ADU a di naasawaan a babbai ti agserserbi kadagiti lugar nga addaan iti dakdakkel a panagkasapulan iti manangaskasaba iti Pagarian. Dadduma ti pinullo a tawenen nga agserserbi iti sabali a pagilian. Ania ti nakatulong kadakuada nga umakar iti sabali a pagilian? Ania ti nasursuroda iti panagserbi iti sabali a pagilian? Komustada itan? Ininterbiumi ti dadduma kadagitoy aduan iti kapadasan a kakabsat. No maysaka a kabsat a babai, ket single-ka, ken kayatmo a naragragsak ti ministeriom, masiguradomi a makatulong kenka dagiti komentoda. Kinapudnona, makatulong iti amin nga adipen ti Dios ti ulidanda.

Agduaduaka kadi no agballigi ti panagpayunirmo iti sabali a pagilian uray awan asawam? Agtawenen ni Anita iti 75 ken agduadua idi iti kabaelanna. Dimmakkel idiay England ken nagpayunir idi 18 ti tawenna. “Pagay-ayatko nga isuro kadagiti tattao ti maipapan ken Jehova,” kunana, “ngem diak impagarup a makapagserbiak iti sabali a pagilian. Diak pulos nagadal iti sabali a lengguahe ken panagkunak idi ket diak makasursuro. Isu nga idi naawisak nga ageskuela iti Gilead, nasorpresaak ta nakanumnumoak. Ngem pinanunotko, ‘No pampanunoten ni Jehova a kabaelak, ay ket, padasek.’ Nasurok a 50 a tawenen daydi. Manipud idi, nagserbiakon kas misionera ditoy Japan.” Innayon ni Anita a maragragsakan a mangparegta kadagiti babbalasang a mangtulad kenkuana nga agpayunir iti sabali a pagilian. Kunana: “Maragsakanak a mangibaga nga adu kadakuada ti nangpadas iti dayta.”

Adu kadagiti kakabsat a babbai nga agserserbi itan iti sabali a pagilian ti mabuteng idi damo. Kasano a naaddaanda iti tured?

“Idi dumakdakkelak, arapaapko ti makatulong iti dadduma,” kuna ni Maureen, nga agtawenen iti 64. Idi 20 ti tawennan, immakar idiay Quebec, Canada, nga agkasapulan idi iti adu a payunir. “Idi agangay, naawisak nga ageskuela iti Gilead, ngem mabutengak a mapan iti sabali a lugar a diak kadua dagiti gagayyemko.” Kinunana pay: “Madanaganak met a mangpanaw ken nanangko a mangay-aywan idi iti masakit a tatangko. Adu a rabii nga insangsangitko dagitoy ken Jehova. Idi imbagak dagitoy kadagiti nagannakko, pinaregtadak a patgak ti awis. Nakitak met ti naayat a suporta ti kongregasion kadagiti nagannakko. Gapu ta nakitak ti naayat a tulong ni Jehova, agtalekak a dinak met baybay-an. Iti dayta a gundaway, nakasaganaakon a mapan!” Manipud 1979, nasurok a  30 a tawen a nagserbi ni Maureen a misionera idiay West Africa. Ita, bayat nga ay-aywananna ni nanangna idiay Canada, agserserbi pay laeng ni Maureen kas special pioneer. Kunana maipapan iti panagserbina iti sabali a pagilian: “Kanayon nga impaay ni Jehova ti kasapulak iti eksakto a tiempo.”

Agtawen itan iti 65 ni Wendy. Nagpayunir idiay Australia idi tin-edyer pay. Malagipna: “Managbabainak idi ken marigatanak a makisarita iti diak am-ammo. Ngem gapu iti panagpayunirko, nasursurok ti makisarita iti amin a kita ti tao, isu nga in-inut a timmuredak. Idi agangay, nadlawko a diakon maamak a makisarita. Nakatulong kaniak ti panagpayunir nga agpannuray ken Jehova, ket nariknak a kabaelakon ti agserbi iti sabali a pagilian. Inawisnak met a mangasaba iti tallo a bulan idiay Japan ti maysa a single a nagmisionera sadiay iti nasurok a 30 a tawen. Iti panagkadkaduami, rimmubrob ti tarigagayko nga umakar iti sabali a pagilian.” Idi 1986, napan ni Wendy idiay Vanuatu, maysa nga isla nga agarup 1,770 a kilometro iti daya ti Australia.

