MAADAL NGA ARTIKULO 50
“Makikaduakanto Kaniak Idiay Paraiso”
“Pudno kunak kenka ita nga aldaw, makikaduakanto kaniak idiay Paraiso.”—LUC. 23:43.
KANTA 145 Paraiso nga Inkari ti Dios
ITI DAYTOY A PANAGADAL a
1. Sakbay unay a natay ni Jesus, ania ti imbagana iti kaabayna a kriminal? (Lucas 23:39-43)
AGPAKPAKARIGAT unay ni Jesus ken ti dua a kriminal nga adda iti abayna bayat a dandanin magsat ti angesda. (Luc. 23:32, 33) Gapu ta lalaisenda ni Jesus, nalawag a saanna ida nga adalan. (Mat. 27:44; Mar. 15:32) Ngem nagbalbaliw ti maysa kadakuada. Imbagana: “Jesus, laglagipennak inton addakan iti Pagariam.” Insungbat ni Jesus: “Pudno kunak kenka ita nga aldaw, makikaduakanto kaniak idiay Paraiso.” (Basaen ti Lucas 23:39-43.) Awan ti ebidensia nga inawat dayta a kriminal ti mensahe maipapan iti “Pagarian ti langit” nga inkasaba ni Jesus bayat ti ministeriona. Ken saan a pulos nga imbaga ni Jesus a sumrek dayta a lalaki iti Pagarian. (Mat. 4:17) Ti tuktukoyen ni Jesus ket ti Paraiso a daga iti masanguanan. Apay a kasta ti maibagatayo?
2. Ania ti mangipakita a Judio ti agbabbabawi a kriminal?
2 Posible a maysa a Judio ti agbabbabawi a kriminal. Imbagana iti kaduana a kriminal: “Awan kadi a talaga ti panagbutengmo iti Dios uray no madusdusaka la ngaruden a kas kenkuana?” (Luc. 23:40) Maymaysa a Dios ti pagdaydayawan dagiti Judio, ngem mamati dagiti tattao kadagiti nasion iti adu a dios. (Ex. 20:2, 3; 1 Cor. 8:5, 6) No koma saan a Judio dagidiay a kriminal, ti koma naisaludsod ket, “Awan kadi a talaga ti panagbutengmo kadagiti dios?” Kasta met a saan a kadagiti tattao kadagiti nasion ti nakaibaonan ni Jesus, no di ket kadagiti “laeng umili ti Israel a nayarig iti napukaw a karnero.” (Mat. 15:24) Impakaammo ti Dios kadagiti Israelita a pagungarenna dagiti natay. Mabalin nga ammo dayta ti agbabbabawi a kriminal, ket kas ipasimudaag dagiti imbagana, namati a pagungaren ni Jehova ni Jesus tapno agturay iti Pagarian ti Dios. Posible a ninamnama dayta a lalaki a pagungarento met isuna ti Dios.
3. Ania ti mabalin a napanunot ti agbabbabawi a kriminal idi dinakamat ni Jesus ti Paraiso? Ilawlawag. (Genesis 2:15)
3 Kas maysa a Judio, ammo la ketdi ti agbabbabawi a kriminal ti maipapan kada Adan ken Eva ken ti Paraiso nga inaramid ni Jehova a pagyananda. Isu nga idi dinakamat ni Jesus ti maipapan iti Paraiso, mabalin a ti napanunot ti kriminal ket maysa a napintas a hardin ditoy daga.—Basaen ti Genesis 2:15.
4. Ania ti masapul a panunotentayo gapu iti imbaga ni Jesus iti maysa kadagiti kriminal?
4 Ti imbaga ni Jesus iti kriminal ti masapul a mangtignay kadatayo a mangpanunot no anianto ti kasasaad ti biag idiay Paraiso. Kinapudnona, adda masursurotayo maipapan iti Paraiso iti natalna idi a panangituray ni Ari Solomon. Ibaga ti Biblia a ni Jesus ket natantan-ok ngem ni Solomon. Manamnamatayo a makipagtrabahonto ni Jesus kadagiti kakaduana nga agturay tapno pagbalinenda ti daga a napintas a paraiso. (Mat. 12:42) Masapul ngarud nga interesado ti ‘sabsabali a karnero’ a mangammo iti aramidenda tapno kualipikadoda nga agbiag nga agnanayon iti Paraiso.—Juan 10:16.
