Gapu ta alisto nga agpanunot ni Danièle, nayarasaasna kaniak, “Saanmon nga aw-awagan dagiti polis, addada ditoyen!” Iti likudmi, adda lugan a nagsardeng iti sango ti hotel. Naarestokami kalpasan ti sumagmamano a minuto. Imbag laengen ta nabagaannak ni Danièle isu a dagus a naipasak ti dadduma a dokumento iti maysa a kabsat.

Idi ip-ipandakami iti estasion ti polisia, napampanunotko a nagsayaat ta addaanak iti natured ken naespirituan ti panagpampanunotna nga asawa. Maysa laeng daytoy iti adu a gundaway a nagtinnulongkami ken Danièle. Palubosandak a mangilawlawag no apay a bimmisitakami kadagiti pagilian nga adda restriksion ti trabahotayo.

Nayanakak idi 1930 idiay Croix, maysa a bassit nga ili iti makin-amianan a France. Napeklan a Katoliko ti pamiliami. Linawas a makimisakami, ken masansan a tumultulong ni Tatang iti simbaan. Ngem idi dandaniakon agtawen iti 14, nakitak ti panaginsisingpet ti relihionmi.

Ti France ket sinakup ti armada ti Germany idi Gubat Sangalubongan II. Kadagiti sermon ti padimi, kanayon nga ibagana a suportaranmi ti gobierno ti Vichy a sumupsuporta iti Nazi. Nakigtotkami kadagiti sermonna. Kas iti adu nga umili ti France, inlimlimedmi ti dimngeg iti estasion ti radio a BBC, a paggapgapuan dagiti damag maipapan kadagiti Aliado a puersa. Pagammuan ta binaliwan ti padi ti suportaranna ket nangyurnos iti misa ti panagyaman a mangselebrar iti iyaabante dagiti Aliado a puersa idi Septiembre 1944. Nasdaawak iti inaramid ti padi. Napukaw ti panagtalekko kadagiti papadi.

Di nagbayag kalpasan ti gubat, natay ni tatangko. Adda idin asawa ni manangko ken addada idiay Belgium, isu a nariknak a responsabilidadko nga aywanan ni Nanang. Nagtrabahoak iti pagaramidan iti tela. Napeklan a Katoliko ti amok ken dagiti annakna a lallaki. Nasayaat ti masakbayak iti kompaniada, ngem asideg idin a maipasangoak iti pannubok.

Nagbalin a Saksi ni manangko a Simone ket pinasiarnakami idi 1953. Nakalalaing a nangusar iti Bibliana a nangibutaktak kadagiti ulbod a pannursuro ti Iglesia Katolika, a kas iti umap-apuy nga impierno, Trinidad, ken ti saan nga ipapatay ti kararua. Idi damo, inrasonko a saan met a Katoliko a Biblia ti  inusarna, ngem dandaniak idin makombinsir a kinapudno ti ibagbagana. Kalpasanna, inikkannak kadagiti daan a ruar Ti Pagwanawanan. Nagagaranak a nangbasa kadagita iti kuartok iti rabii. Dagus a nabigbigko a daytoy ti kinapudno; ngem maamakak baka maikkatak iti trabahok no ilabanko ti pammatik ken Jehova.

Sumagmamano a bulan nga inad-adalko a sisiak ti Biblia ken dagiti artikulo ti Pagwanawanan. Kalpasanna, nagdesisionak a mapan iti Kingdom Hall. Talaga a nagustuak ti naayat a panaglalangen dagiti kakabsat iti kongregasion. Kalpasan ti innem a bulan a panangyadal kaniak ti eksperiensiado a kabsat, nabautisaranak idi Septiembre 1954. Di nagbayag, naragsakanak ta nagbalin a Saksi ni Nanang ken ti adingko a babai.

Makapaladingit ta natay ni Nanang sumagmamano a lawas sakbay ti iyaatenderko iti internasional a kombension idi 1958 idiay New York. Idi nakaawidakon, awanen ti aywanak a kapamiliak, isu nga immikkatak iti trabahok sa rinugiak ti agpayunir. Iti dayta a tiempo, nagbalin a nobiak ti naregta a payunir a ni Danièle Delie, ket nagkasarkami idi Mayo 1959.

Nangrugi ni Danièle iti amin-tiempo a serbisio idiay Brittany, nga adayo iti lugarda. Kasapulanna ti tured tapno makapangasaba iti dayta a lugar dagiti Katoliko ken agbisikleta a mapan kadagiti adayo a teritoria. Agpadakami a mamati iti kinaganat ti tiempo ken nakaas-asidegen ti panungpalan. (Mat. 25:13) Nakatulong ti kinamanagsakripisiona tapno makapagtultuloykami iti amin-tiempo a ministerio.