Adda pay laeng ni Wendy idiay Vanuatu ket agserserbi iti remote translation office. “Maragragsakanak a makakitkita kadagiti mabukbukel a grupo ken kongregasion kadagiti naiputputong a lugar,” kunana. “Uray bassit laeng ti maar-aramidak a makipagtrabaho ken Jehova kadagitoy nga isla, nagdakkel a pribilehio dayta kaniak.”

Agtawenen iti 65 ni Kumiko. Payunir idi idiay Japan idi imbaga ti partnerna, a maysa met a payunir, nga umakarda idiay Nepal. “Sangkaibagana dayta kaniak, ngem sangkaibagak met a saan,” kuna ni Kumiko. “Pampanunotek ngamin a masapul nga agsursuroak iti baro a lengguahe ken makibagayak iti baro nga aglawlaw. Maysa pay, awan idi ti urnongko nga usarek nga umakar iti sabali a pagilian. Diak ammo no ania idi ti aramidek, agingga a maysa nga aldaw, naaksidenteak iti motor isu a nayospitalak. Pinampanunotko sadiay: ‘Diak ammo no ania ti sumaruno a mapasamak kaniak. Mabalin nga agsakitak iti nakaro ket saanakton a makapagpayunir iti sabali a pagilian. Diak la ngatan makapagserbi iti sabali a pagilian uray makatawen laeng?’ Impasnekko ti nagkararag ken Jehova tapno maaramidko dayta.” Kalpasan a nakaruar iti ospital, bimmisita ni Kumiko idiay Nepal, ket idi agangay, immakarda sadiay, a kaduana ti partnerna a payunir.

Kuna ni Kumiko maipapan iti dandani 10 a tawen a panagserbina idiay Nepal: “Namimpinsan a nayanud dagiti pagdandanagak idi, kas iti napasamak iti Nalabaga a Baybay. Maragragsakanak ta nagserbiak iti lugar nga addaan iti dakdakkel a panagkasapulan.  Masansan a no mangasabaak iti balay ti maysa a pamilia, lima wenno innem a kaarrubada ti umay dumngeg. Nadayawda a dumawat kadagiti tract a maipapan iti Biblia, uray dagiti babassit nga ubbing. Nakaragragsak a talaga ti agserbi iti daytoy a teritoria ta adu ti interesado.”

Siempre, naipasango met iti pakarigatan dagiti awanan asawa a kakabsat nga ininterbiumi. Kasano a sinangoda dagita?

“Idi damo, marigatanak ta adayoak iti pamiliak,” kuna ni Diane a taga-Canada. Agtawen itan iti 62, ken 20 a tawen a nagserbi kas misionera idiay Ivory Coast (Côte d’Ivoire itan). “Inkararagko ken Jehova a tulongannak a mangayat kadagiti tattao iti teritoriak. Inlawlawag ni Brother Jack Redford, maysa nga instruktormi iti Gilead, a mabalin a marigatankami iti damo, maikawakami pay ketdi iti kasasaad ti teritoriami nangruna no maipasangokami iti nakaro a kinarigat ti panagbiag. Ngem kinunana: ‘Diyo kitaen ti kasasaad ti biagda. Kitaenyo dagiti tattao, ti rupa ken dagiti matada. Paliiwenyo ti reaksionda no mangngegda ti kinapudno iti Biblia.’ Kasta ti inaramidko, ket makaparagsak ti resultana! No ibagbagak dagiti makaliwliwa a mensahe ti Pagarian, makitak a rumaniag ti rupa dagiti tattao!” Ania pay ti nakatulong ken Diane a makibagay iti panagserbina iti sabali a pagilian? “Ginayyemko dagiti iyad-adalak, ket nakaragragsakak a makakita iti panagbalinda a matalek nga adipen ni Jehova. Imbilangko a pagtaengak ti teritoriak. Naaddaanak kadagiti naespirituan a nanang, tatang, manong, manang, ken ading, a kas iti inkari ni Jesus.”—Mar. 10:29, 30.

