IDI agsapa ti Mierkoles, Enero 24, 2018, naragsakan ti pamilia ti Bethel iti United States ken Canada a makangngeg iti espesial a pakaammo: Ni Brother Kenneth Cook, Jr. ket nainayon kas miembro ti Bagi a Manarawidwid dagiti Saksi ni Jehova.

Nayanak ken dimmakkel ni Brother Cook iti south-central Pennsylvania, U.S.A. Naammuanna ti kinapudno iti maysa a kaklasena sakbay a naggraduar iti high school ket nabautisaran idi Hunio 7, 1980. Nangrugi iti amin-tiempo a panagserbi kas regular pioneer idi Septiembre 1, 1982. Kalpasan ti dua a tawen a panagpayunirna, naawis nga agserbi iti Bethel idi Oktubre 12, 1984 idiay Wallkill, New York.

Iti simmaruno a 25 a tawen, nadumaduma ti annongen ni Brother Cook iti Printery ken iti Bethel Office. Nagkasarda ken Jamie idi 1996, ket nagkaduada nga agserbi iti Bethel idiay Wallkill. Idi Disiembre 2009, nayakar da Brother ken Sister Cook iti Watchtower Educational Center idiay Patterson, New York, ket nagtrabaho ni Brother Cook iti Writing Correspondence Department. Idi Abril 2016, kalpasan ti ababa a panagsubli da Brother ken Sister Cook iti pasilidad ti Wallkill, nayakarda idiay Brooklyn, New York. Kalpasan ti lima a bulan, nayakarda iti sangalubongan a hedkuarter idiay Warwick, New York. Idi Enero 2017, naapointaran ni Brother Cook nga agserbi kas katulongan ti Writing Committee ti Bagi a Manarawidwid.