1, 2. Kasano a sipaparabur nga usaren ni Jehova dagiti material a kinabaknangna?

NAPARABUR a Dios ni Jehova. Naggapu kenkuana ti amin nga adda kadatayo. Kukuana ti amin a balitok, pirak, ken natural a kinabaknang ti daga, ket usarenna dagita a mangsustiner iti biag. (Sal. 104:13-15; Hag. 2:8) Naglaon ti Biblia iti adu a salaysay no kasano a simimilagro nga inusarna dagita a nangipaay iti kasapulan ti ilina.

² Iti uneg ti 40 a tawen, impaayan ni Jehova ti nasion ti Israel iti manna ken danum idi addada iti let-ang. (Ex. 16:35) Kas resultana, “saanda a nagkurang iti aniaman.” (Neh. 9:20, 21) Inusar ni Jehova ni propeta Eliseo a simimilagro a mangpaadu iti bassit a lana ti matalek a balo. Gapu iti dayta a sagut ti Dios, nabayadanna dagiti utangna ken naaddaanda iti anakna iti umdas a kuarta a pagbiagda. (2 Ar. 4:1-7) Iti tulong ni Jehova, simimilagro a nangipaay ni Jesus iti taraon ken uray kuarta no kasapulan.—Mat. 15:35-38; 17:27.

3. Ania ti usigentayo iti daytoy nga artikulo?

 ³ Mabalin nga usaren ni Jehova ti aniaman tapno masustiner dagiti parsuana ditoy daga. Nupay kasta, aw-awisenna latta dagiti adipenna nga usarenda ti material a sanikuada a mangsuporta iti trabaho ti organisasionna. (Ex. 36:3-7; basaen ti Proverbio 3:9.) Apay a namnamaen ni Jehova nga usarentayo para kenkuana dagiti napateg a bambanag nga intedna kadatayo? Kasano a dagiti nagkauna a matalek nga adipen ti Dios sinuportaranda iti pinansial dagiti trabaho ni Jehova? Kasano nga us-usaren ti organisasion dagiti kuarta a maidondonar ita? Masungbatan dagita iti daytoy nga artikulo.

4. Ania ti ipakpakitatayo ken Jehova no supsuportarantayo ti trabahona?

⁴ Mangtedtayo ken Jehova gapu iti ayat ken panagyamantayo kenkuana. Matukay ti pusotayo no panunotentayo ti amin nga inaramid ni Jehova para kadatayo. Idi imbaga ni Ari David dagiti kasapulan iti pannakaibangon ti templo, binigbigna a naggapu ken Jehova ti amin nga adda kadatayo ken aniaman nga ipaaytayo kenkuana ket naggapu met laeng kenkuana.—Basaen ti 1 Cronicas 29:11-14.

5. Kasano nga ipakita ti Kasuratan a nagpateg a paset ti panagdaydayaw ti sipaparabur a panangted?

⁵ Maidaydayawtayo met ni Jehova no mangtedtayo. Babaen iti sirmata, nangngeg ni apostol Juan dagiti adipen ni Jehova idiay langit, a kunkunada: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.” (Apoc. 4:11) Saanka kadi nga umanamong a maikari ni Jehova iti amin a dayag ken dayaw a maipaaytayo kenkuana babaen ti panangtedtayo iti kasayaatan? Babaen ken Moises, imbilin ni Jehova iti nasion ti Israel a masapul a dumatagda ken Jehova iti tallo a tinawen a piesta. Kas paset ti panagdaydayawda bayat dagita a piesta, masapul a saanda nga “agparang nga ima-ima iti sango ni Jehova.” (Deut. 16:16) Nagpateg met a paset ti panagdaydayawtayo ita ti sipaparabur a panangted kas panagyaman ken panangsuportar iti trabaho ti naindagaan a paset ti organisasion ni Jehova.

6. Apay a pagimbagantayo no mangtedtayo? (Kitaen ti ladawan iti rugi ti artikulo.)

⁶ Pagimbagantayo no mangtedtayo. Pagsayaatantayo no naparaburtayo a manangted ken saantay la nga umaw-awat. (Basaen ti Proverbio 29:21.) Panunotentayo ti maysa nga ubing a mangted iti regalo kadagiti nagannakna a ginatangna babaen ti kuarta nga it-itedda kenkuana. Sigurado nga apresiaren dagiti nagannak dayta! Wenno panunotenyo ti maysa a payunir a makipagnanaed kadagiti nagannakna. Nalabit mangted kadakuada iti kuarta para kadagiti paggastuan iti balay. Nupay mabalin a saanda nga inobligar ti anakda, mabalin nga awatenda dayta gapu ta pamay-an dayta tapno maipakita ti anak ti apresasionna iti amin nga ar-aramidenda para kenkuana. Kasta met, ammo ni Jehova a pagsayaatantayo no mangtedtayo manipud kadagiti napateg nga adda kadatayo.