ANIANTO TI KASASAAD TI BIAG IDIAY PARAISO?
5. Ania dagiti mapampanunotmo a kasasaadto ti biag idiay Paraiso?
5 Ania dagiti mapampanunotmo a kasasaadto ti biag idiay Paraiso? Nalabit mapampanunotmo ti napintas a parke a kas iti hardin ti Eden. (Gen. 2:7-9) Baka malagipmo ti impadto ni Mikias nga agtugawto ti tunggal adipen ti Dios “iti sirok ti ubasna ken iti sirok ti kayona a higos.” (Mik. 4:3, 4) Posible a malagipmo met dagiti bersikulo iti Biblia a mangibagbaga a naruayto ti makan. (Sal. 72:16; Isa. 65:21, 22) Siguro, makitkitam payen ti bagim nga addaka iti napintas a hardin nga agtugtugaw iti sango ti lamisaan a napno iti agkakaimas a makan. Mabalin a maim-imadyinmo a maang-angotmo ti kinabanglo dagiti mula ken sabsabong. Ken kasla mangmangngegmo payen ti naragsak a panagkakatawayo a sangapamiliaan ken aggagayyem—agraman dagiti napagungar—bayat ti naragsak a panagkakaduayo. Amin dagita ket saan nga arapaap laeng. Sigurado a mapasamakto dagita ditoy daga. Nupay kasta, addanto met dagiti makaparagsak a trabahotayo idiay Paraiso.
6. Anianto ti aramidentayo idiay Paraiso? (Kitaen ti ladawan.)
6 Pinarsuanatayo ni Jehova a maragsakan iti trabahotayo. (Ecl. 2:24) Talaga a nagadunto ti trabahotayo bayat ti Sangaribu a Tawen a Panagturay ni Kristo. Dagidiay makalasat iti dakkel a rigat ken ti minilion a mapagungar ket agkasapulan iti bado, makan, ken pagyanan. Nakaad-adunto ti masapul nga aramidentayo tapno maipaay dagita. No kasano a masapul idi a kultibaren da Adan ken Eva ti hardin a pagnanaedanda, pribilehiotayo met a pagbalinento ti daga a Paraiso. Imadyinentayo met no kasanonto karagsak ti panangisuro iti minilion a mapagungar a bassit ti ammoda maipapan ken Jehova ken iti panggepna! Tulongantayto met dagiti matalek a tattao a nagbiag sakbay ti panawen ni Jesus a mangammo kadagiti napasamak manipud idi natayda.
7. Ania ti masiguradotayo, ken apay?
7 Masiguradotayo a ti biag idiay Paraiso ket natalna, nakarangrang-ay, ken nakaur-urnos. Apay? Ngamin, inikkannatayo ni Jehova iti pamalatpatan no anianto ti biag iti panagturay ti Anakna. Makitatayo dayta iti salaysay maipapan iti panagturay ni Ari Solomon.
PANAGTURAY NI ARI SOLOMON—PAMALATPATAN ITI PARAISO
8. Kasano a natungpal ti ibaga ti Salmo 37:10, 11, 29 kalpasan nga insurat dagita ni Ari David? (Kitaen ti “Salsaludsod Dagiti Agbasbasa” iti daytoy a ruar.)
