1. Apay a napateg ti panagpabautisar? (Kitaen ti ladawan iti rugi ti artikulo.)

RINIBU nga agad-adal iti Biblia ti agpabpabautisar iti kada tawen. Adu kadakuada ti agtutubo—tin-edyer ken ubbing. Mabalin a napadakkelda iti kinapudno. Maysaka kadi kadakuada? No wen, makomendaranka. Masapul nga agpabautisar ti maysa tapno agbalin a Kristiano, ken nagpateg dayta tapno magun-odan ti pannakaisalakan.—Mat. 28:19, 20; 1 Ped. 3:21.

2. Apay a saan a rumbeng a pagbutngan wenno liklikan ti panagdedikar?

² Adu a bendision ti iyeg ti panagpabautisar, ngem adda met kakuyogna a responsabilidad. Apay? Idi aldaw ti bautismom, wen ti insungbatmo iti saludsod a “Maibatay iti daton ni Jesu-Kristo, nagbabawyanyo kadin dagiti basolyo ken indedikaryon ti bagiyo ken Jehova tapno aramidenyo ti pagayatanna?” Ti panagpabautisarmo ti mangisimbolo iti dedikasionmo. Sagrado dayta a karim ken Jehova a mangayat kenkuana ken mangyun-una iti pagayatanna. Serioso dayta a tulag. Rumbeng kadi a pagbabawyam  dayta? Saan, saanmo a pulos a pagbabawyan dayta. Saan a pulos a kamali ti panangitalekmo iti bagim ken Jehova. Iti sabali a bangir, ti tao nga adayo ken Jehova ket agpapaituray ken Satanas. Saan a kayat ti Diablo a maisalakanka. Kinapudnona, maragsakan no mapukawmo ti biag nga agnanayon gapu iti panangsuportam kenkuana a mangilaksid iti kinasoberano ni Jehova.

3. Ania dagiti bendision a maawatmo no agdedikarka ken Jehova?

³ Panunotem dagiti bendision kas dedikado ken bautisado a Kristiano no saanmo a suportaran ni Satanas. Ita ta impaaymon ti biagmo ken Jehova, napigpigsan ti kompiansam a mangibaga: “Ni Jehova adda iti dasigko; saanakto nga agbuteng. Ania ti maaramidan kaniak ti naindagaan a tao?” (Sal. 118:6) Ti pannakidasig iti Dios ken ti pananggun-od iti paborna ti kasayaatan a pribilehio iti biag a mabalin a matagiragsakmo.

4, 5. (a) Apay a responsabilidad ti tunggal indibidual ti dedikasionna iti Dios? (b) Ania dagiti pakasuotan a maipaspasango met kadagiti adulto?

⁴ Kas bautisado a Kristiano, ti relasionmo ken Jehova ket saan a kas iti selpon nga us-usarem ngem dagiti nagannakmo ti manglo-load iti dayta. Ngamin, responsabilidadmon ti pannakaisalakanmo, uray no addaka pay laeng iti poder dagiti nagannakmo. Apay a napateg a laglagipem dayta? Gapu ta saan a kanayon a maibagam a nasaksakbay dagiti pakarigatan a pakaipasanguam. Kas pagarigan, no ubingka a nagbautisar, mabalin a maipasangoka kadagiti baro kenka a rikrikna ken kadagiti dakes nga impluensia inton tin-edyerka. Kastoy ti kuna ti balasang a tin-edyer: “Gagangay a saan a pagbabawyan ti ubing ti panagbalinna a Saksi ni Jehova gapu laeng ta saan a maikkan iti birthday cake iti eskuelaan. Ngem kalpasan ti sumagmamano a tawen, inton napigpigsan ti seksual a rikriknana, masapul a naan-anay a kombinsido a kanayon a pagsayaatanna no pilienna ti agtulnog kadagiti linteg ni Jehova.”

⁵ Siempre, saan la a dagiti agtutubo ti maipaspasango kadagiti baro a pannubok. Maipaspasango met iti adu a di ninamnama a pakasubokan iti pammati dagiti nagbautisar idi adultodan. Mabalin a maipapan dagita iti panagasawa, salun-at, wenno trabaho. Aniaman ti edad ti maysa, maipasango latta kadagiti situasion a masapul nga agbalin a matalek ken Jehova.—Sant. 1:12-14.

