1. Ania ti epektona kadatayo no kanayon a panunotentayo ti kari ni Jehova a biag nga agnanayon?

 IKARKARI ni Jehova nga ‘agbiag nga agnanayon’ dagiti agtulnog kenkuana. (Roma 6:23) No utobentayo dayta a kayat nga isagut kadatayo ni Jehova, lallalo nga ayatentayo isuna. Panunotentayo daytoy: Ay-ayatennatayo la unay ti nailangitan nga Amatayo isu a kayatna nga isagut dayta tapno ditayton pulos maisina kenkuana.

2. Ania ti maitulong kadatayo ti naikari a biag nga agnanayon?

² Ti kari ti Dios a biag nga agnanayon ti tumulong kadatayo a mangibtur kadagiti mapaspasarantayo a suot. Uray no butbutngendatayo dagiti bumusbusor a patayendatayo, saantayo a makikompromiso. Apay? Ti maysa a rason ket ammotayo nga uray no mataytayo, no la ket ta matalektayo ken Jehova, pagungarennatayto ken adda namnamatayo a ditayton pulos matay. (Juan 5:28, 29; 1 Cor. 15:55-58; Heb. 2:15) Apay a masiguradotayo a posible nga agbiagtayo nga agnanayon? Usigentayo dagitoy a rason.

3. Apay a masiguradotayo a kabaelannatayo nga ipaayan ni Jehova iti biag nga agnanayon? (Salmo 102:12, 24, 27)

³ Ammotayo a kabaelannatayo nga ipaayan ni Jehova iti biag nga agnanayon ta isu ti Ubbog ti biag ken agnanayon a sibibiag. (Sal. 36:9) Kitaentayo ti sumagmamano la a teksto ti Biblia a mangpaneknek a ni Jehova ket datin nga adda ken kanayon nga adda. Kuna ti Salmo 90:2 a ni Jehova ket “manipud iti agnanayon agingga iti agnanayon.” Kasta met laeng ti ibagbaga ti Salmo 102. (Basaen ti Salmo 102:12, 24, 27.) Insurat pay ni propeta  Habakuk maipapan iti nailangitan nga Amatayo: “Saan kadi a nabayagen nga addaka, O Jehova? O Diosko, ti Nasantuan a Diosko, saanka a matay.”​​—Hab. 1:12.

4. Masapul kadi a madanagantayo no ditay maawatan ti ideya nga agnanayon a sibibiag ni Jehova? Ilawlawag.

⁴ Marigatanka kadi a mangtarus iti ideya nga “agnanayon” a sibibiag ni Jehova? (Isa. 40:28) Natural laeng dayta. Imbaga ni Elihu maipapan iti Dios: “Saantayo a mabilang ti kaadu dagiti tawenna.” (Job 36:26) Ngem no ditay maawatan ti maysa a banag, kayatna kadi a sawen a saanen nga agpayso dayta? Kas pagarigan, nupay mabalin a ditay naan-anay a maawatan no kasano a naadda ti lawag, kayatna kadi a sawen nga awan ti lawag? Siempre, saan! Kasta met laeng no maipapan ken Jehova. Kas tattao, mabalin a ditay naan-anay a maawatan a ni Jehova ket datin nga adda ken kanayon nga adda. Ngem saan a kaipapanan dayta a saan nga agnanayon a sibibiag ti Dios. Ti kinapudno maipapan iti Namarsua ket saan a nakadepende iti maawatan wenno ditay maawatan. (Roma 11:33-36) Sibibiagen ti Dios sakbay pay a napaadda ti uniberso​—agraman dagiti pagtataudan ti lawag a kas iti init. Masiguradotayo a ni Jehova “ti Nangaramid iti daga babaen ti pannakabalinna.” Wen, sibibiag isunan sakbay pay nga ‘inyunnatna ti langit.’ (Jer. 51:15; Ara. 17:24) Ania ti sabali pay a rason a masiguradotayo a posible nga agbiagtayo nga agnanayon?

