Saan. Husto ken agpayso ti insurat ni David.

Usigentayo ti insuratna iti dayta a bersikulo ken kadagiti kapadana a teksto: “Agnanayonto nga agkantaak iti panangidaydayaw iti naganmo, bayat nga inaldaw a tungtungpalek dagiti karik.” “Idaydayawka iti amin a pusok, O Jehova a Diosko, ken agnanayon nga itan-okko ti naganmo.” “Idaydayawko ti naganmo iti agnanayon nga awan inggana.”​—Sal. 61:8; 86:12; 145:1, 2.

Idi insurat ni David dagita, saanna nga impagarup a saanen a pulos a matay. Ammona nga ipapatay ti sentensia ni Jehova iti amin a tattao gapu iti basol, ken inamin ni David a maysa isuna a managbasol. (Gen. 3:3, 17-19; Sal. 51:4, 5) Pagaammona met a natay idi uray dagiti matalek a tattao a kas kada Abraham, Isaac, ken Jacob. Ken marikrikna idin ni David nga asidegen nga agpatingga ti biagna. (Sal. 37:25; 39:4) Ngem dagiti imbagana iti Salmo 61:8 ti mangipakita a kayatna ken determinado a mangidaydayaw iti Dios iti agnanayon, kayatna a sawen, iti intero a panagbiagna.​—2 Sam. 7:12.

Ti dadduma kadagiti insurat ni David ket maipapan kadagiti napasamak iti biagna kas makitatayo kadagiti superskripsion ti Salmo 18, 51, ken 52. Iti Salmo 23, dineskribir ni David ni Jehova kas maysa a pastor a mangiturturong, mangbangbang-ar, ken mangsalsalaknib. Kasta a klase a pastor ni David isu a kayatna ti agserbi iti Dios ‘bayat a sibibiag.’​—Sal. 23:6.

Laglagipentayo met a ni Jehova ti nangiwanwan ken David a mangisurat iti amin nga insuratna. Karaman kadagita dagiti padto maipapan kadagiti mapasamak iti masanguananna. Kas pagarigan, iti Salmo 110, imbaga ni David ti tiempo a ti Apona ket ‘agtugaw iti makannawan’ ti Dios idiay langit ken umawat iti dakkel a pannakabalin. Ania ti aramidenna? Parmekenna dagiti kabusor ti Dios ken “ukomennanto dagiti nasion” ditoy daga. Ni David ket apong ti Mesias, daydiay agturay manipud langit ken agbalin a “padi iti agnanayon.” (Sal. 110:1-6) Imbaga ni Jesus a ti padto iti Salmo 110 ket maipapan kenkuana ken matungpal dayta iti masanguanan.​—Mat. 22:41-45.

Wen, inwanwan ti Dios ni David a mangisurat maipapan iti tiempona ken iti masanguanan inton mapagungar ken maidaydayawna ni Jehova iti agnanayon. No kasta, ti Salmo 37:10, 11, 29 ket agaplikar iti tiempo nga insuratna dayta ken uray iti masanguanan. Natungpal dagita a teksto iti nagkauna nga Israel ken matungpal met inton tungpalen ti Dios dagiti karina.​—Kitaen ti parapo 8 ti artikulo a “Makikaduakanto Kaniak Idiay Paraiso” iti daytoy a ruar.

Ipakita ngarud ti Salmo 61:8 ken dagiti kapadana a teksto a kayat ni David nga idaydayaw ni Jehova iti nagkauna nga Israel iti intero a panagbiagna. Ipamatmat met dagita dagiti aramiden ni David iti masanguanan inton pagungaren isuna ni Jehova.