6. (a) Kasano a maibaga nga awan ti kondisionna ti dedikasionmo ken Jehova? (b) Ania ti masursurom iti Filipos 4:11-13?

⁶ Tapno makapagmatalekka latta iti aniaman a situasion, saanmo a pulos liplipatan nga awan ti kondisionna ti karim ken Jehova. Kayatna a sawen nga imbagam iti Kangatuan iti uniberso nga agtultuloyka nga agserbi kenkuana uray no agsardeng dagiti gagayyem wenno nagannakmo. (Sal. 27:10) Iti amin a situasion, mabalin a makaurnongka iti pigsa—babaen ti tulong ni Jehova—tapno matakderam ti dedikasionmo.—Basaen ti Filipos 4:11-13.

7. Ania ti kaipapanan ti panangitrabaho iti bukodmo a pannakaisalakan “buyogen ti buteng ken panagpigerger”?

⁷ Kayat ni Jehova nga agbalinka a gayyemna. Ngem masapul ti panagporsegi tapno agtultuloy ti panaggayyemyo ken maitrabahom ti pannakaisalakanmo. Kinapudnona, kuna ti Filipos 2:12: “Itultuloyyo nga itrabaho ti bukodyo a pannakaisalakan buyogen ti buteng ken panagpigerger.” Ipakita dagita a sasao a masapul a panunotem no kasano a mataginayonmo ti panaggayyemyo ken Jehova ken agmatalek kenkuana iti aniaman a pakarigatan. Saanka nga agtaltalek iti bagim. Nayaw-awan uray ti dadduma a nabayagen nga agserserbi iti Dios. Ania ngarud dagiti aramidem tapno maitrabahom ti pannakaisalakanmo?

8. Ania ti ramanen ti personal a panagadal, ken apay a napateg dayta?

⁸ Iti pannakigayyem ken Jehova, masapul a makisarita ken dumngegka. Ti personal a panagadal iti Biblia ti kangrunaan a pamay-an a dumngegtayo ken Jehova. Ramanen dayta ti pananggun-od iti pannakaammo babaen ti panagbasa ken panangutob iti Sao ti Dios ken kadagiti naibatay iti Biblia a publikasion. No ar-aramidem dayta, laglagipem a saan a kas iti panagadal iti eskuelaan ti panagadal iti Biblia. Saan koma a kasla agikabkabesaka laeng kadagiti impormasion tapno pumasaka iti eksam. Mayarig ti epektibo a panagadal iti panagbiahe. Maammuam ken madiskobrem dagiti aspeto ti personalidad ni Jehova a saanmo pay idi nga ammo. Makatulong dayta tapno umasidegka iti Dios ken umasideg met kenka.—Sant. 4:8.

9. Ania dagiti alikamen a nakatulong kenka iti personal a panagadalmo?

⁹ Nangipaay ti organisasion ni Jehova kadagiti alikamen a makatulong kenka a maaddaan iti epektibo a panagadal. Kas pagarigan, makatulong ti “Aktibidad Para iti Panagadal iti Biblia” iti seksion a “Tin-edyer” iti jw.org/ilo tapno makapidutka iti leksion kadagiti pasamak iti Biblia. Kasta met, masarakam iti jw.org/ilo dagiti giya iti panagadal nga “Ania a Talaga ti Isursuro ti Biblia?” Makatulong dagita tapno ad-adda nga agbalinka a kombinsido kadagiti patpatiem ken tapno mailawlawagmo dagita iti sabsabali. Masarakan ti dadduma pay a pamay-an ti panagadal iti artikulo ti Abril 2009 nga Agriingkayo! a napauluan iti “Agimtuod Dagiti Agtutubo . . . Kasano a Matagiragsakko ti Panagbasak iti Biblia?” Nagpateg ti papel ti panagadal ken panagutob iti panangitrabaho iti pannakaisalakanmo.—Basaen ti Salmo 119:105.

