1. Ania “ti talna ti Dios,” ken ania ti maitulongna no adda dayta kadatayo? (Filipos 4:6, 7)

 ADDA kita ti talna a saan nga ammo daytoy a lubong. Dayta “ti talna ti Dios,” ti kalmado a rikna gapu ta adda napateg a relasiontayo iti nailangitan nga Amatayo. Natalged ti riknatayo no adda kadatayo ti talna ti Dios. (Basaen ti Filipos 4:6, 7.) Matagiragsaktayo ti nasinged a pannakigayyem kadagiti mangay-ayat kenkuana. Matagiragsaktayo met ti nasinged a relasion iti “Dios ti talna.” (1 Tes. 5:23) No am-ammo, agtaltalek, ken agtultulnogtayo iti Amatayo, ti talna ti Dios ti mangpakalma iti madandanagan a pusotayo no narigat ti situasiontayo.

2. Apay a masiguradotayo a posible a maaddaantayo iti talna ti Dios?

² Talaga kadi a posible a maaddaantayo iti talna ti Dios no adda dagiti krisis, kas iti agwarwaras a sakit, didigra, gerra sibil, wenno pannakaidadanes? Mabutengtayo no mapasamak kadatayo ti maysa kadagita. Ngem imbalakad ni Jesus kadagiti pasurotna: “Saankayo a mariribukan wenno agbuteng.” (Juan 14:27) Imbag laengen ta sursuroten dagiti kakabsat dayta a balakad ni Jesus. Iti tulong ni Jehova, kalmadoda latta uray no ib-ibturanda dagiti nakaro a suot.

3. No adda epidemia wenno pandemia, kasano a mabalin a mapukaw ti talnatayo?

³ No adda epidemia wenno pandemia, mabalin a nakaro ti epektona iti dandani amin nga aspeto ti biag. Kitaentayo ti epekto ti COVID-19 iti adu a tattao. Iti maysa a panagadal, imbaga ti nasurok a 50% kadagiti nasurbey a marigatanda a maturog bayat dayta a pandemia. Nagresulta dayta iti bigla nga iyaadu dagiti madandanagan, madepdepres, agbarbartek, agdrogdroga,  naranggas kadagiti kapamiliada, ken naggandat nga agpakamatay. No adda agwarwaras a sakit iti lugaryo, kasano a makontrolmo ti danagmo ken maaddaanka iti talna ti Dios?

4. Apay a kalmadotayo no ammotayo dagiti impadto ni Jesus maipapan iti maudi nga al-aldaw?

⁴ Impadto ni Jesus a bayat ti maudi nga al-aldaw, adda makapapatay a saksakit, wenno agwaras a saksakit “iti nadumaduma a lugar.” (Luc. 21:11) Apay a kalmadotayo no ammotayo dagita? Saantayon a masdaaw no adda dagiti agwarwaras a sakit. Ammotayo a mapasamak dagita kas iti imbaga ni Jesus. No kasta, surotentayo ti imbalakad ni Jesus kadagiti sibibiag bayat ti tiempo ti panungpalan: “Dikay agdanag.”​—Mat. 24:6.

5. (a) Maitunos iti Filipos 4:8, 9, ania ti masapul nga ikararagtayo no adda agwarwaras a sakit? (b) Kasano a makatulong kenka ti panagdengngeg kadagiti audio recording ti Biblia?

⁵ Madanagan ken mabutengtayo unay no adda agwarwaras a sakit. Narikna dayta ti sister a ni Desi. b Gapu iti COVID-19, natay ti angkel, kasinsin, ken ti doktorna isu a mabuteng a baka makaptan iti virus ket maakaranna ti baketen a nanangna. Madandanagan met ta baka maikkat iti trabahona, isu a pampanunotenna no pangalaannanton iti igatangna iti kanenda ken pagabangda iti pagyananda. Mapuypuyat iti kapapanunotna kadagita. Ngem timmalna met laeng ti panunot ni Desi. Kasano? Espesipiko nga inkararagna a pagkalmaen ni Jehova tapno makapanunot iti positibo. (Basaen ti Filipos 4:8, 9.) Dimngeg iti “pannakisarita” kenkuana ni Jehova babaen kadagiti audio recording ti Biblia. Imbagana: “Gapu iti kalmado a boses dagiti parabasa, naksayan ti danagko ken naipalagip kaniak ti asi ni Jehova.”​—Sal. 94:19.

