• “Panagriknak idi, kasla maulit-ulit a makikamkamalala ni lakayko.”

• “Panagriknak idi, mapabpabainanak, naalasak, ken awan serserbik.”

• “Diak imbagbaga dayta iti asinoman. Sinolsolok ti problemak.”

• “Nariknak idi a kasla awan bibiang ni Jehova kaniak.”

Ipakita dagita a komento a nakaro ti epekto iti asawa a babai ti panagbuya ni lakayna iti pornograpia. Ken no ilimlimed ti asawa a lalaki dayta nga ar-aramidenna, mabalin nga iti adun a bulan wenno tawtawen, baka marikna ti asawa a babai a saannan a mapagtalkan ni lakayna. Imbaga ti maysa nga asawa a babai, “Panagriknak, kasla saankon nga am-ammo ni lakayko. Adda pay ngata dadduma nga ilimlimedna kaniak?”

Daytoy nga artikulo ket naisagana para iti asawa a babai a ni lakayna ket agbuybuya iti pornograpia. a Mailawlawag dagiti prinsipio ti Biblia a makatulong iti asawa a babai tapno maliwliwa, maipasigurado a suportaran ni Jehova, ken matulongan a maaddaan iti natalna a panunot ken rikna ken agtultuloy a nabileg ti espiritualidadna. b

Saanmo a makontrol ti amin nga ar-aramiden ni lakaymo. Ngem adda dagiti maaramidam tapno lumag-an ti nasaktan a riknam ken nataltalna ti isipmo. Kitaem dagiti sumaganad.

Saanmo a pabasolen ti bagim. Baka marikna ti maysa nga asawa a babai a basolna ti panagbuya ni lakayna iti pornograpia. Panagrikna ni Alice c nga adda la ketdi pagkuranganna kas maysa a babai. Isu a napanunotna, ‘Apay a kaykayat ni lakayko a kitaen ti sabali a babbai imbes a siak?’ Dadduma nga assawa a babbai ti mangpabpabasol iti bagida ta pampanunotenda a pakpakaruenda ti situasion gapu iti reaksionda. Imbaga ni Danielle, “Panagriknak, lallalo pay a daddadaelek ti relasionmi nga agassawa gapu iti pungtotko.”

No kasta met ti marikriknam, laglagipem a para ken Jehova, saanka a manungsungbat iti ar-aramiden ni lakaymo. Kuna ti Santiago 1:14: “Masubok  ti tunggal maysa no maallukoy ken masulisog iti bukodna a tarigagay.” (Roma 14:12; Fil. 2:12) Saannaka a pabpabasolen ni Jehova. Ipatpategna ketdi ti kinamatalekmo kenkuana.—2 Cron. 16:9.

Mabalin a makatulong met iti asawa a babai no maawatanna a ti panagbuya ni lakayna iti pornograpia saanna a kayat a sawen nga adda pagkuranganna kas maysa a babai. Sigun kadagiti eksperto maipapan iti dayta a banag, ti pornograpia riingenna dagiti seksual a panagpantasia a saan a mapennek ti asinoman a babai.

Liklikam ti sobra a panagdanag. Imbaga ni Catherine a sangkapanunotna ti panagbuya ni lakayna iti pornograpia. Kinuna met ni Frances: “Madandanaganak no saanko nga ammo ti napanan ni lakayko. Agmalmalem nga agnernerbiosak.” Impudno ti dadduma nga assawa a babbai a mababainda no kasangsangoda dagiti padada a Saksi a mabalin a makaammo iti problema ni lakayda. Inamin met ti dadduma a mariknada nga agmaymaysada ta ipagarupda nga awan ti makaawat iti situasionda.

Natural laeng dagita a rikna. Ngem no sangkapanunotmo dagita, lallalo a madanaganka. Ikagumaam ketdi ti agpokus iti relasionmo ken Jehova. Makatulong dayta tapno maibturam ti situasionmo.—Sal. 62:2; Efe. 6:10.

Mabalin a makatulong no basaem ken utobem dagiti salaysay iti Biblia maipapan kadagiti problemado a babbai a naliwliwa idi nagkararagda ken Jehova. Saanna a kanayon nga inikkat dagiti problemada, ngem inikkanna ida iti talna. Kas pagarigan, “nasaem unay ti rikna” ni Hanna iti situasionna. Ngem kalpasan “ti napaut a panagkararagna ken Jehova,” timmalna ti panunotna uray no dina pay ammo idi ti masakbayanna.—1 Sam. 1:10, 12, 18; 2 Cor. 1:3, 4.

Agpatulongka kadagiti panglakayen iti kongregasion. Agbalinda a “paglinongan no agangin” ken “pagkamangan no agbagyo.” (Isa. 32:2, ftn.) Mabalin pay ketdi a mangirekomendada iti sister a mabalin a pangibagaam iti marikriknam ken mangliwliwa kenka.—Prov. 17:17.

Matulongam kadi ni lakaymo a mangisardeng iti nayugalinan a panagbuya iti pornograpia? Nalabit. Ibaga ti Biblia a tapno masolbar ti maysa a problema wenno tapno maabak ti nabileg a kalaban, “nasaysayaat ti dua ngem ti maysa.” (Ecl. 4:9-12) Sigun kadagiti panagadal, masansan a nasayaat  dagiti resulta no agtinnulong ti agassawa tapno maisardeng ti pannakaadikto iti pornograpia ken tapno maisubli ti panagtalekda iti maysa ken maysa.