8 Inwanwan ti Dios ni Ari David a mangisurat iti kasasaad ti biag inton agturay ti masirib ken matalek nga ari. (Basaen ti Salmo 37:10, 11, 29.) Masansan nga ipabasatayo ti Salmo 37:11 no ikasabatayo ti maipapan iti masanguanan a Paraiso. Maitutop dayta. Ngamin, kinotar ni Jesus dayta a teksto iti Sermonna iti Bantay a mangipakita a matungpal dayta iti masanguanan. (Mat. 5:5) Ngem ipakita met dagiti imbaga ni David ti kasasaad ti biag bayat ti panagturay ni Ari Solomon. Idi nagari ni Solomon iti Israel, nakataltalna ken nakarangrang-ay ti biag ti ili ti Dios iti daga a “pagay-ayusan ti gatas ken diro.” Imbaga ti Dios: “No itultuloyyo a suroten dagiti paglintegak . . . , mangipaayakto iti talna iti daga, ket maturogkayto a saan a mabutbuteng.” (Lev. 20:24; 26:3, 6) Natungpal dagita a kari bayat ti panagturay ni Solomon. (1 Cron. 22:9; 29:26-28) Inkari met ni Jehova nga “awanton” dagiti managdakdakes. (Sal. 37:10) No kasta, ti Salmo 37:10, 11, 29 ket natungpal idin ken matungpalto pay.
9. Ania ti imbaga ti reyna ti Sheba maipapan iti panagturay ni Ari Solomon?
9 Nadamag ti reyna ti Sheba ti natalna ken narang-ay a panangituray ni Solomon kadagiti Israelita. Nagbiahe dayta a reyna manipud iti adayo a pagarianna agingga idiay Jerusalem tapno makitana a mismo ti situasion. (1 Ar. 10:1) Kalpasan a napasiarna ti pagarian ni Solomon, imbagana: “Awan pay gayam iti kagudua ti naipadamag kaniak. . . . Naragsak dagiti tattaom, ken naragsak dagiti adipenmo a kanayon a kaduam, a dumdumngeg iti kinasiribmo!” (1 Ar. 10:6-8) Ngem dagiti kasasaad bayat ti panagturay ni Solomon ket pamalatpatan laeng kadagiti aramidento ni Jehova iti sangatauan bayat ti panagturay ti Anakna a ni Jesus.
10. Kadagiti ania a pamay-an a natantan-ok ni Jesus ngem ni Solomon?
10 Natantan-ok ni Jesus ngem ni Solomon iti amin a pamay-an. Imperpekto ni Solomon ken nakaaramid kadagiti nakaro a kamali kadagiti desisionna a nagresulta iti pannakaparigat ti ili ti Dios. Ngem ni Jesus ket perpekto nga Agturay ken saan nga agkamali. (Luc. 1:32; Heb. 4:14, 15) Napagballigian ni Jesus dagiti nakaro a pannubok nga inyeg kenkuana ni Satanas. Pinaneknekan ni Kristo nga isu ket saan a pulos nga agbasol wenno saan a mangaramid iti aniaman a mabalin a mangdangran kadagiti matalek nga iturayanna. Talaga nga isu ti kasayaatan nga agbalin nga Aritayo.
11. Siasino dagiti kakadua ni Jesus nga agturay?
11 Addanto 144,000 a kakadua ni Jesus nga agturay. Tumulongdanto a mangaywan iti sangatauan ken mangitungpal iti panggep ni Jehova para iti daga. (Apoc. 14:1-3) Maawatandanto dagiti iturayanda. Idi ngamin sibibiagda pay ditoy daga, napadasanda ti adu a suot ken rigat. Anianto ti aramiden dagita a kakadua ni Jesus?
ANIANTO TI ARAMIDEN DAGITI DINUTOKAN TI ESPIRITU?
12. Ania a trabaho ti ited ni Jehova iti 144,000?
12 Ad-adu nga amang ti trabaho a maited ken ni Jesus ken iti kakaduana nga agturay ngem iti trabaho a naited idi ken Solomon. Minilion a tattao iti maysa laeng a nasion ti inturayan dayta nga Israelita nga ari. Ngem binilion a tattao iti intero a lubong ti iturayanto dagiti agturay iti Pagarian ti Dios. Talaga a nagdakkel a pribilehio ti inted ni Jehova iti 144,000!