Sumagmamano nga aldaw kalpasan ti kasarmi, naibaonkami nga agserbi iti sirkito. Nasursuromi ti simple a panagbiag. Iti umuna a kongregasion a binisitami, 14 laeng ti agibumbunannag. Awan ti pagdagusan iti balay dagiti kakabsat isu a naturogkami iti stage ti Kingdom Hall. Siempre, saan a komportable, ngem nagsayaatan dayta ti bukotmi!

Uray adu ti ar-aramidenmi, saan a narigatan ni Danièle iti panagserbimi iti sirkito. Masansan nga an-anusannak nga urayen iti bassit a luganmi no bigla nga agmiting dagiti panglakayen. Saan a pulos nagreklamo. Dua laeng a tawen ti panagserbimi iti sirkito, a nakasursuruanmi iti kinapateg ti napudno a komunikasion ken panagtinnulong ti agassawa.​—Ecl. 4:9.

Idi 1962, naawiskami nga ageskuela iti 10 a bulan a kurso ti maika-37 a klase ti Gilead School idiay Brooklyn, New York. Iti 100 nga estudiante, 13 laeng ti agassawa, isu a pribilehiomi ti agkadua nga ageskuela. Malaglagipko pay ti pannakikaduami kadagiti kakabsat a nabileg ti pammatina, a kas kada Frederick Franz, Ulysses Glass, ken Alexander H. Macmillan.

Bayat ti panageskuelami, naparegtakami a mangparang-ay iti abilidadmi nga agpaliiw. No dadduma, no malpas ti klasemi iti Sabado, karaman iti training-mi ti panagpasiar iti New York City. Ammomi nga iti Lunes, isuratmi dagiti nakitami. Masansan  nga agawidkami a nabambannog iti rabii ti Sabado, ngem ti tour guide-mi, a boluntario iti Bethel, saludsodannakami no ania dagiti nakitami tapno malagipmi dagiti napateg a punto para iti eksaminasionmi. Iti maysa a Sabado, nagpasiarkami iti siudad iti intero a malem. Napankami iti maysa nga obserbatorio ket naadalmi ti maipapan kadagiti meteor ken meteorite. Iti American Museum of Natural History, naammuanmi ti nagdumaan ti alligator ken buaya. Idi agawidkamin iti Bethel, dinamag ti tour guide-mi, “Ania ti nagdumaan ti meteor ken meteorite?” Nabannog unayen ni Danièle isu a naisungbatna, “Daddadakkel ti ngipen dagiti meteorite!”

Nasorpresakami unay ta naibaonkami iti sangay ti France, a nagserbianmi iti nasurok a 53 a tawen. Idi 1976, nadutokanak a koordineytor ti Branch Committee ken naibaonak met a mangbisita kadagiti pagilian iti Africa ken iti Middle East. Maiparit wenno adda restriksion ti panangasabatayo sadiay. Isu a nakapankami idiay Gabon, a nakapasamakan ti kapadasanmi iti rugi daytoy nga artikulo. Kinapudnona, kasla diak kualipikado a mangasikaso kadagitoy a di ninamnama a responsabilidad. Ngem tinulongannak ni Danièle tapno maaramidak ti dandani amin nga annongek.

Manipud pay idi damo, ipatpategmin ti biagmi iti Bethel. Gapu ta nasursuro ni Danièle ti Ingles iti uneg ti lima a bulan sakbay a nageskuelakami iti Gilead, nagbalin a nalaing nga agipatarus kadagiti publikasiontayo. Nakaragragsakkami iti trabahomi iti Bethel, ngem nadoble dayta gapu iti pannakiramanmi kadagiti aktibidad ti kongregasion. Malaglagipko pay ti panaglugluganmi ken Danièle iti tren idiay Paris. Nakarabrabii no kuan ken nabambannogkamin, ngem nakaragragsakkami latta ta nayadalanmi dagiti progresibo nga iyad-adalanmi iti Biblia. Makapaladingit ta bigla a nagbalbaliw ti kasasaad ti salun-at ni Danièle isu a saanen a nasaranta a kas iti dati.

Idi 1993, nadayagnos nga adda kanser ti susona. Narigat ti proseso ti pannakaagasna, a pakairamanan ti operasion ken napigsa a chemotherapy. Kalpasan ti 15 a tawen, nadayagnos nga adda manen kanserna, ken nakarkaron dayta. Ngem ipatpategna unay ti trabahona nga agipatarus, isu nga agtrabaho no kabaelanna.