Siempre, nangnangruna a nakadepende dayta no kayat ni lakaymo nga isardeng ti agbuya iti pornograpia ken determinado a mangaramid iti dayta. Impakpakaasina kadin a pabilgen isuna ni Jehova ken nagpatulong kadin kadagiti panglakayen? (2 Cor. 4:7; Sant. 5:14, 15) Adda kadin dagiti ar-aramidenna tapno maadaywanna ti sulisog—kas pagarigan, limlimitaranna ti panagusarna kadagiti gadyet ken likliklikanna dagiti makasulisog a situasion? (Prov. 27:12) Kayatna kadi nga awaten ti tulongmo ken kayatna ti agbalin a talaga a napudno kenka? No wen, mabalin a matulongam ni lakaymo.

Kasano? Kitaem daytoy a pagarigan. Nakiasawa ni Felicia ken Ethan a naadikto iti pornograpia idi ubing pay. Tultulongan ni Felicia ni lakayna tapno nalaklakana nga ibaga kenkuana no mariing manen ti tarigagayna nga agbuya iti pornograpia. Imbaga ni Ethan: “Saanak a mabain a mangibaga iti agpayso ken ni baketko. Ay-ayatennak isu a tultulongannak tapno maadaywak dagiti sulisog. Kanayon met a damdamagenna no ania ti ar-aramidek. Tultulongannak tapno ikagumaak ti agannad no kasano kapaut ti panaginternetko ken no sadinoak nga aginternet.” Natural laeng a masaksaktan ni Felicia iti hilig ni Ethan nga agbuya iti pornograpia. “Ngem,” kunana, “diak matulongan a mangisardeng iti bisiona no paturayek ti pungtot ken ti sakit ti nakemko. Kalpasan a nagtungtonganmin ken lakayko dagiti problemana, kayatnak met a tulongan tapno maibturak ti masaksaktan a riknak.”

Dagita a tungtongan ket makatulong tapno maisardeng ti asawa a lalaki ti agbuya iti pornograpia ken makatulong met ken baketna tapno agtalek manen kenkuana. Ngamin, no ipudno ti asawa a lalaki ken baketna ti amin a pagkapuyanna, inaldaw nga ar-aramidenna, ken pappapananna, nalaklaka nga agtalek manen kenkuana ni baketna.

Patiem kadi a matulongam ni lakaymo iti kasta met laeng a pamay-an? No wen, mabalinyo a basaen ken pagsaritaan a dua daytoy nga artikulo. Ti kalatna ket maisardengna ti agbuya iti pornograpia ken maikkannaka iti rason nga agtalek manen kenkuana. Imbes a makapungtot ta kayatmo a pagsaritaanyo ti problemana, masapul nga ikagumaanna a tarusan ti marikriknam maipapan iti problema. Ti panggepmo ket tapno suportaram dagiti panangikagumaanna ken ikkam iti gundaway a mangisubli iti panagtalekmo kenkuana. Masapul a maammuanyo a dua no apay nga agbuybuya dagiti tattao iti pornograpia ken no kasano a masolbar dayta a problema. d

 No madanaganka a baka bumara ti saritaanyo, mabalin a kiddawem iti maysa a panglakayen a napasig kadakayo a kaduaennakayo no pagsaritaanyo ti situasion. Laglagipem nga uray no naisardengen ni lakaymo ti pannakaadiktona iti pornograpia, mabalin a napaut a tiempo ti kasapulan sakbay a maisubli ti panagtalekmo kenkuana. Ngem saanka a sumuko. Kitaem dagiti babassit a simmayaatan ti relasionyo. Namnamaem nga inton agangay ken no agan-anuska, bumilegto manen ti relasionyo nga agassawa.—Ecl. 7:8; 1 Cor. 13:4.

No agbuya manen ni lakaymo iti pornograpia, kayatna kadi a sawen a saan nga agbabbabawi wenno dinan maisardeng dayta? Saan met ketdi. Mabalin a tungpal-biag a labananna dayta nangruna no adikto isunan iti pornograpia. Posible nga agbuya manen uray adu a tawenen a naisardengna. Tapno dina manen maaramid dayta, masapul a lallalo pay nga ikagumaanna ti agteppel. Nalabit itultuloyna nga aramiden dagiti pamay-anna a manglaban iti pannakaadiktona uray no kasla naisardengnan dayta. (Prov. 28:14; Mat. 5:29; 1 Cor. 10:12) Nasken nga ‘itultuloyna a pabaruen ti puersa a mangiturturong iti panunotna’ ken sursuruenna a ‘guraen ti dakes’—agraman ti pornograpia ken ti aniaman a narugit nga aramid kas iti masturbasion. (Efe. 4:23; Sal. 97:10; Roma 12:9) Talaga kadi a kayatna ti agbalbaliw? No wen, mabalin nga adda pay namnamana. e

Kasanon no saan a kayat ni lakaymo a labanan ti problemana? Siempre, mabalin a maulit-ulit a madismayaka, makapungtot, ken mariknam a lipliputannaka. Ipabiangmo ken Jehova ti problemam tapno agtalna ti panunotmo. (1 Ped. 5:7) Itultuloymo ti suminged ken Jehova babaen ti panagadal, panagkararag, ken panagutob. Bayat nga ar-aramidem dagita, masiguradom a lalo met a suminged kenka. Kas ibaga ti Isaias 57:15, ti Dios ket kadua “dagiti marigrigatan ken nanumo” ken kayatna a tulongan ida a rumagsak manen. Ikagumaam ti agtultuloy a simamatalek nga agserbi ken Jehova. Agpatulongka kadagiti panglakayen. Ken itultuloymo ti mangnamnama nga iti masanguanan, mabalin a naimpusuan nga agbalbaliw ni lakaymo.—Roma 2:4; 2 Ped. 3:9.