13. Anianto ti karaman iti nagpaiduma a trabaho dagiti kakadua ni Jesus nga agturay?
13 Kas ken Jesus, agserbinto ti 144,000 kas ar-ari ken papadi. (Apoc. 5:10) Iti Mosaiko a Linteg, dagiti papadi ti kangrunaan a timmulong idi kadagiti tattao tapno agtalinaedda a nasalun-at iti pisikal ken naespirituan. Ti Linteg ket “anniniwan dagiti nasayaat a bambanag nga umay.” Maibagatayo ngarud nga addanto met nagpaiduma a trabaho dagiti kakadua ni Jesus nga agturay. Tumulongdanto a mangipaay kadagiti pisikal ken naespirituan a kasapulan ti ili ti Dios. (Heb. 10:1) Ditay pay ammo no kasanonto a makikomunikar dagitoy nga ar-ari ken papadi kadagiti iturayan ti Pagarian ditoy daga. Aniaman ti iyurnos ni Jehova, makapagtalektayo nga idiay Paraiso, makaawatto dagiti adda ditoy daga iti panangiwanwan a kasapulanda.—Apoc. 21:3, 4.
ANIA TI MASAPUL NGA ARAMIDEN TI ‘SABSABALI A KARNERO’ TAPNO KUALIPIKADODA NGA AGBIAG IDIAY PARAISO?
14. Kasano nga agkaykaysa ti ‘sabsabali a karnero’ ken ti “bassit nga ipastoran”?
14 Tinukoy ni Jesus dagiti kakaduana nga agturay kas “bassit nga ipastoran.” (Luc. 12:32) Adda met dinakamatna a maikadua a grupo a tinukoyna kas ti ‘sabsabali a karnero.’ Dagita a dua a grupo ket maymaysa nga arban. (Juan 10:16) Ita, agtintinnulongen dagita a dua a grupo, ken agtultuloy dayta agingga nga agbalinen a Paraiso ti daga. Siempre, addanton idiay langit ti “bassit nga ipastoran” ken adda namnama ti ‘sabsabali a karnero’ nga agbiag nga agnanayon ditoy daga. Ngem adda pay dagiti masapul nga aramiden ita ti ‘sabsabali a karnero’ tapno kualipikadoda nga agbiag idiay Paraiso.
15. (a) Kasano a makitintinnulong ti ‘sabsabali a karnero’ kadagiti kakabsat ni Kristo? (b) Kasanom a matulad ti ulidan ti brother nga adda iti parmasia? (Kitaen ti ladawan.)
15 Natay ti agbabbabawi a kriminal sakbay a naaddaan iti gundaway a mangipakita nga ap-apresiarenna unay ti inaramid kenkuana ni Kristo. Ngem kas paset ti ‘sabsabali a karnero,’ adu ti gundawaytayo ita a mangipakita nga ipatpategtayo ni Jesus. Kas pagarigan, maipakitatayo nga ay-ayatentayo isuna babaen ti pamay-an ti panangtratotayo kadagiti kakabsatna a dinutokan ti espiritu. Imbaga ni Jesus a daytanto ti pangibatayanna a mangukom no siasino dagiti karnero. (Mat. 25:31-40) Masuportarantayo dagiti kakabsat ni Kristo no naregtatayo a tumulong kadakuada iti trabaho a panangasaba ken panagaramid iti adalan. (Mat. 28:18-20) Masapul ngarud nga usarentayo a naimbag dagiti naipaay a katulongan iti panangyadal iti Biblia, kas iti libro nga Agbiagka a Naragsak iti Agnanayon! No awan pay ti iyad-adalam iti Biblia, pagbalinem koma a kalat nga iyawis ti panagadal iti Biblia iti adu a tattao agingga a kayam.
16. Ania dagiti mabalintayo nga aramiden itan a mangipakita nga agsagsaganatayon nga agbalin nga umili ti Pagarian ti Dios?