6. Kasano a matulongannaka ti personal a panagadal ken dagiti gimong ti kongregasion?

⁶ No adda agwarwaras a sakit, sigurado nga agbalbaliw ti dadduma a rutinam. Ngem dimo ipalubos a dayta ti manglapped iti personal a panagadal wenno pannakigimongmo. Ipalagip dagiti kapadasan kadagiti publikasion ken video-tayo a matalek dagiti kapammatiam uray no makapaspasarda kadagiti umasping a problema. (1 Ped. 5:9) No makigimongka, mapno ti isipmo kadagiti positibo a banag manipud iti Biblia. Maaddaanka met iti gundaway a mangparegta ken maparegta. (Roma 1:11, 12) No panunotem no kasano a tultulongan ni Jehova dagiti kapammatiam no agsakit, mabutbuteng, wenno malidlidayda, mapabileg ti pammatim ken agbalinka a kombinsido a tulongannaka met.

7. Ania ti masursurom ken apostol Juan?

⁷ Ikagumaam ti makikomunikar kadagiti  kakabsat. No adda agwarwaras a sakit, baka kasapulan a kanayon a surotentayo ti physical distancing uray no dagiti kapammatiantayo ti kakaduatayo. Kadagita a tiempo, baka mariknam ti kas iti narikna idi ni apostol Juan. Kayatna a personal nga agkitada iti gayyemna a ni Gayo. (3 Juan 13, 14) Ngem naamiris ni Juan a dina pay laeng maaramid dayta. Inaramid ngarud ni Juan ti mabalin nga aramidenna; sinuratanna ni Gayo. No saan a kanayon a posible a pasiarem dagiti kapammatiam, padasem a kontaken ida babaen ti telepono, selpon, video call, wenno teks. No kanayon a makikomunikarka kadagiti padam a Kristiano, nataltalged ken nataltalna ti riknam. No madandanaganka unay, kontakem dagiti panglakayen, ken awatem ti naayat a pammaregtada.​—Isa. 32:1, 2.

8. Kasano a mabalin a dadaelen ti didigra ti natalna a riknam?

⁸ Nagbalinka kadin a biktima ti layus, ginggined, wenno uram? Baka sobra latta ti panagdandanagmo uray no nabayagen a napasamak dayta. No natayanka kadagiti ipatpateg iti biag wenno nadadael dagiti sanikuam, baka malmaldaangka, awanen ti namnamam, wenno makapungtotka pay ketdi. Dina kaipapanan dayta a materialistikoka wenno kurang ti pammatim. Talaga la ngamin a narigat ti napasaram, isu a mabalin nga ekspektaren ti dadduma a negatibo ti reaksionmo. (Job 1:11) Ngem posible a maaddaanka latta iti talna uray kadagita a makapa-stress a situasion. Kasano?

9. Kasano nga insagananatayo ni Jesus kadagiti didigra?

⁹ Laglagipem dagiti impadto ni Jesus. Saan a kas iti dadduma iti lubong a dida pampanunoten a maapektaran ti biagda iti didigra, ekspektarentayo nga umadu ti didigra. Dadduma kadagita ti mabalin a mangapektar kadatayo. Imbaga ni Jesus kadagiti pasurotna nga adda mapasamak a “napipigsa a ginggined” ken dadduma pay a didigra sakbay nga umay ti panungpalan. (Luc. 21:11) Impadtona met ti “ikakaro ti kinadakes.” Kas pagarigan, masansan a makitkitatayo dagiti krimen, kinaranggas, ken terorismo. (Mat. 24:12) Saan a pulos nga imbaga ni Jesus a no maapektarantayo kadagita a kalamidad, binaybay-annatayon ni Jehova. Kinapudnona, adu a matalek nga agserserbi ken Jehova ti nagbalin a biktima dagiti didigra. (Isa. 57:1; 2 Cor. 11:25) Mabalin a dinatayo simimilagro a protektaran ni Jehova iti amin a didigra. Ngem itedna ti aniaman a kasapulantayo tapno agtalinaed a kalmado ken natalna ti riknatayo.

10. No saganaantayo ti didigra, kasano nga ipakita dayta nga adda pammatitayo? (Proverbio 22:3)

¹⁰ No adda emerhensia, nalaklakatayo nga agtalinaed a kalmado no implanotayo a nasaksakbay dagiti aramidentayo. Ngem ti kadi panagsagana ipakitana a kurang ti pammatitayo ken Jehova? Saan. Kinapudnona, no saganaantayo ti didigra, ipakpakitatayo a talaga nga adda pammatitayo a kabaelannatayo nga aywanan ni Jehova. Kasano? Ibalbalakad ti Sao ti Dios nga agsaganatayo kadagiti posible a didigra. (Basaen ti Proverbio 22:3.) Babaen kadagiti artikulo ti magasin, gimong ti kongregasion, ken naintiempuan a pakaammo, maulit-ulit nga iparparegta ti organisasion ti Dios a saganaantayo ti emerhensia. c Agtaltalektayo kadi ken Jehova? No wen, surotentayo dayta a balakad itan​—sakbay a dumteng ti didigra.

