Binasayo kadi a naimbag dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

No maipapan iti naespirituan a panangtulong kadagiti annak, apay a masapul nga ikabilangan dagiti imigrante a nagannak ti lengguahe?

Mabalin a masursuro dagiti annak iti eskuelaan ken iti aglawlawda ti lengguahe iti lugar nga immakaranda. Mabalin a pagsayaatan ti maysa nga ubing no saan la a maysa a lengguahe ti ammona. Masapul nga ikabilangan dagiti nagannak no sadino ti pakatarusan a naimbag dagiti annakda iti kinapudno ken pagrang-ayanda iti naespirituan, no iti kongregasion nga agus-usar iti lengguahe iti lugar nga immakaranda wenno iti kongregasion nga agus-usar iti lengguaheda. Iyun-una dagiti Kristiano a nagannak ti naespirituan a pagimbagan dagiti annakda imbes a ti kayatda.—w17.05, p. 9-11.

Ania ti tuktukoyen ni Jesus a “dagitoy” idi insaludsodna ken Pedro: “Ay-ayatennak kadi nga ad-adda ngem dagitoy?” (Juan 21:15)

Agparang a tuktukoyen ni Jesus dagiti ikan nga adda iti asideg ken/wenno ti negosio a panagkalap. Kalpasan a natay ni Jesus, nagsubli ni Pedro iti dati a trabahona—ti panagkalap. Masapul a tingitingen dagiti Kristiano no kasano kapateg kadakuada ti sekular a trabaho.—w17.05, p. 22-23.

Apay nga imbaga ni Abraham ken Sara nga ibagana nga agkabsatda? (Gen. 12:10-13)

Kinapudnona, agkabsat iti ama da Sara ken Abraham. No imbaga koma idi ni Sara nga agassawada ken Abraham, mabalin a napapatay koma ni lakayna isu a saan koma a timmaud ti bin-i nga inkari ti Dios kenkuana.—wp17.3, p. 14-15.

Ania a teknik ti inrugi ni Elias Hutter tapno matulongan dagiti mayat nga agsursuro iti Hebreo?

Kayatna a mailasin dagiti estudiante ti nagdumaan dagiti Hebreo a puon a balikas (root word) iti Biblia ken dagiti nainaig a pauna (prefix) wenno paudi (suffix). Gapuna, napuskol ti panangyimprentana kadagiti puon a balikas, ngem kawaw wenno saan a napuskol dagiti pauna wenno paudi. Kasta met laeng ti makita kadagiti footnote ti New World Translation of the Holy Scriptures—With References.—wp17.4, p. 11-12.

Ania dagiti masapul nga ikabilangan ti maysa a Kristiano no pampanunotenna ti maaddaan iti paltog a pangprotektarna iti bagina iti panangdangran ti sabali a tao?

Dagitoy ti dadduma: Ibilang ti Dios a sagrado ti biag. Saan nga imparegta ni Jesus nga agitugot dagiti pasurotna iti armas kas proteksion. (Luc. 22:36, 38) Masapul a pitpitentayo dagiti espadatayo ket pagbalinentayo nga arado. Napatpateg ti biag ngem kadagiti material a banag. Raementayo ti konsiensia ti dadduma, ken kayattayo ti agbalin a pagulidanan. (2 Cor. 4:2)—w17.07, p. 31-32.

Apay a nagduma ti salaysay da Mateo ken Lucas maipapan iti panagubing ni Jesus?

Ni Mateo ket nagpokus ken Jose, kas iti reaksionna iti panagsikog ni Maria ken dagiti mensahe ti Dios nga agkamangda iti Egipto ken ti panagsublida idi agangay. Ad-ada a nagpokus ni Lucas ken Maria, kas iti panangbisitana ken Elisabet ken ti reaksionna idi nagbati ni Jesus idiay templo.—w17.08, p. 32.

Ania ti dadduma a banag a nalasatan ti Biblia?

Iti panaglabas ti panawen, nagbalbaliw ti kaipapanan dagiti sasao ken termino a nausar iti Biblia. Gapu iti panagbalbaliw ti gobierno, naapektaran ti gagangay a maus-usar a lengguahe. Nabusor met idi ti pannakaipatarus ti Biblia kadagiti lengguahe a gagangay a maus-usar.—w17.09, p. 19-21.

Addaantayo kadi iti anghel de la guardia?

Awan. Dinakamat ni Jesus a dagiti anghel dagiti adalanna makitkitada ti rupa ti Dios. (Mat. 18:10) Kayat a sawen ni Jesus nga interesado dagiti anghel kadagiti adalanna, saan ket a simimilagro a protektaranda ti tunggal maysa kadakuada.—wp17.5, p. 5.

Ania ti katan-okan a kita ti ayat?

No naibatay dayta kadagiti nalinteg a prinsipio, ti a·gaʹpe ti katan-okan a kita ti ayat. Mabalin a ramanenna ti dungngo ken panangipateg. Ngem iyanninawna dagiti nangato a prinsipio, kas iti panagsakripisio para iti pagimbagan ti sabsabali.—w17.10, p. 7.