16 Saanen a kasapulan nga urayentayo nga addatayon idiay Paraiso sakbay nga agbalintayo a kas kadagiti kita dagiti tattao a kayat ni Jehova nga agnaed sadiay. Ita pay laeng, mabalintayon nga ikagumaan nga agbalin a napudno iti sao ken aramid ken maaddaan iti balanse a panagbiag. Agbalintay met a napudno ken Jehova, iti bukodtayo nga asawa, ken kadagiti kapammatiantayo. No natulnogtayo itan kadagiti pagalagadan ti Dios bayat nga agbibiagtayo iti daytoy dakes a lubong, saantayton a marigatan nga agtulnog kenkuana idiay Paraiso. Mabalintay met a parang-ayen dagiti kualidadtayo ken agsursuro kadagiti paglaingan a mangipakita nga agsagsaganatayon nga agbiag sadiay. Kitaen ti artikulo a “Nakasaganaka Kadin a ‘Mangtawid iti Daga’?” iti daytoy a ruar.
17. Masapul kadi a madeprestayo gapu kadagiti naaramidantayo a basol? Ilawlawag.
17 Masapul met nga agporsegitayo a manglaban iti pannakakonsiensia gapu kadagiti naaramidantayo a nakaro a basol. Siempre, saantayo a pulos nga irason a gapu ta adda ti pangsubbot a daton, mabalintayon nga ‘igagara ti agbasol.’ (Heb. 10:26-31) Ngem masiguradotayo a no talaga a pinagbabawyantayon ti nakaro a basol nga inaramidtayo, nagpatulongtay ken Jehova babaen kadagiti panglakayen, ken nagbalbaliwtayon, naan-anay a napakawannatayon. (Isa. 55:7; Ara. 3:19) Laglagipentayo ti imbaga ni Jesus kadagiti Fariseo: “Immayak tapno ayabak dagiti managbasol, saan a dagiti nalinteg.” (Mat. 9:13) Nakabilbileg ti pangsubbot a daton ta kabaelanna nga abbongan ti amin a basoltayo.
MABALINMO TI AGBIAG NGA AGNANAYON IDIAY PARAISO
18. Ania dagiti kayatmonto a damagen iti kriminal a natay iti abay ni Jesus?
18 Maimadyinmo kadi ti bagim idiay Paraiso a makiin-innestoriaka iti kriminal a nakisarita ken Jesus? Sigurado nga agyamyamankayto a dua gapu iti daton ni Jesus. Baka ipayestoriamto ti ad-adu pay maipapan kadagiti napasamak bayat dagiti maudi nga oras ti biag ni Jesus ditoy daga. Posible a kayatmonto met a damagen no ania ti nariknana ta pinatgan ni Jesus ti kiddawna. Ngem baka damagennakanto met no ania dagiti napadasam bayat ti maudi nga al-aldaw ti sistema ni Satanas. Talaga a maysanto a pribilehio nga iyadal ti Sao ti Dios kadagiti tattao a kas iti dayta a lalaki!—Efe. 4:22-24.
19. Apay a dinto makauma ti biag idiay Paraiso? (Kitaen ti ladawan iti akkub.)
19 Dinto pulos makauma ti biag idiay Paraiso. Kanayonto nga adda makapnek ken makapainteres nga aramidentayo ken maam-ammotayo a tattao. Kangrunaan iti amin, inaldaw nga umad-adunto ti maammuantayo maipapan iti nailangitan nga Amatayo ken tagiragsakentayo dagiti probisionna. Ditayto pulos maibusan kadagiti masursuro maipapan kenkuana, ken nagadunto ti maammuantayo maipapan kadagiti pinarsuana. Bayat nga umat-atiddog ti biagtayo, lallalonto nga ayatentayo ti Diostayo. Anian a yamantayo ken Jehova ken ni Jesus ta inkarida a mabalintayo ti agbiag nga agnanayon idiay Paraiso!
KANTA 22 Naipasdeken ti Pagarian—Umay Koman!
a Masansan kadi a pampanunotem no anianto ti kasasaad ti biag idiay Paraiso? Makaparegta ti panangaramid iti dayta. No kanayon a pampanunotentayo dagiti isagsagana ni Jehova para kadatayo, naragragsaktayo a mangisuro iti dadduma maipapan iti baro a lubong. Pabilgen daytoy nga artikulo ti pammatitayo iti paraiso nga inkari ni Jesus.
b LADAWAN: Brother a kayatna nga isuronto dagiti mapagungar, isu nga ita pay laeng, addan dagiti isursurona.