Binasayo kadi a naimbag dagiti nabiit pay a ruar Ti Pagwanawanan? Kitaenyo no masungbatanyo dagiti sumaganad a saludsod:

Ania ti pammaneknek iti Biblia nga adda empatia ti Dios kadatayo?

Idi naadipen idiay Egipto dagiti nagkauna nga Israelita, ammo ti Dios dagiti rigatda ken nariknana dagiti sagsagabaenda. (Ex. 3:7; Isa. 63:9) Naaramidtayo iti ladawan ti Dios isu nga adda empatiatayo. Adda empatiana kadatayo uray no mariknatayo a ditay maikari iti ayatna.—wp18.3, p. 8-9.

Kasano a nakatulong dagiti pannursuro ni Jesus tapno maparmek dagiti tattao ti panangidumduma?

Manangidumduma ti adu a Judio idi tiempo ni Jesus. Impaganetget ni Kristo a napateg ti kinapakumbaba ken kinondenarna ti panangidumduma iti puli. Pinaregtana dagiti pasurotna nga ibilangda ti amin kas kakabsatda.—w18.06, p. 9-10.

Ania ti masursurotayo iti saan a panangipalubos ti Dios a makastrek ni Moises iti Naikari a Daga?

Nasinged ni Moises ken ni Jehova. (Deut. 34:10) Idi dandanin agpatingga ti 40 a tawen dagiti Israelita iti let-ang, nagreklamoda manen iti kaawan ti danum. Imbaga ti Dios ken ni Moises a kasaritana ti dakkel a bato, ngem pinang-orna ketdi dayta. Mabalin a nakapungtot ni Jehova ta saan a sinurot ni Moises ti bilinna wenno saan a ti Dios ti pinadayawanna iti dayta a milagro. (Num. 20:6-12) Isuro dayta kadatayo ti kinapateg ti panagtulnog ken panangpadayaw ken Jehova.—w18.07, p. 13-14.

Apay a nalaka ti agkamali no ibataytayo ti panangukomtayo iti makinruar a langa?

Adda tallo a banag no apay a kumita ti adu a tattao iti makinruar a langa: puli, kinabaknang wenno kinapanglaw, ken edad. Napateg nga ikagumaantayo a matmatan ti sabsabali sigun iti di mangidumduma a panangmatmat ti Dios! (Ara. 10:34, 35)—w18.08, p. 8-12.

Ania dagiti pamay-an a matulongan dagiti nataengan a Kristiano ti sabsabali?

Ti maysa a nataengan a Kristiano a nagbaliw ti annongenna ket ipatpateg latta ti Dios ken adu ti maitulongna iti sabsabali. Mabalinna a paregtaen dagiti di manamati nga assawa, tulongan dagiti di aktibo, mangyadal iti Biblia, ken palawaen ti ministeriona.—w18.09, p. 8-11.

Ania ti linaon ti Toolbox iti Panangisuro dagiti Kristiano?

Adda dagiti contact card, imbitasion, walo a nagpipintas a tract, ken dagiti magasin a Pagwanawanan ken Agriingkayo! Adda pay iti toolbox ti sumagmamano a broshur, ti dua a libro a kangrunaan a pangyadal, ken uppat a makatulong a video, kas iti Apay nga Adalem ti Biblia?—w18.10, p. 16.

Kasano a ti maysa a Kristiano ‘magatangna ti kinapudno,’ kas imparegta ti Proverbio 23:23?

Saantayo a baybayadan ti kinapudno iti kuarta. Ngem masapul nga usarentayo ti tiempotayo ken agreggettayo tapno magun-odtayo dayta.—w18.11, p. 4.

Ania ti masursurotayo iti panangtrato ni Oseas ken ni Gomer nga asawana?

Naulit-ulit a nakikamalala ni Gomer, ngem pinakawan ni Oseas ken saanna nga insina. No nakaaramid iti seksual nga immoralidad ti asawa ti maysa a Kristiano, mabalinna a pakawanen ti nakabasol nga asawana. No makidenna manen iti nakabasol nga asawana, awanen ti Nainkasuratan a pangibatayanna a mangidiborsio kenkuana.—w18.12, p. 13.