11. Ania ti masursurom iti kapadasan ni Margaret?

¹¹ Kitaentayo ti kapadasan ti sister a ni Margaret. Imbilin ti gobierno nga agbakuit gapu iti  uram iti kakaykaywan nga asideg iti balayna. Agiinnuna a pumanaw ti adu a tattao isu a nakaro ti trapik. Nagpuskol ken nagngisit ti asuk, isu a saan a makaruar ni Margaret iti luganna. Ngem nakalasat gapu ta nakasagana. Tugottugotna iti bagna ti maysa a mapa a pangkitaanna iti sabali a ruta tapno makapanaw iti lugarda. Sakbay ti uram, pinadasna payen ti dimmalan iti dayta a ruta tapno nalaklakana a masurotan no adda emerhensia. Nakalasat ni Margaret gapu iti panagsaganana.

12. Apay a masapul a surotentayo dagiti instruksion tapno natalgedtayo?

¹² Mabalin nga ibilin dagiti autoridad nga agtulnogtayo iti curfew, agbakuit, wenno surotentayo ti dadduma pay nga instruksion tapno agtalinaedtayo a natalged ken ti dadduma. Adda dagidiay saan a dagus nga agtulnog wenno itantanda ti agtulnog ta saanda a mapanawan dagiti sanikuada. Ania ti masapul a reaksion dagiti Kristiano? Ibaga kadatayo ti Biblia: “Maigapu iti Apo, agpasakupkayo iti tunggal tao, iti man ari a nangatngato ngem kadakayo wenno kadagiti gobernador, a dinutokan ti ari.” (1 Ped. 2:13, 14) Mangipapaay met ti organisasion ti Dios kadagiti instruksion tapno agtalinaedtayo a natalged. Kanayon a maipalpalagip kadatayo nga itedtayo kadagiti panglakayen ti kabaruan nga impormasion maipapan kadatayo tapno makontakdatayo no adda emerhensia. Inaramidmo kadin dayta? Baka makaawattayo met kadagiti instruksion nga agtalinaedtayo pay laeng iti balaytayo, agbakuittayo, no kasanotayo a makaala iti ayuda, wenno no kasano ken no kaanotayo a tumulong iti sabsabali. No ditay agtulnog, mabalin nga agpeggad ti biagtayo ken ti biag dagiti panglakayen. Laglagipentayo a kanayon nga ay-aywanandatayo dagita a matalek a lallaki. (Heb. 13:17) Imbaga ni Margaret, “Mamatiak unay a ti panagtulnogko iti instruksion dagiti panglakayen ken ti organisasion ti nangsalbar iti biagko.”

13. Ania ti nakatulong tapno agtalinaed a naragsak ken kalmado ti adu a nagbakuit a Kristiano?

¹³ Adu a kakabsat ti nagbakuit gapu iti didigra, gubat, wenno gerra sibil. Inkagumaanda ti makibagay iti baro a situasionda ken dagus a nakiramanda kadagiti naespirituan nga aktibidad. Tultuladenda dagiti nagkauna a Kristiano a naiwarawara gapu iti pannakaidadanes, isu nga agtultuloy nga ‘ipakpakaammoda  ti naimbag a damag ti sao ti Dios.’ (Ara. 8:4) Ti panangasaba ti tumultulong kadakuada nga agpokus iti Pagarian imbes a kadagiti narigat a kasasaad. Kas resultana, naragsak ken kalmadoda latta.

14. No maidadanestayo, kasano a mabalin a mapukaw ti talnatayo?

¹⁴ Gapu iti pannakaidadanes, mabalin a mapukawtayo ti adu a banag a mangpakpakalma kadatayo. Maragragsakan ken kontentotayo no nawayatayo nga aggigimong, mangasaba, ken mangaramid kadagiti nakairuamantayo a ditay mabuteng a baka maarestotayo. No mapukaw dagita a wayawayatayo, mabalin a madanagantayo ta ditay ammo ti sumaganad a mapasamak. Normal laeng ti kasta a rikna. Ngem masapul nga agannadtayo latta. Imbaga ni Jesus a mabalin a maitibkol dagiti pasurotna gapu iti pannakaidadanes. (Juan 16:1, 2) Kasanotayo ngarud nga agtalinaed a kalmado uray no maidadanestayo?

