“IDI nangngegko dagiti kapadasan dagiti gagayyemko a nagserbi iti lugar nga agkasapulan iti adu a payunir, kayatko met a marikna ti kasta a ragsak,” kuna ni Sylviana a payunir nga agtawen iti nasurok a 20. “Ngem,” innayonna, “madanaganak amangan no diak kabaelan ti agboluntario iti lugar a dakdakkel ti panagkasapulanna.”

Kas kadi ken Sylviana ti riknam? Kayatmo met kadi ti agserbi iti teritoria nga agkasapulan iti ad-adu a manangaskasaba iti Pagarian ngem agduaduaka no kabaelam? No wen, dika maawanan iti namnama! Iti tulong ni Jehova, napagballigian ti rinibu a kakabsat dagiti lapped a mangpalawa iti ministerioda. Tapno maammuantayo no kasano a tinulongan ni Jehova ti dadduma kadakuada, bisitaentayo ti Madagascar, ti maikapat a kadakkelan nga isla iti lubong.

Iti napalabas a sangapulo a tawen, nasurok a 70 a naregta nga agibumbunannag ken payunir manipud iti 11 a pagilian * ti immay nagserbi ditoy a nabunga a teritoria ti Africa, nga adu ti mangraraem iti Biblia. Nagadu met a lokal nga agibumbunannag ti situtulok nga immakar tapno tumulong a mangipakaammo iti mensahe ti Pagarian iti daytoy naglawa nga isla. Am-ammuentayo ti dadduma kadakuada.

Da Louis ken Perrine, agassawa nga agtawen iti nasurok a 30, ket immakar iti Madagascar manipud France. Adu a tawen a pinampanunotda a palawaen ti ministerioda iti sabali a pagilian, ngem agpangadua ni Perrine nga umakar. Inlawlawagna: “Mabutengak a mapan iti lugar a saan a pamiliar kaniak. Madanaganak a mangpanaw iti pamiliami, kongregasion, apartment, amin a nakairuamanmi a lugar, ken iti rutinami. Dagiti pakadanagak ti talaga a kadakkelan a lapped a masapul idi a sanguek.” Idi 2012, nakaurnong iti tured ni Perrine, isu nga immakarda ken Louis. Ania ti makunana iti desisionda? “No subliak ti napalabas,  makunak a makapabileg iti pammati a mapadasan ti panangtulong ni Jehova kadakami.” Innayon ni Louis, “Agasenyo, sangapulo kadagiti iyad-adalanmi iti Biblia ti immatender iti umuna a Memorial-mi iti Madagascar!”

Ania ti nangpabileg iti agassawa nga agtalinaed iti annongenda idi timmaud dagiti problema? Inkararagda ken Jehova nga ikkanna ida iti bileg a kasapulanda nga agibtur. (Fil. 4:13) Kinuna ni Louis: “Nakitami a sinungbatan ni Jehova dagiti kararagmi ken impaayannakami iti ‘talna ti Dios.’ Nakapagpokuskami iti ragsak a resulta ti panagserbimi. Naparegtakami met a di sumuksuko gapu kadagiti e-mail ken surat dagiti gagayyemmi iti naggapuanmi a lugar.”—Fil. 4:6, 7; 2 Cor. 4:7.

Adu a bendision ti impaay ni Jehova kada Louis ken Perrine gapu iti panagibturda. “Idi Oktubre 2014, immatenderkami iti Bible School for Christian Couples * idiay France,” kuna ni Louis. “Dayta a panageskuelami ket regalo ni Jehova a saanmi a pulos malipatan.” Maragsakan ti agassawa a naibaon manen iti Madagascar kalpasan ti panaggraduarda.

Ti taga-France a da Didier ken Nadine ket agtawen idin iti nasurok a 50 idi immakarda iti Madagascar idi 2010. Kinuna ni Didier: “Nagpayunirkami idi ub-ubingkami pay, sa naaddaankami iti tallo nga annak. Idi adultodan, pinanunotmi ti posibilidad nga agserbi iti sabali a pagilian.” Inamin ni Nadine: “Agpangaduaak no mapanunotko a mayadayokami kadagiti annakmi, ngem kinunada: ‘No agboluntariokayo iti pagilian a dakkel ti panagkasapulanna, ipagpannakkeldakayo!’ Naparegtakami nga umakar gapu iti imbagada. Uray no adayokamin kadagiti annakmi, maragragsakankami ta kanayon latta a makasaritami ida.”