Agtawenen ni Anne iti 46, ket agserserbi iti maysa a lugar iti Asia a maiparit ti trabahotayo. Kunana: “Bayat ti panagserbik iti nagduduma a lugar iti sabali a pagilian, nakipagyanak kadagiti kakabsat a babbai a naiduma kaniak ti ugali ken dimmakkelanda. Isu a no dadduma, saankami nga agkikinnaawatan ken masaktanmi ti maysa ken maysa. No mapasamak dayta, ikagkagumaak ti makisinninged kadagiti kabbalayko tapno ad-adda a maawatak ti kaugalianda. Inkarigatak met ti agbalin a naay-ayat ken mannakaawat kadakuada. Maragragsakanak ta nagbunga dagidiay a panagsakripisio ken naaddaanak kadagiti pudpudno a gagayyem a timmulong kaniak nga agtultuloy iti teritoriak.”

Idi 1993, naidestino kas misionera idiay Madagascar ni Ute a taga-Germany, nga agtawen itan iti 53. Kunana: “Idi damo, narigatanak nga agsursuro iti  pagsasao ditoy, naikawaak iti kinadagaang ti klima, ken narigatanak gapu iti malaria, amoeba, ken ariet. Ngem adu ti timmulong kaniak. Inanusandak a tinulongan dagiti kakabsat a babbai, dagiti annakda, ken dagiti iyad-adalak iti Biblia tapno masursurok ti lengguaheda. Siaayat nga aywanannak ti partnerko a misionera no agsakitak. Ngem siempre, ni Jehova ti kangrunaan a timmulong kaniak. Kanayon nga ikarkararagko kenkuana dagiti pakadanagak. Inan-anusak nga inuray ti sungbat dagiti kararagko uray no dadduma, al-aldaw, wenno bulbulan pay ketdi sakbay a masungbatan dagita. Sinolbar ni Jehova ti amin a problemak.” Agserserbi ni Ute iti 23 a tawenen idiay Madagascar.

Kas iti dadduma nga agserserbi iti lugar nga addaan iti dakdakkel a panagkasapulan, masansan nga iyebkas dagiti single a kakabsat ti adu a bendision a naawatda gapu iti panagserbida iti sabali a pagilian. Ania dagita?

Agtawenen iti 73 ni Heidi a taga-Germany. Agserserbi kas misionera idiay Ivory Coast (Côte d’Ivoire itan) manipud pay idi 1968. Kunana: “Diak mailadawan ti ragsakko no makitak nga ‘agtultuloy a magna iti kinapudno’ dagiti naespirituan nga annakko. Dadduma kadagiti inyadalak idi ti payunir itan ken papanglakayenen. Adu kadakuada ti mangaw-awag kaniak iti Mamang wenno Lola. Ti pamilia ti maysa kadagitoy a panglakayen ket imbilangdak pay ketdin kas kapamiliada. Inikkannak ni Jehova iti anak, manugang, ken tallo nga appoko.”—3 Juan 4.

Nasurok a 20 a tawen a nagserbi idiay West Africa ni Karen a taga-Canada, ken agtawen itan iti 72. Kunana: “Idi nagmisioneraak, nasursurok ti ad-adda nga agsakripisio, mangipakita iti ayat, ken aganus. Limmawa met ti panagpampanunotko gapu ta nagduduma ti puli dagiti nakaduak. Nakitak nga agduduma gayam ti pamay-an ti panangaramid iti bambanag. Talaga a bendision dayta kaniak gapu ta addaanak kadagiti gagayyem manipud iti nagduduma a paset ti lubong! Nupay nagbaliw ti panagbiag ken destinomi, aggagayyemkami latta.”

Ni Margaret a taga-England, nga agtawen itan iti 79, ket nagserbi idi kas misionera idiay Laos. Kunana: “Gapu iti panagserbik iti sabali a pagilian, nakitak no kasano nga iyapon ni Jehova iti organisasionna dagiti agduduma ti puli ken dimmakkelanda. Dakkel ti naitulong dayta a kapadasan tapno bumileg ti pammatik, isu a naan-anay nga agtalekak ken Jehova nga iturturongna ti organisasionna ken agtalekak a matungpalto dagiti panggepna.”

Talaga a nagsayaat ti impakita dagiti single a kakabsat a babbai iti panagserbi iti Dios. Maikarida iti komendasiontayo. (Uk. 11:40) Mainayon pay, umad-adu ti bilangda. (Sal. 68:11) Mabalinmo kadi a baliwan ti situasionmo ket tuladem ti inaramid dagiti nareregta a kakabsat a babbai a nainterbiu iti daytoy nga artikulo? No wen, sigurado a mapaneknekam ken ‘makitam a ni Jehova naimbag.’—Sal. 34:8.