15. Apay a masapul a ditay mabuteng a maidadanes? (Juan 15:20; 16:33)

¹⁵ Ibaga kadatayo ti Sao ti Dios: “Maidadanesto met ti amin nga agtarigagay nga agbiag maitunos iti debosionda iti Dios kas adalan ni Kristo Jesus.” (2 Tim. 3:12) Marigatan idi ti brother a ni Andrei a mangakseptar nga impariten dagiti autoridad ti trabahotayo iti pagilianna. Ti rasonna idi ket: ‘Nakaad-adu ti Saksi ditoy. Kasano koma a maarestodakami amin?’ Sangkapanunot dayta ni Andrei isu a kanayon a madandanagan. Nupay kasta, ti situasion ket impabiang ti dadduma a kakabsat ken Jehova. Insaganadan ti bagida iti posible a pannakaarestoda. Ammoda ngamin a posible a mapasamak dayta, isu a saanda unay a madanagan a kas ken Andrei. Tinulad ida ni Andrei ket intalekna ti biagna iti Dios. Di nagbayag, kimmalma ken rimmagsaken, uray no adda pay latta dagiti problema. Mabalin a mapasamak met dayta kadatayo. Imbaga ni Jesus nga ekspektarentayo ti pannakaidadanes, ngem impasiguradona met a kayatayo ti agtalinaed a matalek.​—Basaen ti Juan 15:20; 16:33.

16. Ania nga instruksion ti masapul a pagtulnogantayo bayat a maidaddadanestayo?

¹⁶ No maiparit ti trabahotayo wenno adu a restriksion ti impataw dagiti autoridad, mabalin  a makaawattayo kadagiti instruksion manipud iti sanga nga opisina ken kadagiti panglakayen. Nairanta dagita a mangprotektar kadatayo tapno masigurado nga agtultuloy a makaawattayo iti naespirituan a taraon ken makapangasabatayo agingga a posible. Aramidem ti amin a kabaelam nga agtulnog iti instruksion a maawatmo, uray no dimo unay maawatan ti rason a naited dayta. (Sant. 3:17) Dimo met pulos ited dagiti impormasion maipapan kadagiti kakabsat wenno maipapan kadagiti aktibidad ti kongregasion kadagidiay awan karbenganda a mangammo iti dayta.​—Ecl. 3:7.

17. Kas kadagiti apostol idi umuna a siglo, ania ti determinasiontayo?

¹⁷ Ti maysa kadagiti kangrunaan a rason a gubgubaten ni Satanas ti ili ti Dios ket isuda ngamin ti “nadutokan a mangsaksi ken Jesus.” (Apoc. 12:17) Saanmo nga ipalubos a butbutngennaka ni Satanas ken ti lubongna. Naragsaktayo ken kalmado ti riknatayo no mangasaba ken mangisurotayo uray adda ti ibubusor. Idi umuna a siglo, imbilin dagiti lider dagiti Judio kadagiti apostol nga isardengda ti mangasaba. Ngem pinili dagita a matalek a lallaki ti agtulnog iti Dios. Intultuloyda ti nangasaba, ket dayta a trabaho ti nangparagsak kadakuada. (Ara. 5:27-29, 41, 42) Siempre, no malimlimitaran ti trabahotayo, masapul a naannadtayo no mangaskasabatayo. (Mat. 10:16) Ngem no aramidentayo ti amin a kabaelantayo, kalmado ti riknatayo ta ammotayo a maparparagsaktayo ni Jehova ken maipakpakaammotayo ti makaispal-biag a mensahe.

18. Siasino ti Gubuayan ti pudno a talna?

¹⁸ Makapagtalektayo nga uray kadagiti karirigatan a tiempo, maaddaantayo iti talna. Kadagita a tiempo, masapul a laglagipentayo a ti talna a kasapulantayo ket ti talna ti Dios, kayatna a sawen, ti talna a ni laeng Jehova ti makaipaay. Agtalekka kenkuana no maipaspasangoka iti agwarwaras a sakit, didigra, wenno pannakaidadanes. Agtalinaedka a nasinged iti organisasionna. Panunotem ti nagsayaat a masanguanan nga agur-uray kenka. Bayat nga ar-aramidem dagita, ‘addanto kenka ti Dios ti talna.’ (Fil. 4:9) Iti sumaruno nga artikulo, ammuentayo no kasanotayo a matulongan dagiti padatayo a Kristiano a maipaspasango iti rigat tapno maaddaanda iti talna ti Dios.