NASUROKEN nga 80 ti tawen ni Diana. Adda Alzheimer’s disease ni lakayna a nagyan iti balay a pagtaraknan iti sumagmamano a tawen sakbay a natay. Kasapulan met nga ibturanna ti ipapatay ti dua nga annakna a lallaki ken ti sakitna a breast cancer. Ngem no adda ni Diana iti Kingdom Hall ken iti ministerio, makita dagiti kakongregasionna a kanayon a naragsak.

Nasurok nga 43 a tawen a nagserbi ni John kas agdaldaliasat a manangaywan. Ipatpategna dayta a pribilehio​—daytan ti biagna! Ngem nagsardeng iti trabaho a panagdaliasat tapno aywananna ti masakit a kabagianna, ket agserserbi itan iti maysa a kongregasion iti lugarda. No agkikitada kadagiti dati nga am-ammona iti asamblea wenno kombension, kasla awan ti nagbaliwanna. Naragsak latta.

Kasano a naaddaan iti rag-o da Diana ken John? Kasano nga agbalin a narag-o ti maysa nga agsagsagaba iti emosional ken pisikal? Ken kasano a naragsak latta ti maysa uray awanen ti ipatpategna a pribilehio? Kuna ti Biblia: “Daydiay nalinteg agrag-onto ken Jehova.” (Sal. 64:10) Ad-adda a maawatantayo daytoy a banag no matarusantayo dagiti pagtaudan ken saan a pagtaudan ti pudpudno a rag-o.

Sigurado nga ammom nga adda dagiti banag a kasla rag-o ti kanayon nga iyegda. Panunotem ti agkasaren a dua nga agpimpinnateg, ti panagbalin a nagannak, wenno ti panangawat iti maysa a teokratiko a pribilehio. Mangyeg dagita iti rag-o, ket agpayso a kasta ta nagtaud dagita ken Jehova. Isu ti nangirugi iti panagasawa, pinagbalinna a posible ti panaganak, ken mangipapaay kadagiti annongen iti kongregasion Kristiano.​—Gen. 2:18, 22; Sal. 127:3; 1 Tim. 3:1.

Ngem ti dadduma a pagtataudan ti rag-o ket mabalin a temporario. Makapaladingit ta posible a matay wenno di agmatalek ti maysa nga asawa. (Ezeq. 24:18; Os. 3:1) Adda dagiti annak nga agsukir kadagiti nagannakda ken iti Dios, nalabit mailaksidda pay ketdi. Saan a makaay-ayo ken Jehova ti panagserbi dagiti annak ni Samuel, ken nadidigra ti sangakabbalayan ni David gapu kadagiti dakes nga inaramidna. (1 Sam. 8:1-3; 2 Sam. 12:11) Ladingit ti resulta  dagita a pasamak. Saanda a mangyeg kadatayo iti rag-o.

Kasta met, mabalin nga agpatingga dagiti pribilehio iti panagserbi iti ili ti Dios, mabalin a gapu iti nakapuy a salun-at, obligasion iti pamilia, wenno panagbalbaliw ti urnos ti organisasion. Inamin ti adu a nakapasar iti kasta a panagbalbaliw nga il-iliwenda ti ragsak nga iyeg ti panangaramidda iti annongenda.

Nalakatayo a maibaga a mabalin a temporario dagita a pagtataudan ti rag-o. Gapuna, adda kadi sabali pay a kita ti rag-o, nga agtalinaed uray agbaliw dagiti kasasaad? Sigurado nga adda, ta nagtultuloy ti rag-o da Samuel, David, ken dadduma pay uray adda idi problemada.

Ammo ni Jesus ti pudpudno a rag-o. Nagsayaat ti kasasaadna bayat ti panagbiagna idiay langit sakbay a nagbalin a tao, ket ‘maragragsakan iti sanguanan ni Jehova iti isuamin a tiempo.’ (Prov. 8:30) Ngem idi addan ditoy daga, naipasango iti nakarigrigat a kasasaad no dadduma. Nupay kasta, naragsakan latta ni Jesus a mangaramid iti pagayatan ni Amana. (Juan 4:34) Ania ti determinasionna iti maudi nga or-oras ti panagsagabana? Mabasatayo: “Gapu iti rag-o a naikabil iti sanguananna inibturanna ti kayo a pagtutuokan.” (Heb. 12:2) Nasayaat ngarud nga usigentayo ti dua nga imbaga ni Jesus maipapan iti pudpudno a rag-o.

Naminsan, nagsubli ken Jesus dagiti 70 nga adalan kalpasan ti pannakaibaonda a mangasaba. Naragsakda ta nakaaramidda kadagiti milagro, ket naparuarda pay ketdi dagiti demonio. Imbaga ni Jesus: “Dikay pagrag-oan daytoy, a naipasakup kadakayo dagiti espiritu, ngem agrag-okayo agsipud ta ti nagnaganyo nailanaden iti langlangit.” (Luc. 10:1-9, 17, 20) Wen, napatpateg ti anamong ni Jehova ngem ti maysa nga espesial a pribilehio. Silalagip la ketdi kadagita a matalek nga adalan, ket dayta ti pakaigapuan iti dakdakkel a rag-oda.

