. Ngem no dadduma, baka marigatantayo nga agtulnog iti bilin nga ayatentayo ti maysa ken maysa. Usigentayo ti maysa a pagarigan iti kongregasion ti Filipos.

7. Ania ti masursurotayo iti balakad ni Pablo kada Euodia ken Sintique?

⁷ Da Euodia ken Sintique ket naregta a kakabsat nga agpada idi a kadua ni apostol Pablo iti panagserbi. Ngem mabalin nga impalubosda a ti dida panagkinnaawatan ti rason nga agririda. Iti surat ni Pablo iti kongregasion nga ayan dagita a kakabsat a babbai, innagananna da Euodia ken Sintique ken direkta a binalakadanna ida nga “agkapanunotanda koma.” (Fil. 4:2, 3) Natignay ni Pablo a mangibilin iti intero a kongregasion: “Itultuloyyo nga aramiden ti amin a banag a saankayo nga agtanabutob ken makiriri.” (Fil. 2:14) Sigurado a nakatulong ti balakad ni  Pablo kadagitoy a matalek a kakabsat kasta met iti intero a kongregasion tapno bumileg ti ayatda iti maysa ken maysa.

8. Ania ti maysa a dakkel a lapped iti panangayattayo kadagiti kakabsat, ken ania ti makatulong kadatayo?

⁸ Kas kada Euodia ken Sintique, mabalin a dakkel a lapped iti panangayattayo kadagiti kakabsat ti tendensiatayo nga agpokus kadagiti kamali. Inaldaw nga agkamalitayo amin. No dagiti laeng kamali ti sabsabali ti kitkitaentayo, lumamiis ti ayattayo kadakuada. Kas pagarigan, no malipatan ti maysa a kabsat ti tumulong nga agdalus iti Kingdom Hall, mabalin a masurontayo. No panunotentayo ti dadduma pay nga ammotayo a kamali ti kabsat, kumaro ti surontayo ket bumaaw ti ayattayo kenkuana. No kasta ti situasionmo, nasayaat a panunotem daytoy: Makitkita ni Jehova dagiti kamalitayo ken dagiti kamali dayta a kabsat. Ngem ay-ayatenna latta ti kabsattayo ken uray datayo. Masapul ngarud a tuladentayo ti ayat ni Jehova ket positibo latta koma ti panangmatmattayo kadagiti kakabsat. No ikagumaantayo nga ayaten ida, pabpabilgentayo ti pannakikaykaysatayo kadakuada.—Fil. 2:1, 2.

9. Ania ti karaman iti “napatpateg a bambanag” a dinakamat ni Pablo iti suratna kadagiti taga-Filipos?

⁹ Inwanwan ti nasantuan nga espiritu ni Pablo a mangibilin kadagiti kakabsat idiay Filipos—ken iti amin a Kristiano—a ‘siguraduenda ti napatpateg a bambanag.’ (Fil. 1:10) Ramanen dagitoy a napatpateg a bambanag ti pannakasantipikar ti nagan ni Jehova, ti pannakatungpal dagiti panggepna, ken ti talna ken panagkaykaysa ti kongregasion. (Mat. 6:9, 10; Juan 13:35) No dagitoy ti kapatgan iti biagtayo, ipakpakitatayo nga ay-ayatentayo ni Jehova.

10. Ania ti masapul nga aramidentayo tapno maibilangtayo kas awan pakapilawanna?

¹⁰ Imbaga pay ni Pablo a masapul nga ‘awan koma ti pakapilawantayo.’ Dina kayat a sawen a masapul nga agbalintayo a perpekto. Imposible a matuladtayo ni Jehova a Dios nga awan pakapilawanna. Ngem ibilangnatayo kas awan pakapilawanna no aramidentayo ti amin a kabaelantayo a mangpauneg iti ayattayo ken mangsigurado iti napatpateg a bambanag. Ti maysa a pamay-an a maipakitatayo ti ayattayo ket ti panangikagumaantayo a saan a mangitibkol iti sabsabali.