Uray nakaro ti sakit ni Danièle, saanmi a pulos pinanunot ti rummuar iti Bethel. Ngem adda latta dagiti karit a maipasango iti maysa a masakit iti Bethel, nangruna no saan nga ammo ti dadduma no kasano kakaro dayta a sakit. (Prov. 14:13) Uray no dandani idin 80 ti tawen ni Danièle, saan a madlaw nga adda sakitna ta naisem ken makaay-ayo latta ti langana. Dina inay-ay ti bagina no di ket impamaysana ti tumulong iti sabsabali. Ammona a dakkel ti maitulongna kadagiti agsagsagaba no denggenna ida. (Prov. 17:17) Dina pulos imbilang ti bagina kas mamalbalakad, ngem inusarna ti kapadasanna a tumulong iti adu a sister tapno dida pagbutngan ti kanser.

Masapul met nga ibturanmi dagiti baro a limitasion. Idi saanen a makapagtrabaho ni Danièle iti agmalmalem, inkagumaannak a tulongan. Adu ti  inaramidna tapno saanak unay a marigatan, isu a nakapagtultuloyak nga agserbi kas koordineytor ti Branch Committee iti 37 a tawen. Kas pagarigan, isagsaganana ti amin tapno mangaldawkami laengen iti kuartomi ken tapno makapagrelakskami bassit iti kada aldaw.​—Prov. 18:22.

Kanayon a naisangsangayan ti kinapositibo ni Danièle ken saan a naawanan iti namnama. Ngem naaddaan manen iti kanser iti maikatlo a gundaway. Nariknami nga awanen ti maaramidanmi. Pakpakapsuten ti agsasaruno a chemotherapy ken radiotherapy ti bagina, isu a no dadduma, saan payen a makapagna. Masaksaktan ti pusok no di maibaga ni baketko ti kayatna nga ibaga, idinto ta nalaing nga agipatarus.

Uray no kasla awan maaramidanmi, intultuloymi ti nagkararag ta kombinsidokami a saan a pulos nga ipalubos ni Jehova a sagabaenmi ti dimi kabaelan. (1 Cor. 10:13) Kanayon nga inkagumaanmi ti agbalin a manangapresiar iti tulong nga ipapaay ni Jehova babaen ti Saona, ti medical staff ti Bethel, ken ti naayat a suporta dagiti kakabsat.

Masansan a kiddawenmi ti panangiwanwan ni Jehova no ania a panangagas ti masapul a pilienmi. Adda pay idi tiempo a naisardeng ti pannakaagasna. Ti doktor ni Danièle iti 23 a tawen dina mailawlawag no apay a maawanan iti puot kada agpa-chemotherapy. Awan met ti maisingasingna a sabali a pamay-an. Nariknami nga awanen ti makatulong kadakami ken saanmi nga ammo ti mapasamak. Pagammuan ta adda sabali nga oncologist a mayat a mangagas ken Danièle. Kasla nangaramid ni Jehova iti dalan a pagruaran a tumulong kadakami a mangsango kadagiti pakadanaganmi.

Nasursuromi a sanguen ti pakadanaganmi babaen ti panangaramidmi iti kabaelanmi iti tunggal aldaw. Kas kinuna ni Jesus, “umdasen iti tunggal aldaw ti bukodna a kinadakes.” (Mat. 6:34) Nakatulong met ti panagbalin a positibo ken managpakatawa. Kas pagarigan, idi saan a nagpa-chemotherapy iti dua a bulan, nagisem ken inyangawna, “Ammom, ita pay la a simmayaat ti riknak!” (Prov. 17:22) Uray marigrigatan, maragragsakan latta a nangpraktis a sipipigsa kadagiti baro a kanta ti Pagarian.

Ti kinapositibona ti timmulong kaniak a mangsango kadagiti bukodko a limitasion. Kinapudnona, iti 57 a tawen a panagkaduami kas agassawa, inasikasona ti nadumaduma a kasapulak. Dina pay ketdi insuro no kasano ti agprito iti itlog! Isu nga idi nakaron ti sakitna, masapul a sursuruek ti aginnaw, aglaba, ken agluto iti simple a makan. Nakabuongak iti sumagmamano a baso, ngem maragragsakanak a mangaramid iti mangparagsak ken baketko. *

No lagipek ti napalabas, makitak nga adda dagiti napateg a nasursurok kadagiti limitasion gapu iti sakit ken panagmataengan. Umuna, uray no adu ti trabahotayo, masapul nga ipakitatayo latta nga ipatpategtayo ti asawatayo. Masapul nga usarentayo a naimbag dagiti tawen a napigsatayo pay a mangaywan kadagiti ipatpategtayo. (Ecl. 9:9) Maikadua, ditay unay pakadanagan dagiti babassit a banag; ta no saan, mabalin a ditay makita ti adu a bendision a tagtagiragsakentayo iti kada aldaw.—Prov. 15:15.

No subliak ti biagmi iti amin-tiempo a serbisio, talaga a mariknak a binendisionannakami ni Jehova iti nalablabes pay ngem iti mapanunotmi. Marikriknak met ti imbaga ti salmista: “Kinaasiannak ni Jehova.”​—Sal. 116:7, nwt-E.