Para kada Didier ken Nadine, narigat ti agsursuro iti Malagasy a lengguahe. “Saankamin a kas kadagiti 20 anyos,” nakaisem a kinuna ni Nadine. Kasanoda a nakasursuro? Umuna, immakarda iti French a kongregasion. Idi mariknadan a nakasaganadan para iti lokal a lengguahe, immakarda iti Malagasy a kongregasion. Kuna ni Nadine: “Adu a makaskasabaanmi ti mayat nga agadal iti Biblia. Masansan nga agyamanda iti ibibisitami. Idi damo, kasla di nakappapati dayta. Magustuak ti agpayunir ditoy. No makariingak iti bigat, ibagak iti bagik, ‘Nagmayat ta mapanak manen mangasaba ita!’”

Makaisem ni Didier no malagipna idi agsursuro pay iti Malagasy. “Mangikonkonduktaak idi iti maysa a gimong ngem diak maaw-awatan ti sungbat dagiti kakabsat. Ti la ammok nga ibaga, ‘Pagyamanan.’ Idi nagyamanak iti sungbat ti maysa a sister, sineniasandak dagiti adda iti likudanna a kamali ti sungbatna. Dagus nga inawagak ti maysa a brother a nangted iti umiso a sungbat—iti panagkunak, umiso.”

Iti maysa a kombension idi 2005, nabuya da Thierry ken ni baketna a Nadia ti naibatay-Biblia a drama a, “Ragpatenyo Dagiti Kalat a Pakaidayawan ti Dios,” a maipapan ken Timoteo. Natukay ti riknada iti dayta ken ad-adda a bimmileg ti tarigagayda nga agserbi iti lugar nga agkasapulan iti ad-adu a manangaskasaba iti Pagarian. Kuna ni Thierry: “Idi nalpasen ti drama, bayat nga agpalpalakpakkami, dinamagko ken baketko, ‘Papananta ngay?’ Imbagana nga agpada ti pampanunotenmi.” Di nagbayag, inkagumaanda a rinagpat dagiti kalatda. Kinuna ni Nadia, “In-inut a kinissayanmi dagiti sanikuami agingga nga umanay laengen dagita iti uppat a maleta!”

Simmangpetda iti Madagascar idi 2006 ket natagiragsakda ti ministerioda sipud idi. Kuna ni Nadia, “Permi ti ragsakmi kadagiti makaskasabaanmi.”

Ngem kalpasan ti innem a tawen, naipasangoda iti problema. Ti nanang ni Nadia a ni Marie-Madeleine nga aggigian idiay France ket naigalis ken nablo ti imana ken nadangran ti ulona. Kalpasan a kinonsultada ti doktor ni Marie-Madeleine, inawisda a makipagyan kadakuada iti Madagascar. Uray no agtawen idin iti 80, siraragsak nga inawatna ti awis. Ania ti makunana iti panagyanna iti sabali a pagilian? Kinunana: “No dadduma, narigat ti makibagay, ngem uray no limitado ti maaramidak, mariknak a dakkel ti usarko iti kongregasion. Ken ti talaga a pakaragsakak iti panagyanko ditoy ket makapagtultuloy dagiti annakko iti nabunga a ministerioda.”

Ni Riana ket brother nga agtawen iti nasurok a 20. Dimmakkel idiay Alaotra Mangoro, maysa a nadam-eg a lugar iti makindaya a paset ti Madagascar. Nalaing iti eskuelaan ken kayatna ti agkolehio. Ngem idi nagadal iti Biblia, nagbaliw ti panunotna. Imbagana: “Inkagumaak ti nasapsapa a makaleppas iti hayskul ket inkarik ken Apo Jehova, ‘No makapasaak iti maudi nga eksam, agpayunirakon.’” Idi nakagraduar, tinungpalna ti karina. Nakipagyan iti payunir a brother, naaddaan iti sideline, ken nagpayunir. Kunana, “Dayta ti kasayaatan a desisionko.”

Ngem saan a maawatan dagiti kabagian ni Riana no apay a saan a nagkolehio. Kunana: “Da tatangko, angkelko, ken ti ading ni lolak pinaregtadak nga agkolehio. Ngem diak kayat nga isukat ti kinapayunirko iti aniaman.” Di nagbayag, kayatna ti agserbi iti lugar a dakkel ti panagkasapulanna. Ania ti nakatignayanna? Kunana: “Sinerrekdakami dagiti agtatakaw ken adu a gamitko ti innalada. Gapu iti dayta, pinampanunotko ti sasao ni Jesus maipapan iti panagurnong iti ‘gameng idiay langit.’ Nagdesisionak nga ad-adda nga agurnong kadagiti naespirituan a kinabaknang.” (Mat. 6:19, 20) Immakar iti kaabagatanan a paset ti pagilian—maysa a natikag a rehion a 1,300 a kilometro ti kaadayona iti lugarda. Dita ti pagnanaedan dagiti katutubo nga Antandroy. Apay a napan ni Riana sadiay?

