1-2. (a) Ania ti epektona ken Yoshiko ti mensahe ti Isaias 41:10? (b) Siasino dagiti magunggonaan iti dayta a mensahe?

ADDA di nasayaat a damag a naawat ti matalek a sister a ni Yoshiko. Imbaga ti doktorna a sumagmamano laengen a bulan ti biagna. Ania ti reaksionna? Nalagip ni Yoshiko ti paboritona a teksto ti Biblia, ti Isaias 41:10. (Basaen.) Kalmado nga imbagana iti doktorna a di mabuteng, ta ig-iggaman ni Jehova ti imana. * Ti makaliwliwa a mensahe dayta a teksto ti nakatulong iti dungdungnguentayo a sister a naan-anay nga agtalek ken Jehova. Makatulong met dayta a teksto tapno makapagtalinaedtayo a kalmado kadagiti nakaro a problema. Tapno maawatantayo no kasano, umuna nga usigentayo no apay nga inted ti Dios dayta a mensahe ken Isaias.

² Impaisurat ni Jehova dagita a sasao ken Isaias tapno maliwliwa dagiti Judio a maipanto idiay Babilonia kas balud. Ngem impairekordna dayta saan laeng a para kadakuada no di ket para iti amin nga adipenna agingga ita. (Isa. 40:8; Roma 15:4) Agbibiagtayo iti “delikado ken narigat a tiempo,” isu a mas kasapulantayo ita ti pammabileg a mabasa iti libro nga Isaias.​—2 Tim. 3:1.

3. (a) Ania dagiti kari a mabasa iti Isaias 41:10, ti napili a teksto para iti tawen 2019? (b) Apay a kasapulantayo dagiti pammasiguro nga ipaay dagitoy a kari?

³ Iti daytoy nga artikulo, agpokustayo iti tallo a kari ni Jehova a makapabileg iti pammati, a nairekord iti Isaias 41:10: (1) addanto kadatayo ni Jehova, (2) isu ti Diostayo,  ken (3) tulongannatayto. Kasapulantayo dagitoy a pammasiguro * gapu ta kas ken Yoshiko, maipasangotayo met kadagiti problema. Marigatantayo met gapu kadagiti dakes a pasamak iti lubong. Ib-ibturan pay ketdi ti dadduma kadatayo ti panangidadanes ti gobierno. Saggaysaentayo a pagsasaritaan dagitoy a tallo a pammasiguro.

4. (a) Ania nga umuna a pammasiguro ti adalentayo? (Kitaen ti footnote.) (b) Kasano nga ipakpakita ni Jehova nga ipatpategnatayo? (c) Ania ti epekto dayta kenka?

⁴ Umuna, impasigurado ni Jehova: “Dika agbuteng, ta addaak kenka.” * Ipakpakita ni Jehova nga adda kadatayo babaen ti panangipaayna iti amin nga atensionna ken nabara nga ayatna. Kitaentayo no kasano nga ipakpakitana ti napalalo a panangipategna kadatayo. “Ta nagbalinka a napateg kaniak,” kuna ni Jehova. “Naibilangka a nadayaw, ket inayatka.” (Isa. 43:4) Awan puersa iti uniberso a makaikkat iti ayat ni Jehova kadagidiay agserserbi kenkuana; saan a pulos agbaliw ti kinamatalekna kadatayo. (Isa. 54:10) Ti ayat ken panangipategna ti mangpatured kadatayo. Protektarannatayo ita, no kasano a prinotektaranna idi ni Abram (Abraham) a gayyemna. Imbaga kenkuana ni Jehova: “Dika agbuteng, Abram. Siak ti kalasagmo.”​—Gen. 15:1.

5-6. (a) Kasanotayo nga ammo a kayatnatayo a tulongan ni Jehova kadagiti problematayo? (b) Ania ti masursurotayo iti ulidan ni Yoshiko?

