Binasayo kadin a naimbag dagiti ruar Ti Pagwanawanan ita a tawen? Kitaenyo no masungbatanyo dagitoy a saludsod:

Ania dagiti pagimbaganna no iwayaantayo ti makisarita ken dumngeg ken Jehova, ken agpanunot maipapan kenkuana?

Makaaramidtayo kadagiti nasaysayaat a desision, agbalintayo a nalalaing a mannursuro, lallalo a tumibker ti pammatitayo, ken lallalo nga umuneg ti panagayattayo ken Jehova.​—w22.01, p. 30-31.

Ania ti maitulongna no sursuruentayo ti agtalek ken Jehova ken kadagiti pannakabagina?

Itan ti tiempo a sursuruentayo ti agtalek a kanayon a husto ti ar-aramiden ni Jehova babaen ti ditay panagduadua kadagiti instruksion ken desision dagiti panglakayen. Inton dumteng ti dakkel a rigat, nakasaganatayto nga agtulnog uray no mabalin a makaawattayo kadagiti instruksion a kasla karkarna wenno saan a lohikal.​—w22.02, p. 4-6.

Ania ti kayat a sawen ti anghel idi imbagana ken Zacarias ti maipapan iti “tinnag iti ima ni [Gobernador] Zerubabel”? (Zac. 4:8-10)

Impasigurado daytoy a sirmata iti ili ti Dios a nupay ti templo a naibangon ket saanen a kas iti kinadayag daydi immuna, maileppas dayta ken aprobado ti Dios.​—w22.03, p. 16-17.

Kasanotayo nga agbalin nga “ulidan . . . iti panagsao”? (1 Tim. 4:12)

Nasingpet ken nadayaw ti panagsaotayo iti ministerio, naimpusuan nga agkantatayo, kanayon nga agkomentotayo kadagiti gimong, agsaotayo iti pudno ken makapabileg, ken liklikantayo ti nasakit a panagsasao.​—w22.04, p. 6-9.

Apay a dagiti deskripsion maipapan iti uppat nga animal (pagarian) a nadakamat iti Daniel kapitulo 7 ket makita amin iti maysa laeng nga animal a nadeskribir iti Apocalipsis 13:1, 2?

Ti animal iti Apocalipsis 13 ket saan la ketdi a mangirepresentar iti maysa a pagarian a kas iti Roma. Irepresentarna ketdi ti amin a gobierno a nangituray ken mangiturturay iti sangatauan agingga ita.​—w22.05, p. 9.

Ania ti napateg a pamay-an a maipakitatayo nga agtaltalektayo iti hustisia ti Dios?

No adda nanginsulto, nangsair, wenno nagbasol kadatayo, ikagumaantayo nga iwaksi ti pungtot ken sakit ti nakem. Ipabiangtayo ken Jehova dagiti bambanag. Ikkatennanto ti amin a dakes nga epekto ti basol.​—w22.06, p. 10-11.

Ania ti masapul a laglagipen ti brother a mangidaulo iti kararag iti gimong?

Saan a mausar ti kararag a mangbalakad iti kongregasion wenno mangibaga iti pakaammo. Masapul a saan nga “atiddog” ti kararagna, nangruna iti rugi ti gimong. (Mat. 6:7)​—w22.07, p. 24.

Iti ania a pamay-an a “dagidiay nagaramid iti dakes” ket “mapagungarda tapno maukom”? (Juan 5:29)

Saanto a negatibo ti pannakaukomda a maibatay kadagiti inaramidda sakbay a natayda. Maobserbarandanto sigun kadagiti kababalin ken aramidenda kalpasan ti panagungarda.​—w22.09, p. 18.

Ania ti makapagagar nga imparegta ni J. F. Rutherford iti maysa a kombension idi Septiembre 1922?

Imbagana iti maysa a kombension idiay Cedar Point, Ohio, U.S.A.: “Adtoy, agturturayen ti Ari! Dakayo ti mangiwaragawag iti dayta. Ngarud, iwaragawagyo, iwaragawagyo, iwaragawagyo, ti Ari ken ti Pagarianna!”​—w22.10, p. 3-5.

Ania ti itampok ti Isaias kapitulo 30 a tallo a pamay-an a tultulongannatayo ti Dios nga agibtur?

Ipakita daytoy a kapitulo nga (1) dengdenggenna a naimbag ken sungsungbatanna dagiti kararagtayo, (2) iwanwanwannatayo, ken (3) bembendisionannatayo ita ken bendisionannatayo iti masanguanan.​—w22.11, p. 9.

Apay a maibagatayo a ti Salmo 37:10, 11, 29 ket natungpal idin ken matungpalto pay?

Dagiti imbaga ni David ket maitutop a mangdeskribir iti naparaburan a kasasaad ti biag idiay Israel, kas iti napasamak bayat ti panagturay ni Solomon. Idi kinotar ni Jesus ti bersikulo 11, ti tuktukoyenna ket ti paraiso iti masanguanan. (Mat. 5:5; Luc. 23:43)​—w22.12, p. 8-10, 14.