5. Ania idi ti namnama ti immuna nga agassawa?

⁵ Adda pagpatinggaan ti biag ti amin a sibibiag a banag a pinarsua ni Jehova ditoy daga, malaksid kadagiti tattao. Isuda laeng ti inikkanna iti namnama nga agbiag nga agnanayon. Ngem impakdaar ni Jehova ken Adan: “Rumbeng a dimo kanen ti bunga ti kayo a pakaammuan iti naimbag ken dakes, ta sigurado a matayka iti aldaw a pannanganmo iti dayta.” (Gen. 2:17) No la koma ta nagtulnog ken Jehova da Adan ken Eva, saanda koma a natay. Rasonable laeng ngarud a panunotentayo a posible nga adda met la koma ti tiempo idi a palubosan ida ni Jehova a mangan manipud iti “kayo ti biag.” Kaipapanan dayta nga ipaspasigurado idi kadakuada ni Jehova a mabalinda ti “agbiag nga agnanayon.” b​—Gen. 3:22.

6-7. (a) Ania pay dagiti ebidensia a saan a naparsua dagiti tattao tapno matay? (b) Ania dagiti kayatmo nga aramiden iti masanguanan? (Kitaen dagiti ladawan.)

⁶ Naammuan ti dadduma a sientista a kabaelan ti utektayo nga urnongen ti ad-adu nga impormasion ngem iti maurnongtayo bayat ti  panagbiagtayo ita. Makapainteres unay dayta! Idi 2010, imbaga ti maysa nga artikulo iti Scientific American Mind a natantia a ti kapasidad ti utektayo ket agarup 2.5 a milion a gigabyte, a katupag ti tallo a milion nga oras (nasurok a 300 a tawen) a programa ti TV. Ngem mabalin nga adayo nga ad-adu pay nga impormasion ti malaon ti utektayo. Ipakita dayta nga inaramid ni Jehova ti utektayo nga agurnong iti ad-adu nga impormasion ngem iti maurnongtayo bayat ti 70 wenno 80 la a tawen a panagbiagtayo.​—Sal. 90:10.

⁷ Immula met ni Jehova kadatayo ti nasged a tarigagay nga agtultuloy nga agbiag. Maipapan kadagiti tattao, ibaga ti Biblia a ti Dios ‘inkabilna iti pusoda ti kinaagnanayon.’ (Ecl. 3:11) Dayta ti maysa a rason nga ibilangtayo ti ipapatay kas maysa a kabusor. (1 Cor. 15:26) No agsakittayo iti nakaro, awan kadin ti aramidentayo ket urayentayo lattan a mataytayo? Saan. Kaaduanna nga agpadoktortayo, ken mabalin nga agtomartayo iti agas tapno umimbagtayo. Kinaagpaysuanna, ar-aramidentayo ti amin tapno saantayo a matay. Ken no matay ti maysa nga ay-ayatentayo, ubing man wenno nataengan, saan kadi a nagsaem ti mariknatayo ken nabayag a mailiwliwagtayo dayta? (Juan 11:32, 33) Sigurado a saan nga immula ti nadungngo a Namarsua iti pusotayo ti tarigagay nga agbiag nga agnanayon ken saanna a pinarsua ti utektayo nga addaan iti kapasidad nga agtultuloy nga agsursuro no dina pinanggep nga agbiag nga agnanayon dagiti tattao. Ngem adda pay dagiti makakombinsir a rason tapno mamatitayo a mabalintayo ti agbiag nga agnanayon. Kitaentayo ti dadduma nga inaramid idi ni Jehova ken dagiti ar-aramidenna ita a mangpaneknek a saan a nagbalbaliw ti orihinal a panggepna.

8. Ania ti ipasigurado kadatayo ti Isaias 55:11 maipapan iti panggep ni Jehova para kadatayo?

⁸ Uray no nagbasol da Adan ken Eva a nakaigapuan ti ipapatay dagiti annakda, saan a nagbalbaliw ti panggep ni Jehova. (Basaen ti Isaias 55:11.) Panggepna latta nga agbiag nga agnanayon dagiti matalek a tattao. Ammotayo dayta gapu kadagiti imbaga ken inaramiden ni Jehova tapno matungpal ti panggepna.