7, 8. Kasano a nangipakita ti ili ni Jehova idi tiempo ti Biblia iti pagwadan iti panangted iti kontribusion para iti (a) espesipiko a proyekto? (b) pangsuportar iti kangrunaan a trabaho?

⁷ Adda dagiti mabasatayo iti Kasuratan a nangted dagiti adipen ti Dios manipud kadagiti adda kadakuada. Iti dadduma a gundaway, nagkontribusionda para kadagiti espesipiko a proyekto. Kas pagarigan, nagkiddaw ni Moises iti donasion para iti pannakaibangon ti tabernakulo, a kas iti inaramid ni Ari David para iti pannakaibangon ti templo. (Ex. 35:5; 1 Cron. 29:5-9) Bayat ti panagturay ni Ari Jehoas, inusar dagiti padi ti nakolekta  a kuarta tapno matarimaan ti balay ni Jehova. (2 Ar. 12:4, 5) Idi naammuan dagiti kakabsat iti nagkauna a kongregasion Kristiano nga agkasapulan ti dadduma a kakabsat gapu iti bisin, ‘inkeddeng ti tunggal maysa sigun iti kabaelanna, a mangipatulodda iti tulong kadagiti kakabsat idiay Judea.’—Ara. 11:27-30.

⁸ Iti dadduma a kasasaad, timmulong iti pinansial ti ili ti Dios kadagiti mangidadaulo iti trabaho. Sigun iti Mosaiko a Linteg, awan ti tawid a maited kadagiti Levita, saan a kas iti dadduma a tribu. Ngem ik-ikkan ida dagiti Israelita iti apagkapullo tapno maipamaysada ti trabahoda iti tabernakulo. (Num. 18:21) Umasping iti dayta, nabenepisiaran met ni Jesus ken dagiti apostolna iti kinaparabur dagiti babbai a “nagserserbi kadakuada manipud kadagiti sanikuada.”—Luc. 8:1-3.

9. Ania ti dadduma a nagtaudan dagiti kontribusion idi un-unana?

⁹ Siempre, agduduma ti naggapuan dagita a donasion. Idi nangted dagiti Israelita iti kontribusionda para iti tabernakulo iti let-ang, mabalin a karaman dagiti bambanag nga inggapuda iti Egipto. (Ex. 3:21, 22; 35:22-24) Idi umuna a siglo, dadduma a Kristiano ti nangilako kadagiti sanikuada, kas iti talon wenno balay, sa intedda ti naglakuanda kadagiti apostol. Inwaras met dagita dagiti apostol kadagiti agkasapulan. (Ara. 4:34, 35) Dadduma ti nangilasin iti kuarta ken regular a nangtedda iti donasion para iti trabaho. (1 Cor. 16:2) Ngarud, nabaknang man wenno napanglaw dagiti Kristiano idi, nakiramanda iti panangted.—Luc. 21:1-4.

10, 11. (a) Kasano a matuladtayo dagiti naparabur nga adipen ni Jehova idi panawen ti Biblia? (b) Ania ti mariknam iti pribilehiom a mangsuporta iti trabaho ti Pagarian?

¹⁰ Ita, mabalin met a makiddaw a mangtedtayo iti donasion para iti espesipiko a panggep. Kas pagarigan, maibangonan kadi ti kongregasionyo iti baro a Kingdom Hall? Wenno ma-renovate kadi ti Kingdom Hall-yo? Mabalin a naammuantayo a kasapulan a masuportaran iti pinansial ti pannaka-renovate ti sanga nga opisina, ti kombensiontayo, wenno dagiti kakabsat a naapektaran iti kalamidad. Mangtedtayo met iti donasion para kadagiti agtrabtrabaho iti sangalubongan a hedkuarter ken kadagiti sanga nga opisina iti intero a lubong. Babaen kadagiti donasiontayo, masupsuportaran met dagiti misionero, special pioneer, ken dagiti agserserbi iti sirkito. Sigurado nga adda resolusion ti kongregasionyo a tumulong iti pinansial iti panagibangon kadagiti Assembly Hall ken Kingdom Hall para kadagiti kakabsattayo iti intero a daga.