⁵ Ammotayo nga interesado ni Jehova a tumulong kadatayo a mangsango kadagiti problema ta inkarina kadagiti adipenna: “Inton lumasatka kadagiti danum, addaakto kenka, ken kadagiti karayan, saankanto a malmes. Inton magnaka iti apuy, saankanto a masinit, ken saankanto a masiraman.” (Isa. 43:2) Ania ti kaipapanan dagitoy a sasao?

⁶ Saan nga ikarkari ni Jehova nga ikkatenna dagiti pakasuotan a mangparparigat iti biagtayo, ngem saanna nga ipalubos  a malmestayo kadagiti arig “karayan” a problema wenno madangrantayo kadagiti arig “apuy” a pakasuotan. Impasiguradona a kaduanatayo, a tulongannatayo tapno ‘malasatantayo’ dagita a pakarigatan. Ania ti aramiden ni Jehova? Tulongannatayo a manglaban iti butengtayo tapno makapagtalinaedtayo a matalek kenkuana, uray pakatayantayo. (Isa. 41:13) Napaneknekan dayta ni Yoshiko, a nadakamat itay. Kinuna ti balasangna: “Nasdaawkami ta kalmado ni Mama. Nakitami nga inikkan ni Jehova iti natalna a panunot. Agingga iti ipapatayna, ibagbagana kadagiti nars ken pasiente ti maipapan ken Jehova ken kadagiti karina.” Ania ti masursurotayo iti ulidan ni Yoshiko? No agtalektayo iti kari ti Dios nga “addaakto kenka,” tumured ken tumibkertayo met a mangsango kadagiti problema.

7-8. (a) Ania ti maikadua a pammasiguro nga usigentayo, ken ania ti kaipapananna? (b) Apay nga imbaga ni Jehova kadagiti naipanaw a Judio: “Dika madanagan”? (c) Ania a sasao iti Isaias 46:3, 4 ti nangpakalma iti puso dagiti adipen ti Dios?

⁷ Kitaentayo met ti maikadua a pammasiguro nga insurat ni Isaias: “Dika madanagan, ta siak ti Diosmo.” Ania ti kaipapanan daytoy? Iti orihinal a lengguahe, ti kaipapanan ti sao a “madanagan” iti daytoy a bersikulo ket “panangtaliaw iti likudan baka adda peggad” wenno “pannakataranta ti maysa no delikado ti situasion.”

⁸ Apay nga imbaga ni Jehova kadagiti maipanto idiay Babilonia a ‘dida madanagan’? Gapu ta ammona nga agbutengto dagiti agnanaed iti dayta a lugar. Apay nga agbutengda? Sakbay nga agpatingga ti 70 a tawen a pannakaipan dagiti Judio idiay Babilonia, rumautto ti nabileg nga armada ti Medo-Persia iti Babilonia. Usarento ni Jehova daytoy nga armada tapno mawayawayaan ti ilina. (Isa. 41:2-4) Idi naammuan dagiti Babilonio ken dagiti umili ti dadduma a nasion nga asidegen ti kabusorda, inkagumaanda ti agtalinaed a natured babaen ti panangparegtada iti maysa ken maysa: “Bumilegka.” Nagaramidda pay iti ad-adu nga idolo, ta mangnamnamada a protektaran ida dagitoy. (Isa. 41:5-7) Ngem pinagkalma ni Jehova ti puso dagiti naipanaw a Judio: “[Saan a kas kadagiti kaarrubam,] sika ti adipenko, O Israel . . . Dika madanagan, ta siak ti Diosmo.” (Isa. 41:8-10) Paliiwem ti imbaga ni Jehova: “Siak ti Diosmo.” Kadagita a sasao, impasigurado ni Jehova kadagiti matalek nga agdaydayaw kenkuana a saanna a linipat ida​—isu pay laeng ti Diosda, ken isuda pay laeng ti ilina. Imbagana: “Awiten . . . ken ispalenkay[to].” Sigurado a naparegta dagiti naipanaw a Judio iti daytoy a makaparegta a sasao.​—Basaen ti Isaias 46:3, 4.

9-10. Apay a saan a kasapulan nga agbutengtayo? Mangted iti ilustrasion.