10. Apay a napateg ti panagkararag iti bautisado a Kristiano?

¹⁰ No ti personal a panagadal ti maysa a pamay-an a dumngegtayo ken Jehova, ti panagkararag ti pamay-an tapno makisaritatayo kenkuana. Saan koma nga ibilang ti maysa a Kristiano a rutina laeng ti panagkararag wenno kas ‘pangpasuerte’ tapno agballigi dagiti aramidenna. Imbes ketdi, ti panagkararag ket agpaypayso a pannakikomunikar iti Namarsua kadatayo.  Kayat ni Jehova ti dumngeg kenka. (Basaen ti Filipos 4:6.) No adda dagiti pakadanagam, nagsayaat ti balakad ti Biblia nga “ipalladawmo ti dadagsenmo ken Jehova.” (Sal. 55:22) Talaga kadi a patiem dayta? Minilion a kakabsat ti mangpaneknek a nakatulong dayta kadakuada. Makatulong met dayta kenka!

11. Apay a masapul a kanayon nga agyamanka ken Jehova?

¹¹ Saan la a ti panagkiddaw iti tulong ken Jehova ti mabalinmo nga ikararag. Kuna ti Biblia: “Ipakitayo a managyamankayo.” (Col. 3:15) No dadduma, mabalin a mariribukantayo unay kadagiti problematayo isu a saantayon a madlaw ti adu a bendision a maaw-awattayo. Iti kada aldaw, apay a saanka a mangpanunot iti uray tallo laeng a banag a pagyamanam? Kalpasanna, iyebkasmo iti kararag ti panagyamanmo ken Jehova kadagita a bendision. Kuna ti tin-edyer a ni Abigail a nabautisaran idi agtawen iti 12: “Para kaniak, ni Jehova ti kangrunaan a maikari a pagyamanantayo iti intero nga uniberso. Iti amin a gundaway, masapul nga agyamantayo kenkuana kadagiti banag nga it-itedna kadatayo. Adda idi nangngegko a nagsayaat a palagip: No agriingtayo inton bigat a dagiti laeng banag a nagyamanantayo ita ken Jehova ti adda kadatayo, anianto ngata ti adda kenka?” *

12, 13. Apay a napateg a panunoten no kasano a nananammo a mismo ti kinaimbag ni Jehova?

¹² Naisalakan ti nagkauna nga ari a ni David iti adu a nasaem a pakarigatan. Inkantana: “Nanamenyo ken kitaenyo a ni Jehova naimbag; naragsak ti nabaneg a lalaki nga agkamang kenkuana.” (Sal. 34:8) Ipaganetget dayta a teksto a napateg ti personal a kapadasan. No basaem ti Biblia ken dagiti publikasiontayo ken no makigimongka, maammuam dagiti makaparegta a kapadasan no kasano a tinulongan ti Dios ti dadduma nga agtalinaed a matalek. Ngem bayat a rumangrang-ayka iti naespirituan, masapul a makitam a mismo ti tulong ni Jehova iti biagmo. Iti kapadasam, kasano a nananammo ti kinaimbag ni Jehova?

¹³ Ti maysa a pamay-an a napadas ti amin a Kristiano ti kinaimbag ni Jehova ket idi naawisda nga umasideg iti Dios ken iti Anakna. Kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” (Juan 6:44) Mariknam kadi a para kenka dagita a sasao? Mabalin nga ibaga ti maysa nga agtutubo, ‘Dagiti nagannakko ti inyasideg ni Jehova, ket simmurotak laeng.’ Ngem idi nagdedikarka ken Jehova ken nagpabautisarka, impakitam nga addaankan iti espesial a pannakigayyem kenkuana. Talaga nga am-ammonakan ni Jehova. Ipasigurado ti Biblia kadatayo: “No ti asinoman ayatenna ti Dios, am-ammona daytoy a tao.” (1 Cor. 8:3) Kanayon koma nga ipategmo ken apresiarem ti lugarmo iti organisasion ni Jehova.

14, 15. Kasano a makatulong ti ministerio tapno tumibker ti pammatim?

¹⁴ Mananammo pay ti kinaimbag ni Jehova no mapadasam ti tulongna iti panangisaritam iti pammatim iti dadduma. Maaramidmo dayta iti ministerio ken iti eskuelaan. Dadduma ti marigatan a mangasaba kadagiti kaeskuelaanda. Mabalin a maawatam dayta a rikrikna. Saanmo ngamin nga ammo no anianto ti reaksionda. Mabalin a narigrigat ti agsao iti sango ti adu a tattao ngem iti makisarita iti maymaysa a kaklasem. Ania ti makatulong kenka?