¹¹ Mabalintayo amin ti tumulong iti trabaho nga ar-aramiden ni Jehova kadagitoy maudi nga al-aldaw. Ditay ammo no asino ti naggapuan ti kaaduan kadagiti donasion. Saantayo nga ipakpakaammo no agdonasiontayo kadagiti kahon ti kontribusion iti Kingdom Hall, wenno no agdonasiontayo babaen ti website a jw.org. Mabalin a mariknatayo a bassit ti pateg ti nanumo a donasiontayo. Ngem kaaduan kadagiti donasion ita ket naggapu kadagiti babassit a donasion imbes nga iti sumagmamano a dadakkel a donasion. Dagiti kakabsattayo, uray dagiti napanglaw, ket kas kadagiti taga-Macedonia a ‘nakaro ti kinakurapayda’ ngem impakaasida a maikkanda iti pribilehio a mangted ket inaramidda dayta a sipaparabur.—2 Cor. 8:1-4.

12. Kasano nga ikagkagumaan ti organisasion nga usaren dagiti donasion iti kasayaatan a pamay-an?

¹² Ikagkagumaan ti Bagi a Manarawidwid ti agbalin a matalek ken masirib iti panangusar iti pondo ti organisasion. (Mat. 24:45) Agkarkararag dagiti miembrona tapno makaaramidda kadagiti umiso a desision.  Maibadyet dagiti maaw-awat a pondo ken mausar sigun iti kasapulan. (Luc. 14:28) Idi panawen ti Biblia, adda dagiti urnos a sursuroten dagiti mangay-aywan kadagiti naidedikar a pondo tapno masigurado a mausar laeng dagita iti nakairantaanda. Kas pagarigan, idi nagsubli ni Esdras idiay Jerusalem, intugotna dagiti bambanag nga indonar ti ari ti Persia—balitok, pirak, ken napapateg a material nga aggatad ita iti nasurok a 100 a milion a doliar (U.S.). Imbilang ni Esdras dagita kas boluntario a daton para ken Jehova ken nangted kadagiti detalyado nga instruksion tapno maaywanan a naimbag dagita a gameng bayat ti panagdaliasatda iti napeggad a lugar. (Esd. 8:24-34) Nagkolekta ni apostol Pablo iti pondo a pangsaranay kadagiti kakabsat iti Judea. Nangaramid kadagiti urnos tapno masigurado a dagidiay mangipan kadagiti donasion agbalinda a napudno iti amin a banag, “saan laeng nga iti imatang ni Jehova, no di ket kasta met iti imatang dagiti tattao.” (Basaen ti 2 Corinto 8:18-21.) Kas panangtulad kada Esdras ken Pablo, sursuroten ti organisasiontayo dagiti espesipiko nga urnos iti panangaywan ken panangusar kadagiti donasion.

13. Apay nga adda dagiti nabiit pay a panagbalbaliw nga inaramid ti organisasiontayo?

¹³ Mabalin a mangaramid ti maysa a pamilia kadagiti panagbalbaliw tapno mabalanseda ti masapulan ken paggastuanda wenno mabalin a pasimplienda ti biagda ken kissayanda dagiti paggastuanda tapno ad-adu ti maaramidanda para ken Jehova. Kasta met ti organisasion ni Jehova. Iti naglabas a tawtawen, adu dagiti makapagagar a baro a proyekto. Isu a no dadduma, dakdakkel ti magastos ngem iti maaw-awat a donasion. Gapuna, mangar-aramid ti organisasion kadagiti pamay-an a maksayan ti paggastuan ken mapasimple ti trabaho tapno ad-adu ti pakausaran ti naimpusuan a donasionyo.

14-16. (a) Ania ti dadduma a nagapuanan dagiti donasionyo? (b) Kasano a nabenepisiaranka kadagitoy a probision?

¹⁴ Adu a nabayagen nga adipen ni Jehova ti mangibagbaga nga ita pay laeng a makitada ti kastoy kaadu a naespirituan a probision. Panunotenyo laengen, iti naglabas a tawtawen, nakitatayo ti panangrugi ti jw.org ken ti JW Broadcasting. Naipablaak ti Baro a Lubong a Patarus ti Nasantuan a Kasuratan iti ad-adu pay a lengguahe. Idi 2014/2015, ti dadduma kadagiti kadakkelan nga istadium iti 14 a siudad iti nagduduma a paset ti lubong ket nausar para iti tallo nga aldaw nga internasional a kombension nga “Itultuloyyo a Sapulen nga Umuna ti Pagarian ti Dios!” Nakaragragsak dagiti immatender.