⁹ Ad-adda a madanagan itan dagiti tattao iti aglawlawtayo ta kumarkaro ti kasasaad ti lubong. Siempre, apektadotayo met kadagita a problema. Ngem ditay koma agbuteng. Ibaga ni Jehova: “Siak ti Diosmo.” Apay a makatulong unay dayta tapno agtalinaedtayo a kalmado?

¹⁰ Usigentayo daytoy nga ilustrasion: Nakalugan iti eroplano ti dua a pasahero a da Jim ken Ben. Adda napigsa nga angin (turbulence) a nasabatda. Bayat nga agpababa ken agpangato ti eroplano, kuna ti agsasao iti loudspeaker: “Diyo ik-ikkaten ti seat belt-yo. Adda turbulence.” Nadanagan ni Jim. Ngem innayon ti piloto: “Dikay madanagan. Siak ti pilotoyo.”  Nagwingiwing ni Jim, sa imbagana: “Kasano koma a ditay madanagan?” Ngem nadlawna a di pulos madanagan ni Ben. Dinamag ni Jim: “Apay a kalmadoka latta?” Nagisem ni Ben ket imbagana: “Am-ammok unay ti piloto. Tatangko!” Sa imbaga pay ni Ben: “Adda ibagak maipapan kenkuana. Siguradok nga agkalmaka met no am-ammom isuna ken dagiti abilidadna.”

11. Ania dagiti masursurotayo iti ilustrasion maipapan iti dua a pasahero?

¹¹ Ania dagiti masursurotayo iti daytoy nga ilustrasion? Kas ken Ben, kalmadotayo ta am-ammotayo unay ti nailangitan nga Amatayo, ni Jehova. Ammotayo nga ilasatnatayo kadagiti kasla bagyo a problema a pakaipasanguantayo iti maudi nga al-aldaw daytoy a lubong. (Isa. 35:4) Agtalektayo ken Jehova, isu a kalmadotayo latta bayat a permi ti buteng dagiti tattao ditoy lubong. (Isa. 30:15) Matuladtayo met ni Ben no ibagatayo kadagiti kaarrubatayo dagiti rason nga agtalekda iti Dios. Makasiguradoda met nga uray ania ti pakaipasanguanda a problema, suportaran ida ni Jehova.

12. (a) Ania ti maikatlo a pammasiguro nga usigentayo? (b) Ania a kinapudno ti ipalagip kadatayo ti ‘takiag’ ni Jehova?

¹² Usigentayo ti maikatlo a pammasiguro nga insurat ni Isaias: “Patibkerenkanto, wen, tulongankanto.” Immun-una nga inladawan ni Isaias no kasano a patibkeren, wenno pabilgen, ni Jehova ti ilina idi kinunana: ‘Umay ni Jehova nga addaan pannakabalin, ket agturayto ti takiagna.’ (Isa. 40:10) Masansan nga usaren ti Biblia ti sao a “takiag” a mangisimbolo iti pannakabalin. Isu a ti sasao nga ‘agturayto ti takiag’ ni Jehova ipalagipna a ni Jehova ket mannakabalin nga Ari. Inusarna  ti di maabak a bilegna a mangsuporta ken mangidepensa idi kadagiti adipenna, ket itultuloyna a pabilgen ken protektaran dagidiay agtaltalek kenkuana ita.​—Deut. 1:30, 31; Isa. 43:10, ftn.

13. (a) Kaano a nangnangruna a tungpalen ni Jehova ti karina a pabilgennatayo? (b) Ania a pammasiguro ti mangpabileg ken mangpapigsa iti nakemtayo?

¹³ Tungpalen ni Jehova ti karina a, “Patibkerenkanto,” nangnangruna no idadanesdatayo dagiti kabusortayo. Iti dadduma a paset ti lubong ita, ikagkagumaan dagiti kabusortayo a pasardengen ti panangasabatayo wenno paritan ti organisasiontayo. Uray no kasta, ditay unay pakadanagan dagita. Inikkannatayo ni Jehova iti garantia a mangpabileg ken mangpapigsa iti nakemtayo. Ikarkarina: “Saanto nga agballigi ti aniaman nga armas a naaramid maibusor kenka.” (Isa. 54:17) Adda tallo nga importante a kinapudno nga ipalagip dayta a sasao.