9. Ania ti inkari ti Dios? (Daniel 12:2, 13)

⁹ Inkari ni Jehova a pagungarenna dagiti natay ken ikkanna ida iti gundaway nga agbiag nga agnanayon. (Ara. 24:15; Tito 1:1, 2) Sigurado ti matalek a tao a ni Job a kailiw ni Jehova a pagungaren dagiti natay. (Job 14:14, 15) Ammo ni propeta Daniel nga adda namnama dagiti tattao nga agungar ken adda oportunidadda nga agbiag nga agnanayon. (Sal. 37:29; basaen ti Daniel 12:2, 13.) Ammo met dagiti Judio idi kaaldawan ni Jesus a mabalin nga ikkan ni Jehova dagiti matalek nga adipenna iti “biag nga agnanayon.” (Luc. 10:25; 18:18) Namin-adu nga imbaga ni Jesus dayta a kari, ken isu a mismo ket pinagungar ni Amana.​—Mat. 19:29; 22:31, 32; Luc. 18:30; Juan 11:25.

10. Ania ti paneknekan dagiti napasamak idin a panagungar? (Kitaen ti ladawan.)

¹⁰ Ni Jehova ti mangmangted iti biag ken adda pannakabalinna a mangisubli iti biag dagiti tattao. Inikkanna iti pannakabalin ni propeta Elias a mangpagungar iti anak ti maysa a balo a taga-Sarefat. (1 Ar. 17:21-23) Idi agangay, iti tulong ti Dios, pinagungar ni propeta Eliseo ti anak ti maysa a babai idiay Sunem. (2 Ar. 4:18-20, 34-37) Dagita ken ti dadduma pay a panagungar ket prueba nga adda pannakabalin ni Jehova a mangisubli iti biag dagiti natay. Idi adda ni Jesus ditoy daga, pinaneknekanna nga inikkan ni Amana iti pannakabalin a mangpagungar. (Juan 11:23-25, 43, 44) Adda itan ni Jesus idiay langit ken naiteden kenkuana “ti amin nga autoridad idiay langit ken ditoy daga.” Kabaelanna ngarud a tungpalen ti kari a mapagungar ti “amin a natay nga adda iti pakalaglagipan a tanem” nga addaan iti namnama nga agbiag nga agnanayon.​—Mat. 28:18; Juan 5:25-29.

11. Gapu iti subbot, kasano a posible nga agbiagtayo nga agnanayon?

¹¹ Apay nga impalubos ni Jehova ti nasaem nga ipapatay ti dungdungnguenna nga Anak? Daytoy ti imbaga ni Jesus a rason: “Kasta unay ti panagayat ti Dios iti lubong nga uray la intedna ti bugbugtong nga Anakna, tapno saan a madadael ti asinoman a mangipakita iti pammati kenkuana no di ket maaddaan iti biag nga agnanayon.” (Juan 3:16) Idi inted ti Dios ti Anakna kas subbot a pangabbong kadagiti basoltayo, pinagbalinna a posible kadatayo ti agbiag nga agnanayon. (Mat. 20:28) Inlawlawag ni apostol Pablo dayta a napateg a paset ti panggep ti Dios idi insuratna: “No kasano nga adda ipapatay gapu iti maysa a tao, adda met panagungar dagiti natay gapu iti maysa a tao. Ta no kasano a matmatay ti amin gapu ken Adan, mapagbiagto met ti amin gapu iti Kristo.”​—1 Cor. 15:21, 22.

12. Kasano nga itungpal ti Pagarian ti panggep ni Jehova para kadatayo?

¹² Insuro ni Jesus kadagiti pasurotna nga ikararagda nga umay ti Pagarian ti Dios ken maaramid ti pagayatan ti Dios ditoy daga. (Mat. 6:9, 10) Karaman iti panggep ti Dios ti panagbiag nga agnanayon dagiti tattao ditoy daga. Tapno mapasamak dayta, inapointaran ni Jehova ti Anakna kas Ari ti Mesianiko a Pagarian. Ur-urnongenen ti Dios ti 144,000 a tattao manipud ditoy daga a tumulongto ken Jesus a mangitungpal iti pagayatan ti Dios.​—Apoc. 5:9, 10.