Iti sabali a gundaway, nakisarita ni Jesus iti maysa a grupo. Imbaga ti maysa a Judio a babai a nakaragragsak la ketdi ti ina daytoy a nakalalaing a mannursuro, ni Jesus. Ngem inlinteg ni Jesus: “Saan, imbes ketdi, Naragsak dagidiay dumdumngeg iti sao ti Dios ken  mangsalsalimetmet iti dayta!” (Luc. 11:27, 28) Nagsayaat la ketdi ti rikna ti nagannak a maipagpannakkelna ti anakna, ngem ti ad-adda a pagtaudan ti rag-o ket ti nasayaat a relasion ken Jehova ken ti panagtulnog kenkuana.

Wen, ti tulbek iti pudpudno a rag-o ket ti pannakaammo nga an-anamongannatayo ni Jehova. Uray di makaparagsak dagiti problema, saanda a maikkat dayta a rag-o a marikriknatayo. Ti simamatalek a panangibtur kadagita ket panagballigi nga agresulta iti naragsak a puso. (Roma 5:3-5) Kanayonanna, ipaay ni Jehova ti espirituna kadagidiay agtalek kenkuana, ket rag-o ti maysa nga aspeto ti bungana. (Gal. 5:22) Matarusantayo ngarud no apay nga imbaga ti Salmo 64:10: “Daydiay nalinteg agrag-onto ken Jehova.”

Daytoy ti makagapu no apay nga addaan iti manayon a rag-o da Diana ken John, a nadakamat itay, bayat a maipaspasangoda iti naririgat a kasasaad. Imbaga ni Diana: “Nagkamangak ken Jehova, kas ti panagkamang ti maysa nga ubing iti nagannakna.” Kasano a naammuanna nga an-anamongan ti Dios? “Mariknak a binendisionannak ta makapagtultuloyak a nakaisem a mangasaba.” Ni John, nga aktibo latta iti ministerio uray awanen ti ipatpategna a trabaho a panagdaliasat, inlawlawagna ti dakkel a nakatulong kenkuana: “Sipud 1998, idi nadutokanak a mangisuro iti Ministerial Training School, ad-adun ti tiempok iti personal a panagadal.” Inyebkasna ti kaririknada ken baketna: “Saankami a narigatan nga ag-adjust ta kanayon nga ipaaymi ken Jehova ti amin a kabaelanmi iti aniaman a pribilehiomi. Dikam pagbabawyan dayta.”

Adu pay ti nakapadas a pudpudno ti Salmo 64:10. Kas pagarigan, nasuroken a 30 a tawen nga agserserbi iti Bethel iti United States ti maysa a pagassawaan. Idi kuan, na-reassign-da kas special pioneer. Ngem inaminda: “Natural nga agladingitka no mapukawmo ti maysa a banag a patpatgem,” ngem innayonda: “Saan a mabalin nga agladingitka iti agnanayon.” Dagus a nakiramanda iti ministerio a kadua ti kongregasion. Kinunada pay: “Espesipiko nga inkararagmi ti sumagmamano a banag. Naparegtakami idi nakitami a masungsungbatan dagiti kararagmi ket dayta ti nangyeg kadakami iti rag-o. Di nagbayag kalpasan ti isasangpetmi iti kongregasion, nangrugin nga agpayunir ti dadduma a kakabsat, ken nabendisionankami iti dua a progresibo nga iyad-adalan iti Biblia.”

Siempre, saan a kanayon a nalaka ti agbalin a narag-o, ta sigurado nga adda dagiti rigat ken nam-ay. Ngem impaisurat ni Jehova ti makaliwliwa a sasao a masarakantayo iti Salmo 64:10. Uray no adda dagiti gundaway a maupaytayo, masiguradotayo nga “agrag-onto ken Jehova” dagidiay agtultuloy a “nalinteg” babaen ti panagtalinaedda a matalek uray no agbalbaliw ti kasasaadda. Mangnamnamatayo met a matungpalto ti kari ni Jehova a “baro a langlangit ken baro a daga.” Kalpasanna, naan-anayton a maikkat ti kinaimperpekto. ‘Agrag-onto iti agnanayon’ ti amin nga adipen ti Dios gapu iti aramiden ken ipaaynanto sadiay.—Isa. 65:17, 18.

Panunotem ti mapasamakto: perpektonton ti salun-attayo ket binigat nga addaantayo iti naan-anay a pigsa. Kasanoman kasaem dagiti napasarantayo, saantayton a malagip dagita. Naipasigurado kadatayo a “dagiti immun-una a banag saandanto a maipalagip, saandanto met a tumpuar iti puso.” Ti milagro a panagungar pagkaykaysaennanto dagidiay agpipinnateg. Mariknanto ti minilion a tattao ti narikna dagiti nagannak ti balasitang a 12 ti tawenna a pinagungar ni Jesus: “Saanda a natngelan ti riknada buyogen ti dakkel a panagsiddaaw.” (Mar. 5:42) Kamaudiananna, pudpudnonton a maibaga a “nalinteg” ti tunggal tao ditoy daga iti agnanayon, ket “agrag-o[danto] ken Jehova.”