14. Apay a saantayo a masdaaw no rautendatayo dagiti kabusor ti Dios?

¹⁴ Umuna, kas pasurot ni Kristo, ekspektarentayo a maguratayo. (Mat. 10:22) Impadto ni Jesus a nakaronto ti pannakaidadanes dagiti adalanna bayat ti maudi nga al-aldaw. (Mat. 24:9; Juan 15:20) Maikadua, pakdaarannatayo ti padto ni Isaias a saandatayo laeng a guraen dagiti kabusortayo; agusarda pay iti nadumaduma nga armas, kas iti di madmadlaw a panangallilaw, nakaro a kinaulbod, ken naranggas a panangidadanes. (Mat. 5:11) Saan a lapdan ni Jehova dagiti kabusortayo a mangusar kadagitoy nga armas iti pannakigubatda kadatayo. (Efe. 6:12; Apoc. 12:17) Ngem ditay koma agbuteng. Apay?

15-16. (a) Ania ti maikatlo a kinapudno a masapul a laglagipentayo, ken kasano a suportaran daytoy ti Isaias 25:4, 5? (b) Kasano nga iladawan ti Isaias 41:11, 12 ti pagbanagan dagidiay lumaban kadatayo?

¹⁵ Usigentayo ti maikatlo a laglagipentayo.  Imbaga ni Jehova a “saanto nga agballigi ti aniaman nga armas” a mausar kadatayo. No kasano a protektarannatayo ti pader iti makadadael a bagyo, protektarannatayo met ni Jehova iti “pug-aw dagiti manangirurumen.” (Basaen ti Isaias 25:4, 5.) Saanto a pulos agballigi dagiti kabusortayo a manglapped iti pananggun-odtayo iti biag nga agnanayon.​—Isa. 65:17.

¹⁶ Pabpabilgen pay ni Jehova ti panagtalektayo kenkuana babaen ti panangidetalyena iti pagbanagan dagidiay “makapungtot” kadatayo. (Basaen ti Isaias 41:11, 12.) Kasanoman kakaro ti pananglaban ken pananggubat dagiti kabusortayo, maymaysanto ti resultana: ‘Awanto ti pagbanagan ken matayto’ ti amin a kabusor ti ili ti Dios.

17-18. (a) Kasano a ti panagbasa iti Biblia mapabilegna ti panagtalektayo iti Dios? Mangted iti pagarigan. (b) Kasano a matulongannatayo ti panangutob iti teksto iti tawen 2019?

¹⁷ Bumileg ti panagtalektayo ken Jehova babaen ti ad-adda a panangam-ammotayo kenkuana. Ti kakaisuna a pamay-an a maaramidtayo dayta ket ti panangbasa a naimbag iti Biblia ken ti panangutob iti mabasatayo. Naglaon ti Biblia iti mapagtalkan a rekord no kasano a prinotektaran idi ni Jehova ti ilina. Tulongannatayo dayta a rekord nga agtalek nga aywanannatayo ita ti Dios.

¹⁸ Kitaentayo ti nagsayaat a panangiladawan ni Isaias no kasano a protektarannatayo ni Jehova. Tinukoyna ni Jehova kas pastor ken dagiti adipen ti Dios kas karnero. Kinuna ni Isaias maipapan ken Jehova: “Ummongennanto dagiti karnero babaen ti takiagna, ket sakruyennanto ida.” (Isa. 40:11) No mariknatayo ti arakup dagiti nabileg a takiag ni Jehova, mariknatayo a natalged ken kalmadotayo. Tapno makapagtalinaedtayo a kalmado uray adda dagiti problematayo, pinili ti matalek ken masirib nga adipen ti Isaias 41:10 kas teksto iti tawen 2019, “Dika madanagan, ta siak ti Diosmo.” Panunotem a naimbag dagita a pammasiguro. Dagitoy ti mangpabileg kenka a mangsango kadagiti problema iti masanguanan.