¹⁵ Umuna, panunotem no apay a kombinsidoka kadagiti patpatiem. Mabalin nga usarem  dagiti giya iti panagadal a masarakan iti jw.org/ilo. Nadisenio dagita a tumulong kenka a mangpanunot a naimbag kadagiti patpatiem, no apay a patiem dagita, ken no kasano a mailawlawagmo dagita iti sabsabali. No talaga a kombinsidoka ken nakasaganaka a naimbag, tumuredka a mangsaksi iti nagan ni Jehova.—Jer. 20:8, 9.

16. Ania ti mabalin a makatulong kenka tapno saanka nga agduadua a mangisarita iti patpatiem?

¹⁶ Ngem uray no nakasaganaka, mabalin nga agduaduaka a mangisarita iti patpatiem. Inamin ti 18 anyos a sister a nagbautisar idi agtawen iti 13, “Ammok dagiti patpatiek, ngem no dadduma, marigatanak a mangyebkas kadagiti pampanunotek.” Ania ti inaramidna? “Kasla makies-estoriaak laeng,” kunana. “Maibaga latta dagiti kaklasek dagiti ar-aramidenda, isu a masapul a kastaak met. Mabalin nga ibagak laeng no kua, ‘Idi naminsan, nangisuroak iti Biblia, ket . . . ’ Sa ituloykon iti punto a kayatko nga ibaga. Uray no saan a direkta a maipapan iti Biblia ti ibagbagak, kaaduanna nga aginteres ti dadduma no ania ti ar-aramidek no agisursuroak iti Biblia. Agsaludsodda no dadduma maipapan iti dayta. Gapu ta kanayonko nga ar-aramiden dayta a pamay-an, nalaklakan dayta kaniak. Ket maragsakanak kalpasanna!”

17. Ania pay ti makatulong tapno maisaritam ti patpatiem iti sabsabali?

¹⁷ No mangipakitaka iti respeto ken personal nga interes iti dadduma, dakdakkel ti posibilidadna a nasayaatto ti ipakitada kenka. “Kanayon idi a mabutengak a makisarita maipapan iti Biblia baka ibagada a panatikoak.” Kasta ti komento ni Olivia, nga agtawen iti 17 ken nabautisaran idi balasitang pay. Idi agangay, binaliwanna ti panagpampanunotna. Imbes a sangkapanunotna ti pagam-amkanna, pinanunot ni Olivia: “Adu nga agtutubo ti saan a makaam-ammo kadagiti Saksi ni Jehova. Dakami laeng dagiti am-ammoda a Saksi, isu a dakkel ti epekto ti ipakpakitami iti reaksionda. Kasano no managbabain wenno marigatankami a mangisarita iti patpatienmi, wenno kasano no agnernerbioskami nga agsao? Mabalin nga ipagarupda nga ibainmi ti kinasiasinomi. Mabalin pay ketdi a saan a nasayaat ti panangtratoda kadakami gapu iti kinaawan ti kompiansami. Ngem no relaks ti panagsaomi ken siguradokami iti patpatienmi, a kasla normal laeng a paset dayta ti saritaan, mabalin nga ad-adda a respetuendakami.”

18. Ania ti ramanen ti panangitrabaho iti bukodmo a pannakaisalakan?

¹⁸ Kas naadaltayon, serioso a responsabilidad ti panangitrabaho iti bukodmo a pannakaisalakan. Ramanen dayta ti panagbasa ken panangutob iti Sao ti Dios, panagkararag ken Jehova, ken panangpanunot no kasano a binendisionannaka ni Jehova. No ar-aramidem dagita, pumigsa ti kompiansam a mangibaga a gayyemmo ni Jehova. Kas resultana, matignayka a mangisarita maipapan iti patpatiem.—Basaen ti Salmo 73:28.

19. Apay a nagpateg nga ikagumaam nga itrabaho ti pannakaisalakanmo?

¹⁹ Kinuna ni Jesus: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan ket agtultuloy a surotennak.” (Mat. 16:24) Nalawag a ti panagbalin nga adalan, a ramanen ti panagdedikar ken panagpabautisar, ket obligasionmo kas maysa a Kristiano. Nupay kasta, mangyeg dayta iti adu a bendision ita ken biag nga agnanayon iti baro a lubong ti Dios. Addaanka ngarud iti adu a rason nga agtultuloy a mangitrabaho iti bukodmo a pannakaisalakan!