13. Ania ti ar-aramiden ni Jehova ita, ken ania ti masapul nga aramidem?

 ¹³ Ur-urnongen itan ni Jehova ti “dakkel a bunggoy” dagiti tattao ken sansanayenna ida nga agbalin nga iturayan ti Pagarianna. (Apoc. 7:9, 10; Sant. 2:8) Ikagkagumaan ti dakkel a bunggoy a paruten ti gura iti pusoda uray no agbibiagda iti lubong a napno iti buteng ken saan nga agkaykaysa gapu iti gubat. Iti simboliko a pamay-an, pitpitpitendan dagiti espadada tapno agbalin a subsob ti arado. (Mik. 4:3) Imbes a makigubatda a pakatayan ti adu, tultulonganda dagiti tattao a makasarak iti “pudpudno a biag” ket isursuroda kadakuada ti maipapan iti pudno a Dios ken kadagiti panggepna. (1 Tim. 6:19) Mabalin a busoren ida dagiti kapamiliada wenno agproblemada iti pinansial gapu ta supsuportaranda ti Pagarian ti Dios. Ngem sigsiguraduen ni Jehova a maipaay dagiti kasapulanda. (Mat. 6:25, 30-33; Luc. 18:29, 30) Dagita ti mangipasigurado kadatayo nga agpaypayso ti Pagarian ti Dios ken itultuloyna nga itungpal ti panggep ni Jehova.

14-15. Kasano a matungpal ti kari ni Jehova nga agnanayon nga awanton ni patay?

¹⁴ Agturturayen ni Jesus idiay langit ken tungpalennanton ti amin a kari ni Jehova. (2 Cor. 1:20) Manipud pay idi 1914, parparmekenen ni Jesus dagiti kabusorna. (Sal. 110:1, 2) Asidegen ti naan-anay a panagballigina ken dagiti kakaduana nga agturay ket dadaelendanton ti amin a managdakdakes.​—Apoc. 6:2.

 ¹⁵ Bayat ti Sangaribu a Tawen a Panagturay ni Jesus, mapagungarto dagiti natay ken matulongan dagiti natulnog a tattao nga agbalin a perpekto. Kalpasan ti maudi a pannubok, dagiti nalinteg iti imatang ni Jehova “kukuadanto ti daga, ket agyandanto iti dayta iti agnanayon.” (Sal. 37:10, 11, 29) Makaparagsak met ta “mapukawto ti maudi a kabusor, ni patay.”​—1 Cor. 15:26.

16. Ania koma ti kangrunaan a motibotayo nga agserbi ken Jehova?

¹⁶ Kas iti naammuantayon, ti namnamatayo nga agbiag nga agnanayon ket sititibker a naibatay iti Sao ti Dios. Dayta a namnama ti makatulong kadatayo nga agtalinaed a matalek bayat dagitoy narigat a maudi nga al-aldaw. Ngem tapno maparagsaktayo ni Jehova, masapul a saantay la nga agserbi kenkuana ta kayattayo ti agbiag nga agnanayon. Ti koma kangrunaan a rason nga agtalinaedtayo a matalek ken Jehova ken ni Jesus ket gapu ta ay-ayatentayo unay ida. (2 Cor. 5:14, 15) Gapu iti dayta nga ayat, kayattayo ida a tuladen ken kayattayo met nga ipakaammo iti dadduma ti namnamatayo. (Roma 10:13-15) No sursuruentayo ti agbalin a naparabur ken saan la a ti bagitayo ti pampanunotentayo, ibilangnatayo ni Jehova kas gagayyemna iti agnanayon.​—Heb. 13:16.

17. Ania ti masapul a pilien ti tunggal maysa kadatayo? (Mateo 7:13, 14)

¹⁷ Maysatayto kadi kadagiti agbiag nga agnanayon? Inlukat kadatayo ni Jehova dayta nga oportunidad. Adda kadatayon no pilientayo ti agtalinaed iti dalan nga agturong iti biag. (Basaen ti Mateo 7:13, 14.) Anianto ti kasasaad ti biag inton agbiagtayo nga agnanayon? Masungbatan dayta iti sumaruno nga artikulo.