Makabulan sakbay a natakawan ni Riana, narugianna nga iyadalan iti Biblia ti dua nga Antandroy a lallaki. Adda dagiti nasursurona a termino iti lengguaheda ket pinampanunotna ti adu nga Antandroy a di pay nakangngeg iti mensahe ti Pagarian. Kunana, “Inkarkararagko ken Apo Jehova a tulongannak nga umakar iti rehion a Tandroy ti pagsasaona.”

Immakar ni Riana, ngem dagus a naipasango iti problema. Awan ti masapulanna a trabaho. Imbaga kenkuana ti maysa a lalaki: “Apay nga immayka ditoy? Dagiti tattao ditoy ket mapan iti lugar a naggapuam tapno agtrabaho!” Kalpasan ti dua a lawas, dandani awan kuarta ni Riana a napan nakikombension iti sabali a lugar ken pampanunotenna ti aramidenna. Iti maudi nga aldaw ti kombension, adda impabulsa kenkuana ti maysa a brother. Dakkel a kantidad dayta nga umdas a pagpletena nga agsubli iti lugar dagiti Antandroy ken pangirugina iti bassit a negosio a panaglako iti yogurt. Kuna ni Riana: “Nariknak ti tulong ni Apo Jehova iti eksakto a tiempo. Maitultuloyko a tulongan dagiti saan pay a makaam-ammo ken Jehova!” Nagadu pay ti trabaho iti kongregasion. Intuloyna: “Nadutokanak nga agpalawag iti tunggal dua a lawas. Sansanayennak ni Jehova babaen iti organisasionna.” Agingga ita, ikaskasaba ni Riana ti mensahe ti Pagarian iti adu nga Antandroy a mayat a mangam-ammo ken Jehova.

Inkari ni Jehova a bendisionanna dagidiay mangikagkagumaan nga agserbi kenkuana. (Isa. 65:16) No ikarigatantayo a pagballigian dagiti lapped iti panangpalawatayo iti ministeriotayo, mariknatayo ti bendision ni Jehova. Kitaentayo ti kapadasan ni Sylviana a nadakamat iti rugi. No malagipyo, madanagan baka dina kabaelan ti agboluntario iti lugar a dakkel ti panagkasapulanna. Apay? Inlawlawagna, “Ab-ababa iti siam a sentimetro ti kannigid a sakak ngem iti kannawan isu nga agsagkisagkingak ken nalakaak a mabannog.”

Idi 2014, nakikadua ni Sylviana ken Sylvie Ann, maysa nga agtutubo a payunir a kakongregasionna, ket immakarda iti bassit a purok a 85 a kilometro manipud iti ilida. Uray no adda dagiti lapped, natungpal ti arapaap ni Sylviana—ken nagsayaat ti bendision a naawatna! “Makatawenko pay laeng iti lugar a nagboluntarioak,” kunana, “nagpabautisaren iti asamblea sirkito ti agkabannuag nga ina nga iyad-adalak iti Biblia a ni Doratine.”

Kas ipakita dagiti ebkas ti pammati dagiti nagboluntario iti lugar a dakkel ti panagkasapulanna, no ikagumaantayo a pagballigian dagiti lapped iti panangpalawa iti ministeriotayo, mapadasantayo a pudno daytoy a kari ni Jehova kadagiti adipenna: “Patibkerenkanto. Pudno a tulongankanto.” (Isa. 41:10) Kas resultana, ad-adda a tumibker ti relasiontayo ken Jehova. Kanayonanna, ti situtulok a panagsakripisiotayo—iti man lugartayo wenno iti sabali a pagilian—isagananatayo kadagiti nateokratikuan nga aktibidad iti baro a lubong. Kas iti kuna ni Didier a nadakamat itay, “Ti panagserbi iti lugar a dakdakkel ti panagkasapulanna ket nasayaat a panagsanay para iti masanguanan!” Sapay koma ta adu pay a situtulok a manangaskasaba ti mangrugin nga agsanay!