 ¹⁵ Adu ti nangyebkas iti apresasionda kadagiti bendision a maaw-awatda manipud iti organisasion ni Jehova. Kas pagarigan, insurat ti agassawa nga agserserbi iti maysa a pagilian iti Asia maipapan iti JW Broadcasting: “Agserserbikami iti bassit a siudad. Isu a no dadduma, mariknami a kasla naiputputongkami, ket nalakami a malipatan no kasano kasaknap ti trabaho ni Jehova. Ngem idi nabuyami ti nagduduma a programa iti JW Broadcasting, naipalagip kadakami a pasetnakami ti sangalubongan a panagkakabsat. Magagaran unay iti JW Broadcasting dagiti kakabsat ditoy. Kalpasan a mabuyada dagiti binulan a programa, masansan nga ibagada nga ad-adda a simmingedda kadagiti miembro ti Bagi a Manarawidwid. Ad-adda a maipagpannakkelda itan a paset ida ti organisasion ti Dios.”

¹⁶ Iti intero a lubong, dandani 2,500 a Kingdom Hall ti agdama a maibangbangon wenno maren-renovate. Insurat dagiti kakabsat idiay Honduras idi inrugidan nga usaren ti baro a Kingdom Hall-da: “Talaga a maragragsakankami ta pasetnakami ti pamilia ni Jehova ken tagtagiragsakenmi ti naisangsangayan a sangalubongan a panagkakabsat, nga agpada a nakatulong tapno matungpal ti arapaapmi a maaddaan iti Kingdom Hall ti lugarmi.” Adu met ti nangyebkas iti kasta nga apresasion idi nakaawatda iti Biblia ken dadduma pay a publikasion a naipatarus iti lengguaheda, idi nakaawatda iti pangsaranay a tulong, wenno idi nakitada dagiti resulta ti metropolitan ken public witnessing iti lugarda.

17. Kasano a makita iti panagandar ita ti organisasion ti tulong ni Jehova?

¹⁷ Saan a maawatan ti dadduma no kasano a maaramidtayo amin dagitoy babaen laeng kadagiti boluntario a donasion. Idi nagpasiar iti maysa a pagimprentaantayo ti lalaki a nangato ti saadna iti maysa a dakkel a kompania, nasdaaw ta boluntario amin dagiti agtrabtrabaho, boluntario a donasion ti paggapuan dagiti pondo, ken awan dagiti maorganisar nga aktibidad a pagtaudan ti pondo. Imbagana nga imposible a maaramidtayo dagiti ar-aramidentayo. Umanamongtayo iti dayta! Ammotayo a posible laeng dayta gapu iti tulong ni Jehova.—Job 42:2.

18. (a) Ania dagiti bendision a maawattayo no mangtedtayo kas panangsuporta iti Pagarian? (b) Kasano a masuruantayo dagiti annak ken kabbaro nga adalan a makiraman iti panangted?

¹⁸ Padpadayawannatayo ni Jehova babaen ti panangipalubosna a tumulongtayo iti nagdakkel a trabaho ita. Ipasiguradona a bendisionannatayo no mangtedtayo kas panangsuporta iti Pagarian. (Mal. 3:10) Inkari ni Jehova a rumang-ay ti sipaparabur a mangted. (Basaen ti Proverbio 11:24, 25.) Naragsaktayo met no mangtedtayo ta “ad-adu ti kinaragsak iti panangted ngem iti panangawat.” (Ara. 20:35) Iti sao ken aramid, pribilehiotayo a suruan dagiti annaktayo ken dagiti kabbaro nga adalan a mangkita no kasano a makiramanda iti dayta a trabaho iti kasta umawatda iti adu a bendision.

19. Kasano a naparegtaka iti daytoy nga artikulo?

¹⁹ Naggapu ken Jehova ti amin nga adda kadatayo. No itedtayo kenkuana dagiti bambanag nga impaayna, ipakpakitatayo ti panagayattayo kenkuana ken ap-apresiarentayo ti amin nga inaramidna para kadatayo. (1 Cron. 29:17) Idi nagdonar dagiti Israelita para iti pannakaibangon ti templo, ‘nagragrag-oda gapu kadagiti boluntario a panagidaton, ta buyogen idi iti naan-anay a puso a nangipaayda kadagiti boluntario a daton ken Jehova.’ (1 Cron. 29:9) Agtultuloy met koma a maragsakantayo a mangted ken Jehova manipud kadagiti impaayna kadatayo.