11. Apay a saantayo koma nga itibkol ti sabsabali?

¹¹ Ti bilin a di panangitibkol iti sabsabali ket serioso a banag. Kasano a mabalin a maitibkoltayo ti sabsabali? Mabalin a gapu iti paglinglingayan, panagbadbado, wenno uray iti trabahotayo. Baka saan met a dakes ti ar-aramidentayo. Ngem no dagita ti pakaburiboran ti konsiensia ti sabali ket maitibkol, serioso a banag dayta. Imbaga ni Jesus a nasaysayaat laengen a magalutan ti tengngedtayo iti nadagsen a gilingan a bato sa maipuruaktayo iti baybay ngem ti maitibkoltayo ti maysa kadagiti karnerona!—Mat. 18:6.

12. Ania ti masursurotayo iti ulidan ti maysa a payunir nga agassawa?

¹² Kitaentayo no kasano nga inyaplikar ti maysa nga agassawa a payunir ti pakdaar ni Jesus. Adda kababautisar nga agassawa a kakongregasionda a naggapu iti istrikto unay a pamilia. Patien daytoy a kababautisar nga agassawa a saan a mabalin nga agbuya dagiti Kristiano iti sine—uray dagiti nasayaat a pelikula. Nakigtotda idi naammuanda a nagbuya iti sine ti payunir nga agassawa. Kalpasan dayta, saanen a nagbuya iti sine ti payunir nga agassawa agingga a nasanay nga agbalin a mas balanse ti konsiensia ti kababautisar nga agassawa. (Heb. 5:14) Gapu iti dayta, naipakitada  nga ay-ayatenda dagiti kabbaro a kakabsat, saan laeng nga iti sao no di ket iti aramid.—Roma 14:19-21; 1 Juan 3:18.

13. Kasano a mabalin a masugsogantayo nga agbasol ti maysa a kabsat?

¹³ Ti sabali pay a pamay-an a maitibkoltayo ti maysa ket no sugsogantayo nga agbasol. Kasano? Kitaentayo daytoy a situasion. Kalpasan ti nabayag a pannakaadikto iti arak ti maysa a mayad-adalan iti Biblia, naisardengna met laeng dayta. Nabigbigna a masapul a naan-anay a liklikanna dayta. Alisto ti panagrang-ayna ket nabautisaran. Idi agangay, adda kabsat a nagsagana iti maysa a pannangan ket sinugsoganna nga uminum iti arak ti kabbaro a kabsat. Kinunana: “Kristianokan; adda kenkan ti espiritu ni Jehova, isu a kayamon ti agteppel. Sigurado a makontrolmon ti panaginummo.” Nakaladladingit la ketdi ti resultana no dimngeg ti kabbaro a kabsat iti dayta a di umiso a balakad!

14. Kasano a matulongannatayo dagiti gimong a mangyaplikar iti bilin iti Filipos 1:10?

¹⁴ Makatulong dagiti gimongtayo tapno mayaplikartayo iti nadumaduma a pamay-an ti bilin iti Filipos 1:10. Umuna, dagiti naespirituan a taraon a maidasdasar iti gimong ipalagipda kadatayo no ania a bambanag ti ibilbilang ni Jehova a napatpateg. Maikadua, masursurotayo no kasano nga iyaplikar ti maad-adaltayo tapno agbalintayo nga awan pakapilawanna. Ken maikatlo, magutugottayo a “mangipakita iti ayat ken nasayaat nga ar-aramid.” (Heb. 10:24, 25) No paregtaendatayo dagiti kakabsat, ad-adda a dumakkel ti ayattayo iti Diostayo ken kadagiti kakabsat.  No dagitoy a dua nga ayat ti adda iti pusotayo, aramidentayo ti amin a kabaelantayo a saan a mangitibkol kadagiti kakabsat.

15. Ania ti kaipapanan ti ‘pannakapno iti nalinteg a bunga’?

¹⁵ Sipapasnek nga inkararag ni Pablo a ‘mapno koma iti nalinteg a bunga’ dagiti taga-Filipos. (Fil. 1:11) Sigurado a karaman iti daytoy a “nalinteg a bunga” ti ayatda ken Jehova ken iti ilina. Ramanen met dayta ti panangibagada iti sabsabali maipapan iti pammatida ken Jesus ken iti nagsayaat a namnamada. Adda pay sabali nga ilustrasion a nausar iti Filipos 2:15, ti ‘panagsilnag kas silsilaw iti lubong.’ Maitutop dayta nga ilustrasion ta inawagan ni Jesus dagiti adalanna kas “silaw ti lubong.” (Mat. 5:14-16) Imbilinna met kadagiti pasurotna a ‘pagbalinenda nga adalanna’ dagiti tattao, ken imbagana nga isudanto dagiti ‘saksina agingga iti kaadaywan a paset ti daga.’ (Mat. 28:18-20; Ara. 1:8) Agbungbungatayo iti “nalinteg a bunga” no aktibotayo a makiraman iti daytoy a nakapatpateg a trabaho.

16. Kasano nga ipakita ti Filipos 1:12-14 a makapagsilnagtayo kas silsilaw uray narigat ti kasasaad? (Kitaen ti ladawan iti akkub.)

¹⁶ Aniaman ti kasasaadtayo, makapagsilnagtayo kas silsilaw. Iti dadduma a kaso, ti kasla lapped iti panangipakaammotayo iti naimbag a damag ket mabalin a gundaway a makapangasabatayo. Kas pagarigan, nakabalud ni apostol Pablo iti maysa a balay idiay Roma idi inaramidna ti suratna kadagiti taga-Filipos. Ngem uray nakabalud, saan a nagsardeng a nangasaba kadagiti guardia ken kadagiti bimmisita kenkuana. Sireregta a nangasaba ni Pablo kadagitoy a kasasaad, ket daytoy ti nangpabileg iti pakinakem dagiti kakabsat tapno ‘situtured a maipakaammoda ti sao ti Dios.’—Basaen ti Filipos 1:12-14; 4:22.

17. Mangted iti pagarigan iti tiempotayo a mangipakita a makapagbungatayo latta uray iti narigat a kasasaad.

 ¹⁷ Adu a kakabsattayo ti addaan iti gundaway a mangtulad iti kinatured ni Pablo. Saanda a makapangasaba iti binalaybalay iti pagilian a pagnanaedanda, isu a nangbirokda iti sabali a pamay-an a maipakaammoda ti naimbag a damag. (Mat. 10:16-20) Iti maysa kadagita a pagilian, insingasing ti maysa a manangaywan iti sirkito a trabahuen ti tunggal agibumbunannag ti bukodna a “teritoria”—dagiti kabagian, kaarruba, kaeskuelaan, katrabahuan, ken gagayyemna. Iti uneg ti dua a tawen, nakaskasdaaw ti iyaadu dagiti kongregasion iti dayta a sirkito. Mabalin a nawayatayo a makapangasaba iti pagilian a pagnanaedantayo. Ngem adda napateg a masursurotayo iti ulidan dagiti manangipamuspusan a kakabsat: Kanayon a mangbirokka iti pamay-an a naan-anay a makapangasabaka, nga agtalekka nga ikkannaka ni Jehova iti pigsa a kasapulam tapno mapagballigiam ti aniaman a lapped.—Fil. 2:13.

18. Ania koma ti determinasiontayo?

¹⁸ Iti daytoy nagpateg a tiempo, sapay koma ta determinadotayo a mangyaplikar iti balakad a masarakan iti surat ni Pablo kadagiti taga-Filipos. Sapay koma ta siguraduentayo ti napatpateg a bambanag, awan koma ti pakapilawantayo, ditay itibkol ti sabsabali, ken itultuloytayo ti mangpataud iti nalinteg a bunga. Iti kasta, aglaplapusananto ti ayattayo ken maidaydayawtayo ti naayat nga Amatayo, ni Jehova.